AGOSTO 26, 2022 | UPDATED: MARSO 8, 2023
RUSSIA

UPDATE—BINAGO ANG SENTENSIYA | Kalmado at Nagtitiwala sa Kabila ng Pag-uusig

I-PLAY

Noong Marso 1, 2023, inilabas ng Stavropol Territory Court ang desisyon nito sa kaso ni Brother Anatoliy Gezik at ng asawa niyang si Irina at ni Brother Viktor Zimovskiy. Ginawang suspended prison sentence ang dating sentensiya kina Anatoliy at Viktor. Hindi na kailangang magsagawa si Anatoliy ng correctional labor. Pinalaya din agad si Viktor. Hindi nagbago ang suspended prison sentence na hatol kay Irina. Hindi siya makukulong sa ngayon.

Noong Nobyembre 14, 2022, hinatulan ng Georgievskiy City Court of the Stavropol Territory si Anatoliy at ang asawa niyang si Irina, gayundin si Viktor. Sinentensiyahan si Anatoliy ng apat-na-taon-at-dalawang-buwang correctional labor. Pinatawan naman si Irina ng apat-na-taon-at-dalawang-buwang suspended prison sentence. Sinentensiyahan si Viktor na mabilanggo nang anim na taon at dalawang buwan, at agad siyang ikinulong.

Time Line

Oktubre 23, 2019

Hinalughog ng mga pulis ang mga bahay ng tatlong pamilya ng mga Saksi ni Jehova sa Georgievsk. Naglagay ng ebidensiya ang mga pulis habang naghahalughog sila. Sina Anatoliy, Irina, Viktor, at walong iba pang Saksi ay ikinulong at magdamag na pinagtatanong
Disyembre 30, 2019

Sinampahan ng kasong kriminal sina Anatoliy, Irina, at Viktor
Enero 23, 2020

Ipinatawag si Viktor para sa karagdagang interogasyon at dinala sa temporary detention center. Kinabukasan inilipat siya sa pretrial detention center
Marso 23, 2020

Pinalaya si Viktor at inilagay sa house arrest
Mayo 6, 2020

Pinalaya si Viktor mula sa house arrest at pinagbawalang umalis ng kanilang lugar
Oktubre 6, 2021

Inalis ang pagbabawal kay Viktor na magbiyahe
Marso 10, 2022

Nagsimula ang paglilitis

Profile

Anatoliy Gezik

Ipinanganak: 1967 (Nezlobnaya, Stavropol Territory)

Maikling Impormasyon: Habang nagtatrabaho sa isang juvenile correctional facility, naisip niya kung ano kaya ang magiging kinabukasan ng mga kabataan doon at kung ano ang layunin ng buhay. Nalaman ang mga sagot nang magpa-Bible study sa mga Saksi ni Jehova. Napangasawa si Irina noong 1997. Nabautismuhan noong 1998

Personal na mga Komento

Ano ang nagpatibay sa iyo sa panahong ito ng mga pagsubok?

Dahil lagi kong pinag-iisipan ang buhay sa bagong sanlibutan, alam ko na may layunin ang buhay. Lahat tayo ay maaaring makaranas ng mga pagsubok sa malapit na hinaharap, at iba-iba ang pagsubok natin. Para makayanan ito, kailangan nating isipin ang lahat ng bagay na ginawa na sa atin ni Jehova at ng kaniyang Anak. Sa lahat ng pagsubok, parang nakahawak sa akin si Jehova, at lagi siyang nariyan kapag kailangan ko siya.

Viktor Zimovskiy

Ipinanganak: 1969 (Georgievsk)

Maikling Impormasyon: Namatay ang mga magulang noong 13 taóng gulang siya

Nag-aral ng Bibliya nang ipakilala siya ng bayaw niya sa mga Saksi ni Jehova. Nagustuhan niya ang pag-asa ng pagkabuhay-muli. Nabautismuhan noong 2003

Napangasawa si Nadezhda noong 2006. Mayroon silang tatlong anak. Nang maaresto si Viktor, ipinagbubuntis ni Nadezhda ang ikatlo nilang anak

Personal na mga Komento

Paano mo nadama ang tulong ni Jehova habang nasa house arrest ka?

Habang nasa house arrest ako, hindi ako puwedeng gumamit ng telepono o Internet at pinagbawalan din akong umalis ng bahay. . . . Kaya hindi ako makapagtrabaho para sa pamilya ko. Siyam na buwang buntis ang asawa ko, at hindi man lang ako makabili sa groseri o bumili ng mga bagay na kailangan ng magiging anak naming babae. Pero tinulungan kami ng aming pamilya at mga kapuwa Saksi. Ginamit ni Jehova ang aming mga kapatid para ilaan ang lahat ng kailangan namin: pagkain, pananamit, pati na ang emosyonal na pangangailangan namin.

Habang nagtitiis sila nang may kagalakan at pag-asa, kumbinsido tayo na si Jehova ay mananatiling “malapit sa lahat ng tumatawag sa kaniya.”—Awit 145:18.

Magugustuhan Mo Rin

NEWS RELEASE

Nakabilanggo Dahil sa Kanilang Pananampalataya—Russia

Ibinibilanggo ang mga Saksi ni Jehova sa Russia dahil sa kanilang pananampalataya. Alamin ang kuwento nila, at kumuha ng listahan ng mga Saksing nakabilanggo.

NEWS RELEASE