Mo Baebeleng, lefoko la Segerika le ka dinako tse dingwe le ranotsweng e le “kereke” le kaya setlhopha sa baobamedi e seng kago e ba kopanelang mo go yone.

 Ela tlhoko sekai seno: Fa moaposetoloi Paulo a ne a kwalela Bakeresete ba kwa Roma, o ne a romela ditumediso kwa banyalaning bangwe e bong Akhwila le Peresila a bo a re: “Dumedisang kereke e e kopanelang mo ntlong ya bone.” (Baroma 16:5, Contemporary English Version) Paulo o ne a sa reye gore go dumedisiwe kago. Go na le moo, o ne a dumedisa batho—phuthego e e neng e kopanela mo ntlong eo. a

 Ka jalo, go na le gore re re lefelo la rona la kobamelo ke kereke, re le bitsa “Holo ya Bogosi.”

 Polelwana eno e a tshwanela ka ntlha ya mabaka a le mmalwa:

•   Kago eo ke holo kgotsa lefelo le go kopanelwang mo go lone.

•   Re kopana mmogo go obamela Jehofa, Modimo yo go buiwang ka ene mo Baebeleng le go neela bosupi kgotsa go bua ka ene.—Pesalema 83:18; Isaia 43:12.

•   Gape re kopana mmogo go ithuta ka Bogosi jwa Modimo, jo Jesu a neng a bua ka jone gantsi.—Mathaio 6:9, 10; 24:14; Luke 4:43.

 O gololesegile go etela Holo ya Bogosi e e gaufi le fa o nnang gone mme o iponele kafa Basupi ba ga Jehofa ba tshwarang dipokano tsa bone ka teng.