ITINEKWAGH I TAMEN | U FATYÔ U LUN IKYUA A AÔNDO
U Nengen Wer U Ngu Ikyua a Aôndo?
“Ka wea ya ijende vea Aôndo yô, u nenge wer kwagh u eren we ngu ga shi u ngu a hanma kwagh, nahan ishima you i mem. Ka i lu ú er hanma shighe yô, Aôndo ngu keren ér i kpe u iyol nahan.”
—MKAANEM MA CHRISTOPHER, GUMOR U KEN TAR U GHANA.
“Aôndo ka a nenge a ican you la, nahan a tese u dooshima shi a na ishima sha kwagh wou i hemba er u sen un la.”
—MKAANEM MA HANNA, WANKWASE U ANYOM 13, KEN KPENTAR U ALASKA, TAR U AMERIKA.
“Ka wea fa wer u ya ikyar a Aôndo kôôsôô nahan, i doo u shi i kundu u iyol je i zua ga!”
—MKAANEM MA GINA, KWASE U KEN TAR U JAMAICA U A HEMBE ANYOM 40 YÔ.
Ka Christopher man Hannah kua Gina tseegh i lu ve nahan ga. Ior mbagenev kpishi sha tar wuee kpa mba a vangertiôr ér Aôndo nengen ve ér mba azende a na. We di ye? U nengen wer u ngu ikyua a Aôndo kpa? Shin u soo wer u seer kporom ikyua a naa? Alaghga ka u pine wer, ‘Orumace u kaka ne nahan, nana fatyô u yan ikyar a Aôndo Uhembanagee cii laa? Man aluer ka u nana fatyô yô, nana er kwagh ne nena?’
SE FATYÔ U YAN IJENDE VEA AÔNDO
Bibilo tese ér se fatyô u yan ijende vea Aôndo. Ruamabera kaa ér Aôndo yange yila Aberaham, Orheberu u sha ayange a tsuaa la ér “huror Wam.” (Yesaia 41:8) Shi umbur kpaa wer, i kaa a vese ken Yakobu 4:8 ér: “Kporom nen hen Aôndo, Un kpaa, Una kporom her a ven.” Kwagh ne tese wang ér se fatyô u yan ijende a Aôndo, lun a na kôôsôô. Kpa er se nengen a Aôndo ga yô, se ‘kporom hen Aôndo’ nena ve se ya ijende a naa?
Cii man se na mlumun sha mpin la yô, de se nenge er ka i hii ve uumace ve ya ijende la. Ka u hii fan iti i or u u soo u yan ijende a nan la. Nahan wea lamen a nan hanma shighe, wea pasen nan mbamnenge shin mbamhen ou sha akaa shi nan kpa nana eren nahan yô, ijende yen la i hemban taver a taver. Shi ka nea nôngon nea eren akaa sha ci u iwasen i hanmô wen yô, ne lu kôôsôô je i zua ga. Aôndo kpa, ka imba kwagh u se er ve se ya ijende a na je la. De se nenge er se fatyô u eren kwagh ne yô.
Kwagh Ugen u Alaghga Shi Una Doo U Yô
IYOUKURA
U Fa Iti i Aôndo shi U Yer Un sha I Kpa?
Aôndo ngu pasen iyol na hen a we sha u kaan ér: “Ka Mo [Yehova], ka iti yam je ne.”
