Ilkinji maşgalany döreden — Ýehowa a Hudaý. Mukaddes Ýazgylarda Hudaýyň ilkinji aýaly ýaradyp, «ony adamyň ýanyna getirendigi» aýdylýar. Adam ata muňa örän begenip: «Ine, süýegi öz süýegimden, teni öz tenimdendir» diýdi (Gelip çykyş 2:22, 23). Ýehowa Hudaý häzirem durmuş guran adamlaryň bagtly bolmagyny isleýär.

Siz durmuş guranyňyzda, hemme zat gowy bolar diýip pikir edensiňiz. Hatda är-aýal biri-birini ýürekden söýse-de, olar käbir kynçylyklara duş gelip biler (1 Korintoslylar 7:28). Şu broşýurada Mukaddes Ýazgylara esaslanan prinsipler berilýär. Eger siz olara eýerseňiz, maşgalaňyzy bagtly edip bilersiňiz (Zebur 19:8—11).

MUKADDES ÝAZGYLARDA NÄME DIÝILÝÄR: Är — maşgalanyň başy (Efesliler 5:23).

Eger siz maşgalabaşy bolsaňyz, Ýehowa aýalyňyzyň mähir bilen aladasyny etmegiňizi isleýär (1 Petrus 3:7). Hudaý aýaly erkek adama kömekçi edip ýaratdy, şonuň üçin siz aýalyňyza hormat goýmaly we ony söýmeli (Gelip çykyş 2:18). Siz aýalyňyzy şeýle güýçli söýmeli welin, onuň bähbidini özüňiziňkiden ýokary tutmaly (Efesliler 5:25—29).

Eger siz aýal bolsaňyz, Ýehowa siziň ýanýoldaşyňyza çuňňur hormat goýmagyňyzy we oňa maşgala borçlaryny ýerine ýetirmäge kömek etmegiňizi isleýär (1 Korintoslylar 11:3; Efesliler 5:33). Şeýle-de ýanýoldaşyňyzyň gelýän kararyny goldap, oňa ýürekden kömek ediň (Koloseliler 3:18). Eger siz şeýtseňiz, ýanýoldaşyňyz we Ýehowa siziň gadyryňyzy biler (1 Petrus 3:1—6).

MASLAHAT

• Biri-biriňizden has gowy är ýa-da aýal bolmak üçin nähili häsiýetleri ösdürmelidigiňizi soraň. Nämäni düzetmelidigiňizi biler ýaly ünsli diňläň

• Sabyrly boluň, sebäbi bir-biriňiziň göwnünden turmagy öwrenmek üçin biraz wagt gerek bolýar

MUKADDES ÝAZGYLARDA NÄME DIÝILÝÄR: Ýanýoldaşyňyzyň islegini göz öňünde tutup, aladasyny ediň (Filipililer 2:3, 4). Biri-biriňizi gymmat saýyň we Ýehowanyň gullukçylaryndan «mylakatly» bolmagy talap edýändigini unutmaň (2 Timoteos 2:24). Hudaýyň Sözünde şeýle diýilýär: «Biri bardyr, gylyjyň sanjylyşy ýaly, soňuny saýman gepleýändir; akyldaryň dili bolsa şypa berýändir». Şonuň üçin aýtjak sözleriňize ünsli boluň (Süleýmanyň tymsallary 12:18). Ýehowanyň mukaddes ruhy size ýanýoldaşyňyzy söýmäge we onuň bilen mähirli gürleşmäge kömek eder (Galatýalylar 5:22, 23; Koloseliler 4:6).

MASLAHAT

• Ýanýoldaşyňyz bilen wajyp meseleler barada pikir alşanyňyzda, rahatlygy saklap, açyk gürrüňdeşlik edip biler ýaly doga ediň

• Näme aýtjakdygyňyz we ony nädip aýtjakdygyňyz barada gowy oýlanyň

MUKADDES ÝAZGYLARDA NÄME DIÝILÝÄR: Siz durmuş guranyňyzda, ýanýoldaşyňyz bilen «bir ten bolýarsyňyz» (Matta 19:5). Muňa garamazdan, siziň garaýşyňyz tapawutlanyp biler. Şol sebäpli bir pikirde we bir garaýyşda bolmagy öwreniň (Filipililer 2:2). Esasan-da, bir karara geleniňizde, agzybir bolmak wajyp. Hudaýyň Sözünde: «Maksatlar maslahat bilen berkarar bolýandyr» diýilýär (Süleýmanyň tymsallary 20:18). Goý, Mukaddes Ýazgylaryň prinsipleri size agzybir karara gelmäge kömek etsin (Süleýmanyň tymsallary 8:32, 33).

MASLAHAT

• Ýanýoldaşyňyza diňe bir pikiriňizi däl-de, duýgularyňyzy hem açyk aýdyň

• Bir karara gelmezden öň, ýanýoldaşyňyz bilen maslahatlaşyň