Noong Marso 11, 1792, daan-daang pinalayang alipin mula sa Amerika ang nagtipon sa ilalim ng Cotton Tree para ipagdiwang ang kanilang repatriasyon sa Aprika. Itinatag nila nang araw na iyon ang isang pamayanan na kumakatawan sa kanilang pinakaaasam na pangarap—Freetown. Patuloy ang pagdating ng pinalayang mga alipin hanggang sa mahigit 100 grupo na ng mga Aprikano ang naninirahan sa pamayanan. Para sa mga bagong mamamayang ito, ang Cotton Tree ay kanilang simbolo ng kalayaan at pag-asa.

Sa loob ng halos 100 taon, inaaliw ng mga Saksi ni Jehova sa Sierra Leone ang kanilang kapuwa ng isang mas nakahihigit na kalayaan—ang “maluwalhating kalayaan ng mga anak ng Diyos.” (Roma 8:21) Ang kalayaang ito ay nangangahulugan ng pagpapalaya mula sa pagkaalipin sa kasalanan at kamatayan kapag naibalik na ng Mesiyanikong Kaharian ng Diyos ang kapayapaan at Paraiso sa lupa.—Isa. 9:6, 7; 11:6-9.

Sa nakalipas na 50 taon, pinangangasiwaan din ng tanggapang pansangay ng mga Saksi ni Jehova sa Sierra Leone ang gawaing pangangaral sa Guinea. Ang kalapít na bansang ito ay nakakaranas ng kaguluhan sa pulitika, lipunan, at ekonomiya kaya marami sa mamamayan nito ang tumatanggap sa mensahe ng Bibliya.

Ang mga Saksi ni Jehova sa Sierra Leone at Guinea ay naghahayag ng mabuting balita sa kabila ng maraming balakid. Kasama rito ang matinding kahirapan, mahigpit na panghahawakan sa mga tradisyon, etnikong pagkakabaha-bahagi, at kakila-kilabot na karahasan. Marami rin ang hindi marunong bumasa at sumulat. Pinatutunayan ng sumusunod na ulat ang di-natitinag na pananampalataya at debosyon ng mga tapat na lingkod na ito ni Jehova. Tiyak na ang kanilang kuwento ay aantig sa inyong puso at magpapatibay sa inyong pananampalataya sa “Diyos na nagbibigay ng pag-asa.”—Roma 15:13.