E kē kitea te teine i te ata?​— Ko ia ko te afafine o te tamāloa e igoa ki a Iefata. E hē lea mai te Tuhi Paia pe ko ai tona igoa, kae e iloa e ki tatou na fakafiafia e ia tona tamana ma Ieova. Ke akoako ai ki tatou e uiga ki a te ia ma tona tamana, ko Iefata.

Ko Iefata he tamaloa lelei ma nā lahi tona taimi na fano ki te akoako o tona afafine e uiga ki a Ieova. He tamāloa malohi ma takitaki lelei. Na fehili ki ei nā tino Ihalaelu ke takitaki ki latou ke tau ma o latou fili.

Na tatalo atu ia Iefata ki te Atua ke manumalo ki latou. Na folafola atu e Iefata, kāfai e manumalo ia, e foki ki a Ieova te tino muamua e fetaui ma ia mai tona kāiga i tona toe foki mai. Ka nofo  ma galue te tino tēnei i te malumalu o te Atua ke pa ki te ikuga o tona ola. I te taimi tēnā nae olo nā tino ki te malumalu ke tāpuaki ki te Atua. Na manumalo ia Iefata i te taua! E kē iloa pe ko ai te tino muamua na fetaui ma Iefata mai tona kāiga i tona toe foki mai?​—

Io, ko te afafine o Iefata! Ko tana tamaiti lava ia, ma ka uga atu ke fano. Na matuā fānoanoa ia Iefata. Kae manatua, na fai tana folafolaga. Na tali vave tana afafine vēia: ‘Na fai tau folafolaga ki a Ieova, e tatau lā ke fakataunuku.’

Na fānoanoa foki te afafine o Iefata. I te malumalu, na hē mafai oi fakaipoipo ma maua ni tamaiti. Kae na fia fakataunuku e ia te folafolaga a tona tamana ma fakafiafia ai Ieova. Na hili atu te tāua ki a te ia i lō te fakaipoipo ma maua ni tamaiti. Ko tēia na fano kehe mai te kāiga ma nofo i te malumalu ke pa ki te ikuga o tona ola.

He ā tō manatu pe na fiafia tona tamana ma Ieova i te mea na ia faia?​— Io! Kāfai e fakalogo ma alofa koe ki a Ieova, e mafai oi vēia koe ko te afafine o Iefata. E matuā fakafiafia foki e koe o mātua ma Ieova.