E fakamatala mai e te Tuhi Paia nā vaega e lua o tāne Kelihiano e i a te ki latou nā tiute i te fakapotopotoga​—‘nā tauhi ma nā kaukauna fehoahoani.’ (Filipi 1:1, NW) E mahani oi i ei he aofaiga o uho e kaukauna atu i nā fakapotopotoga takitahi. Ko he ā te galuega e fai e nā kaukauna fehoahoani e aogā mo ki tatou?

E fehoahoani atu ki latou ki te tino o toeaina. Ko nā kaukauna fehoahoani e kavea ma ni tāne e malolohi o latou hokotakiga ma Ieova, e mafai oi fakalagolago ki ei, ni tāne tokakaga, e talavou iē tahi kae matutua iē tahi. E fai e ki latou nā galuega tāua e mahani a te fakalāpotopotoga fakatahi ma nā galuega fakatetino i te fakapotopotoga. E maua e nā toeaina te avanoa e fakatino ai nā tiute tauvakave o te akoako ma te leoleo-mamoe.

E tuku atu e ki latou he kaukaunaga aogā. Ko iē tahi kaukauna fehoahoani e tofia ke fakafeiloaki nā tino uma e pa mai ki nā hauniga. Hōvē ko iē tahi e fakaaogā te lakau fakaleolahi leo, te tufatufa atu o nā lōmiga, nā tuhi tupe a te fakapotopotoga, ma te tofia o nā kogāmea mo te tālakiga ki nā tino o te fakapotopotoga. E fehoahoani atu foki ki latou ki te tauhi o te Fale o Hauniga. E mafai oi fehili atu nā toeaina ke fehoahoani ki latou ki nā tino matutua. Hō he tiute taukave e kavatu ki nā kaukauna fehoahoani, e lotomalilie ke galulue mamafa ma lotofakafetai atu te fakapotopotoga ki a te ki latou.​—1 Timoteo 3:​13.

E foki mai e ki latou he fakatakitakiga lelei mo tāne Kelihiano. E filifili nā kaukauna fehoahoani mo to latou uiga Kelihiano. Ko a latou vaega e fai i nā hauniga, e fakamalohi ai tō tatou fakatuatua. Mai tō latou takitakiga lelei o te galuega tālaki, e fakamalohi ai tō tatou māelegā. Ona ko te galulue fakatahi o ki latou ma te tino o toeaina, e atiake ki latou te fiafia ma te kaufakatahi. (Efeho 4:​16) Mulimuli ake, e auhia ai foki ki latou ke kavea ma toeaina.

• Ko ni tāne vēhea nā kaukauna fehoahoani?

• E fehoahoani atu vēhea nā kaukauna ki te gahologa lelei o te fakapotopotoga?