Dünýäniň soňunyň haçan geljekdigini bilmek üçin, Mukaddes Kitapda «dünýä» diýlende nämäniň göz öňünde tutulýandygyna düşünmeli. «Kosmos» diýen grek sözi «dünýä» diýlip terjime edilip, köplenç dünýädäki, esasan-da, Hudaýyň islegi boýunça ýaşamaýan adamlary aňladýar (Ýahýa 15:18, 19; 2 Petrus 2:5). Käte bolsa bu söz adamzat jemgyýetine degişli ulanylýar (1 Korinfliler 7:31; 1 Ýahýa 2:15, 16). a

«Dünýäniň soňy» näme?

 «Dünýäniň soňy» diýen jümle Mukaddes Kitabyň köp terjimelerinde duş gelýär we käte «dünýäniň ahyry» diýip hem terjime edilýär (Matta 24:3). Bu jümle ýer ýüzüniň ýa-da ähli adamzadyň ýok ediljekdigini däl-de, häzirki ynsan jemgyýetiniň soňunyň geljekdigini görkezýär (1 Ýahýa 2:17).

 Mukaddes Kitapda gowy adamlaryň ýer ýüzünde bagtly ýaşamagy üçin «ýaman iş edýänleriň» ýok ediljekdigi aýdylýar (Zebur 37:9—11). Bu «agyr muşakgadyň» soňky tapgyrynda, ýagny Armageddon urşunda ýerine ýeter (Matta 24:21, 22; Ylham 16:14, 16).

Dünýäniň soňy haçan geler?

 Isa: «Şol güni we sagady hiç kim, gökdäki perişdeler-de, Ogul-da bilýän däldir, muny diňe Ata bilýändir» diýdi (Matta 24:36, 42). Şeýle-de Isa: «Siziň garaşmaýan sagadyňyzda geler» diýende, onuň duýdansyz boljakdygyny görkezdi (Matta 24:44).

 Biz şol güni we sagady anyk bilmesek-de, Isa dünýäniň soňuny görkezýän «alamat» ýa-da wakalar barada aýtdy (Matta 24:3, 7—14). Mukaddes Kitapda bu döwre «ahyrzaman», «dünýäniň soňy» we «soňky günler» diýilýär (Danyýar 12:4; 2 Timoteos 3:1—5).

Dünýäniň soňy gelensoň bir zatlar galarmy?

 Hawa. Ýer ýüzi ýok edilmez. Sebäbi Mukaddes Kitapda: «Ol hiç haçan gymyldamaz» diýilýär (Zebur 104:5). Şeýle-de Mukaddes Kitapda: «Dogry adamlar ýeri miras alyp, onda ebedi ýaşar» diýip wada berlişi ýaly, ýer ýüzi adamdan dolar (Zebur 37:29). Hudaý ilkibaşdaky niýetine laýyk şertleri döreder:

•   Jennet bolar (Işaýa 35:1; Luka 23:43).

•   Howpsuzlyk we abadançylyk bolar (Mika 4:4).

•   Peýdaly we lezzet berýän iş bolar(Işaýa 65:21—23).

•   Keselçilik we garrylyk bolmaz (Eýýup 33:25; Işaýa 33:24).