Bibilo pase kwagh u Yehova vea Wan na, Yesu Kristu vea er sha kwagh u ican i Satan Diabolo a ve a mi la wang. I̱ kaa ér, “Ka nahan man i pase Wan u Aôndo ye, sha u vihin aeren a diabolo kera.” (1 Yohane 3:8) Tar u u eren kwagh sha hua shi ihyom man aferakaa a dumbur ker ne cii, a kar a u kera. Hide Satan Diabolo, u a lu “tor u tar ne” la di, Yesu tôndo zwa ér “a dugh [un] tor u tar ne kera.” (Yohane 12:31) A gema tar ne ua hingir u he u perapera, u Satan una kera lu a tahav sha u ga yô, nahan tar ne ua hingir ijiir i ior vea tema ker bem bem yô.—2 Peteru 3:13.

Mbataver ityough mba ve vende u geman ishima, ve nômbo ikyôr u eren akaabo la di a er a ve nena? Hen sha ityendezwa i i er i kpôô ne: “Mbaperapera vea tema sha tar, man mbananjighjigh kpaa vea tema sha u gbem. Kpa aferaior yô, á tim a sha tar kera, man mbakoron ior ndiar ave kpaa, á wuhe ve kera.” (Anzaakaa 2:21, 22) Akaa a uumace mbaaferev ve ne a eren la cii, aa kera lu ga. Hen shighe u ior vea tema ken mkpeyol la, a lu duen a uumace mba ungwan imo i Aôndo ken dyako u isholibo i ve ye la sha tegh tegh.—Mbaromanu 6:17, 18; 8:21.

Ken tar u he la, Aôndo una bee a iferkwagh nena? Una er kwagh ne sha u geman kwagh sha iyua i a gbe se a mi, se lu a ian i tsuan kwagh u se soo la ga. Kpa una tese uumace mba ungwan un igbenda na, sha er una wase ve vea de mbamhen mba bov kua aeren a bo kpaa yô.

Akaabo a ka a er se abur abu la di Aôndo una er nena sha mini? A tôndo zwa ér ica ia gba ga tsô tar ne ua hingir sha ikyev i gomoti u Tartor na la. Tor u Tartor shon, u i lu Aôndo iyol na a tsough la ka Yesu Kristu, u a lu a tahav mbu been ior angev la. (Mateu 14:14) Yesu ngu a tahav mbu ahumbe man zegemnger je kpa una fatyô u tilen sha ishigh nagh ving yô. (Marku 4:35-41) Sha nahan yô, ican i “shighe man aikyor” ve ne se ye la cii ia bee vindi vindi. (Orpasenkwagh 9:11) Shighe u Kristu una lu hemen tar la, ma kwaghbo môm una kera er uumace ga.—Anzaakaa 1:33.

Ior mba dedoo umiliôn umiliôn mba ve kpe ikyu i vihin tsung la di ye? Cii man Yesu nder huror na Lasaru shin ku yô, a kaa ér: “Mo M ngu mnder man uma kpaa.” (Yohane 11:25) Mimi je, Yesu ngu a tahav mbu nderen ior shin ku, shin geman mbakpenev hingir mbaumav!

Aluer u soo u va lun ken tar u akaabo aa kera eren ior mba dedoo ga la yô, er nena u tsough u henen Bibilo sha er u seer fan kwagh u Aôndo u mimi la kua awashima na ga? A doo Mbashiada mba Yehova mba hen ijiir you kpishi u wasen we ér u zua a mfe la. Se mba lôhôn we gbar gbar ser lam a Mbashiada mba hen ijiir you gayô nger mba ve gberen magazin ne la.