Единҗи гүн болса, олар шәхериң дашындан еди гезек айландылар ве Худай Ерихоның бейик диварларыны йыкды. Бу ысрайыллылара Ерихо шәхерине гирип, оны басып алмага мүмкинчилик берди. Мукаддес Язгыларда айдылышы ялы, Ерихоның гысга вагтда басылып алнандыгыны тассыклаян археологик тапындылар бармы?

Гадымы дөвүрде душманлар көпленч берк шәхери габаярдылар. Бу габавың нәче вагт довам эдйәндигине гарамаздан, олар шәхери басып алансоң, онуң әхли байлыгыны, шол санда азык харытларыны хем талаярдылар. Эмма археологлар Ерихоның харабачылыгындан әтиячлык үчин гойлан азык өнүмлерини тапдылар. Бу бабатда «Мукаддес Язгылара археологик сын» атлы журналда шейле дийилйәр: «Күйзе гапларыны хасаба алманымызда, харабачылыкдан тапылан өнүмлериң көпүси галла өнүмлериди... Палестинаның археологик йыл язгыларында бу өрән тәсин хасапланяр. Себәби бир я-да ики гап галланы тапып болса-да, онуң шейле көп мөчберде тапылмагына гаты сейрек душ гелинйәр».

Мукаддес Язгылара лайыклыкда, ысрайыллыларың Ерихоның галласыны таламазлыгының дегерли себәби барды. Ехова олара бу бабатда табшырык берипди (Еш. 6:17, 18). Ысрайыллылар шәхере яз айлары, ягны хасыл дөврүнден соң, галланың бол вагты хүҗүм эдипдилер (Еш. 3:15—17; 5:10). Шол себәпли Ерихода шейле көп галланың галмагы Мукаддес Язгыларда айдылышы ялы, ысрайыллыларың бу шәхери узак вагт габамандыгыны гөркезйәр.