MANILA, Philippines—Batho ba feta 1 000 ba sule mme ba feta 970 000 ba ntshitswe mo lefelong leno morago ga setsokotsane se se maatla se se sentseng kwa Philippines ka Labobedi, Sedimonthole 4, 2012. Kgwedi moragonyana, Basupi ba ga Jehofa ba ne ba ntse ba thusa batho ba ba amilweng ke kotsi eno ya masetlapelo ya Setsokotsane Bopha (se se bidiwang Pablo mo lefelong leno).

Ka Ferikgong 7, ofisi ya lekala ya Basupi ba ga Jehofa kwa Manila e ne ya bega gore ka maswabi setsokotsane se ne sa bolaya Basupi ba le batlhano. Mosupi yo mongwe o ne a isiwa bookelong fa a sena go gobala thata mo mokwatleng. Mo godimo ga moo, malapa a le 520 a Basupi a ne a fudusiwa mo lefelong leno ka gonne matlo a le 140 a ne a tšhwatlakantswe e bile a mangwe a le 400 a senyegile.

Baemedi ba ba tswang kwa ofising ya lekala ba ne ba etela mafelo a a amilweng ke setsokotsane go ya go bona gore se sentse go le kana kang, go rulaganya thuso ya namolo, go kgothatsa le go thusa bafalodi ka dilo tsa semoya. Basupi ba ne ba tlhoma komiti ya namolo ya nako ya masetlapelo gore e rulaganye mafelo a le supa a namolo le go thusa baithaopi ba mo lefelong leno go aba dilwana tsa namolo.

Mo dikarolong tse dingwe tsa naga eno, setsokotsane se gogotse dijo tse dintsi le dilo tse batho ba itshedisang ka tsone go akaretsa le masimo a raese, dipanana le ditlhare tsa khokhonate. Komiti ya Basupi ya namolo ya nako ya masetlapelo e ne ya romela diteraka tse di rweleng dijo tsa dikilogerama di feta 12 900 (di-pound di le 28 600). Le fa go ntse jalo, go ne go sa kgonege gore dilwana di goroge kwa karolong nngwe e e amilweng ke setsokotsane ka gonne leborogo le ne le gosomane.

Gape Setsokotsane Bopha se sentse matlo a kobamelo a le 15, a a bidiwang Diholo Tsa Bogosi e bile a mangwe a le 2 a phutlhame. Le fa go ntse jalo, bangwe ba batho ba ba fudusitsweng ka ntlha ya setsokotsane ba ne ba isiwa kwa Diholong Tsa Bogosi tse di sa senyegang gore ba nne teng ka nakwana. Dikomiti tsa namolo di dira ka natla go isa batho bao kwa matlong a a botoka.

Tiro yotlhe ya namolo e tshegediwa ka meneelo e e ntshiwang ke Basupi ba ga Jehofa ba mo lefelong leo le ba mo lefatsheng lotlhe. Setlhopha se se Laolang sa Basupi ba ga Jehofa se thusa ka go duelela ditshenyegelo tseo se dirisa meneelo e e ntshediwang tiro ya lefatshe lotlhe ya Basupi.

Mmueledi wa Basupi ba ga Jehofa kwa Philippines e bong Dean Jacek, o ne a re: “Rotlhe re utlwisiwa botlhoko ke go latlhegelwa ke ditsala tsa rona le baobamedi mmogo le rona e bile re hutsafadiwa ke tshenyo e setsokotsane se e bakileng. Mme re tla nna re dira se re ka se kgonang go thusa ka tiro ya namolo go akaretsa go kgothatsa baagelani ba rona le go ba thusa ka dilo tsa semoya.”

Media Contacts:

International: J. R. Brown, Office of Public Information, tel. +1 718 560 5000

Philippines: Dean Jacek, tel. +63 2 411 6090