Na foki e Ieova te lalolagi ki tamāloloa ma fafine. E o ki tatou te nofoaga tenei. Ko teia lā, te ulugali muamua, Atamu ma Eva, na heki faia ki lāua ke fakatumu te lagi, kua uma te fai e te Atua nā agelu ke nonofo i te lagi. (Iopu 38:​4, 7) I lo teia, na kave e te Atua te tamāloa muamua ma fakanofo i te palataiho fiafia e igoa ko te fātoaga o Etena. (Kenehe 2:​15-​17) Na fōki e Ieova ki a te ia ma ana fānau i te lumanaki te fakamoemoe ke ola fiafia e hē uma i luga o te lalolagi.​—Faitau te Halamo 37:29; 115:16.

I te kamataga, e na ko te fātoaga o Etena na kavea ma he palataiho. Ko te ulugali muamua na fuafua ke fakatumu te lalolagi i a lā fānau. Mulimuli ake, ko te fakamoemoe ke fakatumu te lalolagi uma ma kavea ma he palataiho. (Kenehe 1:​28) Ka hē fakaumatia lele te lalolagi. Ka kavea pea ma nofoaga o nā tino uma.​—Faitau te Halamo 104:5.

Matamata ki te vitiō Aiheā Na Fai ai e te Atua te Lalolagi?

Na heki uhiuhitaki Atamu ma Eva ki te Atua, teia na tuku kehe ai e Ieova mai te fātoaga. Na galo te palataiho, oi kua hē toe i ai he tino e manumalo i te toe mauagia. E lea mai te Tuhi Paia: “Ko te lalolagi kua foki ki te lima o tē e kino.”​—Iopu 9:​24.​—Faitau te Kenehe 3:​23, 24.

Pe kua tiaki e Ieova tona fakamoemoe muamua mo nā tino uma? Heai! Ko ia e hilihili kehe. E manuia ana mea uma e fai. (Ihaia 45:18) E toe fakafōki e ia nā tino uma ki te tulaga e tatau ki latou ke i ei.​—Faitau te Halamo 37:11, 34.

I te vaitaimi e kavea ai Iehu ma Tupu a te Atua ka ia toe fakafōki te palataiho ki te lalolagi. I te taua e takua ko Amaketo, ka takitaki e Iehu nā agelu a te Atua ma fakaumatia ki latou uma e teteke ki te Atua. Ka haihai e Iehu ia Hatani i te falepuipui  mo te 1,000 tauhaga. Ka fakahao nā tino o te Atua i te fakaumatiaga auā ka takitaki ma puipui ki latou e Iehu. Ka maua e ki latou te ola e fakavavau i luga o te lalolagi Palataiho.​—Faitau te Fakaaliga 20:​1-3; 21:3, 4.

Ko āfea e kaumai ai e te Atua te ikuga o nā mea kino i luga o te lalolagi? Na taku mai e Iehu te “fakailoga” e iloa ai kua tafapili mai te ikuga. I te tulaga o te lalolagi i te vaitaimi nei kua fakamataku ai te fakahao o nā tino uma ma fakaalia ai kua tatou ola i te “taimi e uma ai te olaga tenei.”​—Faitau te Mataio 24:​3, 7-​14, 21, 22.

I te vaitaimi e pule ai Iehu mai te lagi ki luga o te lalolagi mo te 1,000 tauhaga, ka ia kaumaia te ikuga o nā mafatiaga uma. (Ihaia 9:​6, 7; 11:9) E hē gata ko ia e kavea ma he Tupu, kae ka gaoioi Iehu ko he Ohitaulaga Hili ke kave kehe nā agahala a ki latou e alolofa ki te Atua. Ko teia lā, e ala i a Iehu, ka fakaiku e te Atua te tauale, ola matua, ma te oti.​—Faitau te Ihaia 25:8; 33:24.

Ko nā tino e uhiuhitaki ki te Atua ka ola i te Palataiho. (1 Ioane 2:​17) Na uga atu e Iehu ona hoko ke hakili nā tino lotomaulalo ma akoako ki latou i te auala e talia e te Atua. I nā aho nei, kua haunia e Ieova te fia miliona o nā tino ke ola i luga o te lalolagi Palataiho i te lumanaki. (Hefanaia 2:3) I nā Fale o Hauniga o Molimau a Ieova, ko nā tino kua akoako ke kavea ma ni tāne ma tamana lelei, ma ni āvaga ma ni mātua e hili atu te lelei foki. E tapuaki fakatahi te fānau ma mātua ma akoako i te auala e aogā ai te tala lelei.​—Faitau te Mika 4:​1-4.