7-нҗи бап

Өлен доган-гарындашларымыз үчин хакыкы умыт

Өлен адамларың дирелҗегини ниреден билйәрис?

Ехова дирелише нәхили гараяр?

Кимлер дирелер?

1—3. Бизи нәхили душман ызарлаяр ве Мукаддес Язгылар нәхили теселли берйәр?

АЙДАЛЫ, сен залым душмандан гачып баряң. Ол сенден хас гүйчли ве чакган. Сен бу душманың рехимсиздигини билйәң, себәби гөзүң алында бирнәче достуңы өлдүрди. Сен нәче гачып гутулҗак болсаң-да, ол ызыңдан етип гелйәр. Хич хили умыт ёк диен ялы. Бирденкә халасгәр пейда боляр. Ол душмандан хас гүйчли, шонуң үчин саңа көмек этҗекдигине сөз берйәр. Сениң йүрегиң гиңән болса герек.

² Сени, догруданам, шейле душман ызарлаяр дийсе болар. Ол хер биримизи ковалаяр. Өңки бапдан билшимиз ялы, шол душмана Мукаддес Язгыларда өлүм дийилйәр. Хич ким ондан гутулып я үстүн чыкып биленок. Бу душман көпүмизиң доган-гарындашларымызы алып гитди. Эмма Ехова өлүмден хас гүйчли. Ол хакыкы Халасгәр ве бу залым душманы еңип билҗекдигини субут этди. Шейле-де ол өлүми хемишелик ёк этҗекдигини сөз берйәр. Мукаддес Язгыларда: «Ёгалдылҗак соңкы душман болса өлүмдир» дийилйәр (1 Коринтослылар 15:26). Нәхили аҗайып вада!

 ³ Гарындашларымызың өлүми бизе нәхили агыр дегйәндиги барада ойланып гөрели. Бу теселли берйән умыдың гымматыны билмәге көмек эдер. Чүнки Ехова өлен адамлар дирелер диййәр (Ишая 26:19). Олар дирелип ене-де яшар.

ГАРЫНДАШЛАРЫМЫЗ ӨЛЕНДЕ

4. а) Лазарың өлүмине Исаның гарайшы, нәме үчин Ехованың дуйгусына дүшүнмәге көмек эдйәр? б) Исаның якын достлары кимлер?

⁴ Сен якыныңы йитирипмидиң? Йитгиниң хасраты, агысы ве алачсызлык дуйгусы чекип-чыдардан агыр. Шейле ягдайда Худайың Сөзүнден теселли гөзлемели (2 Коринтослылар 1:3, 4). Мукаддес Язгылардан Ехованың ве Исаның өлүме гарайшыны билйәрис. Атасына меңзейән Иса доган-гарындашымызың өлүминиң нәхили хасрат гетирйәндигини билйәрди (Яхя 14:9). Иса Иерусалиме геленде, Бейтания диен гоңшы обада яшаян Лазар ве онуң уялары Меръемдир Марталарда бирнәче гезек дүшләпди. Шейдип, олар дост болдулар. Мукаддес Язгыларда: «Иса Мартаны, онуң уясыны ве Лазары говы гөрйәрди» дийилйәр (Яхя 11:5). Эмма өңки бапдан билшимиз ялы, Лазар арадан чыкды.

5, 6. а) Лазарың достларының ве гарындашларының хасраты Иса нәхили тәсир этди? б) Исаның йүрегиниң гыйылмагы, бизе нәме үчин теселли берйәр?

⁵ Якын достуның өлүми Иса нәхили тәсир этдикә? Инҗилде онуң Лазарың гарындашларына теселли бермәге гелендиги айдыляр. Көплериң гөзяшдыр хасратыны гөренде, Исаның йүреги гыйылды. Ол «рухда гынанды» ве толгунды. «Иса аглады» (Яхя 11:33, 35). Йөне бу онуң умыдының ёкдугыны аңладярмы? Ёк, чүнки Иса гудратың болҗагыны билйәрди (Яхя 11:3, 4). Шонда-да ол йитгиден яңа хасрат чекди.

⁶ Достуның өлүмине Исаның гөзяш дөкмеги бизе  теселли берйәр. Бу Исаның ве онуң Атасы Ехованың өлүми йигренйәндигини гөркезйәр. Эмма Ехова Худайың бу залым душманы еңмәге гүйҗи етйәр! Гел, онуң Иса нәхили гүйч берендигини билели.

«ЛАЗАР, ДАШАРЫК ЧЫК!»

7, 8. Нәме үчин Лазара көмек эдип болмаҗак ялыды, эмма Иса нәме этди?

⁷ Лазар говакда җайланыпды, шонуң үчин Иса говагың агзындакы дашы айырмагы хайыш эдйәр. Марта муңа гаршы болды, чүнки Лазарың өленине дөрт гүн гечипди, онуң җеседи болса порсан болмалы (Яхя 11:39). Онсоңам, өлен адама көмек эдип болармы?

⁸ Дашы айранларында Иса: «Лазар, дашарык чык!» дийип гыгырды велин, «өли габырдан» чыкды (Яхя 11:43, 44). Адамлар гөр, нәхили бегенендир! Лазарың уялары, гарындашлары, достлары ве гоңшулары онуң өлендигини билйәрдилер. Ынха, инди оларың говы гөрйән адамы олара саг-аман говушды. Бу җуда гең зат! Адамлар бегенҗинден яңа, Лазары гуҗакламага ховлугандыр. Бу, догрудан-да, өлүмиң үстүнден еңиш!

9, 10. а) Лазары дирелтмәге Иса ким гүйч берди ве муны биз ниреден билйәрис? б) Дирелиш барадакы вакаларың нәхили пейдасы бар?

⁹ Иса өзүне шөхрат газанҗак болмаярды. Иса Лазары дирелтмәнкә, Ехова дога эдип, гүйҗи ондан аляндыгыны гөркезди (Яхя 11:41, 42). Эмма Ехова гудрат билен диңе Лазары дирелтмәнди. Худайың Сөзүнде докуз саны дирелиш барада айдыляр *. Мукаддес Язгылардакы бу вакалары окап өвренсең, йүрегиңе гиңлик берйәр! Бу вакалар Худайың ала тутмаяндыгыны, онуң хем яшлары, хем гаррылары, хем эркеклери,  хем аяллары, хем еврейлери хем-де еврей дәллери дирелдйәндигини өвредйәр. Бу вакалар гөр, нәхили шатлыклы! Мысал үчин, Иса гызҗагазы дирелденде, онуң ата-энеси «гаты гең галды» дийип, Инҗилде айдыляр (Маркус 5:42). Ехова олара ятдан чыкмаҗак ягшылык этди.

¹⁰ Исаның дирелден адамлары вагтың гечмеги билен ене-де өлдүлер. Онда олары дирелтмек герекмиди? Элбетде. Мукаддес Язгылардакы бу вакалар ваҗып хакыкаты тассыклаяр хем-де бизе умыт берйәр.

ДИРЕЛИШ БАРАДАКЫ ВАКАЛАР НӘМЕ ӨВРЕДЙӘР?

11. Лазар билен болан вака Вагызчы 9:5-дәки сөзлери нәдип тассыклаяр?

¹¹ Мукаддес Язгылар өлүлер «хич зат биленок» дийип өвредйәр. Олар хушсуз. Өлүлер о дүнйә гиденок. Муны Лазар билен болан вака тассыклаяр. Ойланып гөр, Лазар диреленде гөкдәки эшретли дурмуш барада гүррүң бердими? Я довзахда болян элхенч затлары гүррүң берип горкуздымы? Ёк, бу барада Мукаддес Язгыларда айдылмаяр. Лазар дөрт гүнләп өлүди ве «хич зат биленокды» (Вагызчы 9:5). Лазар өлүм укусындады (Яхя 11:11).

12. Лазар билен болан ваканың тослама дәлдигине нәме үчин ынанып билерис?

¹² Лазар билен болан вака дирелишиң тослама дәлдигини гөркезйәр. Иса Лазары көп адамларың гөзүниң өңүнде дирелтди. Бу гудраты хатда Исаны йигренйән дини ёлбашчылар хем инкәр эдип билмедилер. Гайтам, олар: «Нәме этмели? Бу Адам [Иса] көп аламат гөркезйәр» дийдилер (Яхя 11:47). Дирелен Лазары гөрмек үчин көп адамлар гелди. Оларың көпүси Иса иман этдилер. Лазары гөрүп, олар Исаның Худай тарапындан гелендигине ынандылар. Бу гөзе гөрнүп дуран  субутнама боланы үчин, ехуды дини ёлбашчылар Иса билен Лазары өлдүрҗек болдулар (Яхя 11:53; 12:9—11).

13. Ехованың өлүлери дирелдип билҗекдигини ниреден билйәрис?

¹³ Дирелиш, догруданам, болармыка? Элбетде, себәби Иса «габырдакыларың хеммесиниң» дирелҗекдигини айтды (Яхя 5:28). Ехова әхли җанлы-җандарың Ярадыҗысы. Эйсем, оңа өз яраданларына тәзеден җан бермек кынмыка? Элбетде, кын дәл. Эмма көп затлар Ехованың яткешлигине баглы. Ол бизиң өлен якын гарындашларымызы ядына салып билермикә? Ойланып гөр, әлемдәки йылдызларың саны ёк, йөне Худай оларың хер бириниң адыны тутяр! (Ишая 40:26). Шонуң үчин гарындашларымызың гылык-хәсиетлерини ятда сакламак Ехова кын дүшмез. Ол бизиң гарындашларымызы дирелдип хем билер.

14, 15. Эйюбың айтмагына гөрә, Ехова дирелише нәхили гараяр?

¹⁴ Йөне Ехованың өлен адамлары дирелдеси гелермикә? Элбетде. Бу барада Мукаддес Язгылар хем айдяр. Худайың вепалы гуллукчысы Эйюп: «Өлен адам ене-де яшармыка?» дийип сорапды. Ол габырда ятан адамың Худайың ятларына гарашяндыгы барада айдыпды. Соңра ол Ехова: «Сен чагырсадың, мен болса җогап берердим. Сен өз элиң эден ишлерини күйсәрдиң» дийди (Эйюп 14:13—15).

¹⁵ Ойланып гөр! Ехова өлен адамлары дирелдеси гелйәр. Эйсем, бу бизи бегендирмейәрми? Эмма кимлер дирелер ве диреленлер ниреде яшар?

«ГАБЫРДАКЫЛАРЫҢ ХЕММЕСИ»

16. Дирелен адамлар нәхили шертлерде яшар?

¹⁶ Дирелиш барадакы вакалар, гелеҗекдәки дирелишиң нәхили болҗакдыгына дүшүнмәге көмек эдйәр. Мукаддес Язгыларда өлен адамларың ер йүзүнде  дирелип, гарындашларына говшандыклары гүррүң берилйәр. Бу затлар гелеҗекде-де болар, йөне оңа гөрә хас улы мөчберде. Үчүнҗи бапдан билшимиз ялы, Худай бүтин ер йүзүниң Җеннет болмагыны ислейәр. Шонуң үчин дирелен адамлар урушсыз, җенаятсыз ве кеселсиз дурмушда яшар. Олар багтлы болуп, ер йүзүнде аҗайып шертлерде эбеди яшар.

17. Кимлер дирелер?

¹⁷ Кимлер дирелеркә? Иса «габырдакыларың хеммесиниң Онуң сесини эшидип... дирелҗекдигини» айтды (Яхя 5:28, 29). Шонуң ялы хем Ылхам 20:13-де: «Деңиз өзүндәки өлүлери, өлүм ве өлүлер дияры-да өзлериндәки өлүлери табшырдылар» дийилйәр. «Өлүлер дияры» хемме өвлүйәлери аңладяр (212, 213-нҗи сахыпалардакы Гошмача маглумата серет). Бу өвлүйәлер бошап галар. Ондакы ятан миллиардларча мерхумлар дирелер. Павлус ресул: «Хем догрулар, хем эгрилер өлүмден дирелер» дийди (Ресулларың ишлери 24:15). Бу нәмәни аңладяр?

18. Дирелҗек «догрулара» кимлер дегишли ве дирелише болан умыт саңа нәхили тәсир эдйәр?

¹⁸ «Догрулара» Мукаддес Язгылардакы Иса Месихден өң яшан адамлар дегишли. Мүмкин, сен деррев Нухы, Ыбрайымы, Сараны, Мусаны, Руты, Эстери ве башга-да көп вепалы эркекдир аяллары ядыңа салансың. Оларың кәбирлери еврейлере язылан хатың 11-нҗи бабында агзаляр. Эмма «догрулара» Ехованың шу гүнлер өлен гуллукчылары хем дегишли. Дирелише болан умыт, догрудан-да, өлүм горкусындан азат эдйәр (Еврейлер 2:15).

19. «Эгрилер» кимлер ве Ехова олара нәхили мүмкинчилик берер?

¹⁹ Ехованы танамадык ве оңа гуллук этмедик адамлара нәме боларка? Бу миллиардларча «эгрилер» хем унудылмаз. Оларам дирелер. Олара Худай барада хакыкаты  билмәге ве онуң билен достлашмага вагт берлер. Өлен адамлар ер йүзүнде мүң йылың довамында дирелер ве Ехованың вепалы гуллукчыларының хатарына гошулар. Ол дөвүр нәхили аҗайып болар! Мукаддес Язгыларда оңа Магшар гүни я-да Хөкүм гүни дийилйәр *.

20. Җәхеннем нәмәни аңладяр ве ол ере кимлер дүшйәр?

²⁰ Бу хемме адамларың дирелҗегини аңладярмы? Ёк. Мукаддес Язгылар кәбир адамларың «җәхеннемдедигини» айдяр (Лука 12:5, ТД). Җәхеннем дийип, гадымы Иерусалимиң галасының дашындакы хапа дөкүлйән ере айдылярды. Ол ерде җесетлери ве дүрли хапалары якярдылар. Ехудыларың айтмагына гөрә, җайламага хем-де дирелише мынасып болмадык адамларың җесетлерини шол ере зыңярдылар. Шонуң үчин җәхеннем хемишелик ёк эдилмеги аңладяр. Иса дирилериң ве өлүлериң үстүнден хөкүм чыкарса-да, Ёкары Казы диңе Еховадыр (Ресулларың ишлери 10:42). Ол залым ве гулак асмаян адамлары хич хачан дирелтмез.

ГӨКДӘКИ ЯШАЙЫШ ҮЧИН ДИРЕЛИШ

21, 22. а) Ене нәхили дирелиш барада айдыляр? б) Гөкдәки яшайыш үчин илкинҗи дирелен ким?

²¹ Мукаддес Язгыларда гөкдәки яшайыш үчин, рухы шахсыет хөкмүнде дирелиш барада хем айдыляр. Онда шейле дирелиш билен диңе Иса Месихиң дирелендиги айдыляр.

²² Иса өленде, Ехова онуң өлүлер диярында хемишелик галмагына ёл бермеди (Зебур 16:10; Ресулларың ишлери 13:34, 35). Худай оны дирелтди, йөне ынсан хөкмүнде дәл. Петрус ресул Иса Месих «тен  боюнча өлдүрилип, рух боюнча дирелдилди» дийип дүшүндирди (1 Петрус 3:18). Бу гөрлүп-эшидилмедик гудратды! Иса гүйчли рухы шахсыет хөкмүнде дирелди (1 Коринтослылар 15:3—6). Ол илкинҗи болуп шейле хормата мынасып болды (Яхя 3:13). Эмма шейле дирелиш билен Исадан башга-да дирелҗеклер барды.

23, 24. Иса Месихиң «кичиҗик сүрүсине» кимлер гирйәр ве оларың саны нәче?

²³ Иса Месих тизден гөге доланып барҗагыны билип, вепалы шәгиртлерине «ер тайярламага» баряндыгыны айтды (Яхя 14:2). Иса пыгамбер гөге гитҗеклери «кичиҗик сүри» дийип атландырды (Лука 12:32). Бу вепалы месихчилериң кичиҗик топарына нәче адам гирйәр? Яхя ресул шейле дийди: «Онсоң гөрсем, Гузы [Иса Месих] Сион дагының үстүнде дурды. Онуң янында болса маңлайында Онуң ве Атасының ады язылгы йүз кырк дөрт мүң адам барды» (Ылхам 14:1).

²⁴ Бу 144 000 месихчилер ве шол санда Исаның вепалы ресуллары, гөкдәки яшайыш үчин дирелерлер. Бу дирелиш хачан башлар? Павлус ресул мунуң Иса Месихиң барлыгында болҗакдыгыны язды (1 Коринтослылар 15:23). Шол дөвүр эййәм башлады, биз муны 9-нҗы бапдан билерис. Шонуң үчин 144 000 адамларың хәзирки ерде галанлары, өлен бадына гөкде яшамак үчин дирелйәрлер (1 Коринтослылар 15:51—55). Эмма көп адамлар гелеҗекде ер йүзүндәки Җеннетде дирелерлер.

25. Индики бапдан нәме билерис?

²⁵ Өлүм атлы залым душманы, Ехованың хемишелик ёк этҗеги гөр, нәхили аҗайып! (Ишая 25:8). Эмма кәбир адамларың гөкдәки яшайша дирелмегиниң себәбини билесиң гелйәндир. Олар гөкдәки адалатлы хөкүметиң агзасы боларлар. Бу хөкүмет барада индики бапдан билерис.

[Чыкгытлар]

МУКАДДЕС ЯЗГЫЛАР НӘМЕ ӨВРЕДЙӘР?

▪ Дирелиш барадакы вакалар бизе умыт берйәр (Яхя 11:39—44).

▪ Ехова өлен адамлары дирелдеси гелйәр (Эйюп 14:13—15).

▪ Мазарчылыкда ятан мерхумларың әхлиси дирелер (Яхя 5:28, 29).

[Макаланың сораглары]

 [69 Сахыпадакы сурат]

Эли пыгамбер дул хатының оглуны дирелтди (3 Патышалар 17:17—24)

[69 Сахыпадакы сурат]

Петрус ресул Доркас атлы месихчи уяны дирелтди (Ресулларың ишлери 9:36—42)

[69 Сахыпадакы сурат]

Лазарың дирелмеги көплери бегендирди (Яхя 11:38—44)

 [75 Сахыпадакы сурат]

Өлен адамлар Җеннетде дирелип, доган-гарындашларына говшар