Ka June 21, 2017, Kgotlatshekelo ya Kgaolo ya Oryol e ne ya gana go reetsa kopo ya boikuelo ya go tshwarwa ga ga Dennis Christensen. Rre Christensen, yo o tswang kwa Denmark o tshwerwe ka May 25, 2017, ka nako ya fa mapodise a ne a tlhasela phuthego ya Basupi ba ga Jehofa.

Kgotlatshekelo ya Makgaolakgang ya Russia e ne ya dira tshwetso bosheng jaana ya gore mekgatlho yotlhe ya Basupi ba ga Jehofa e tswalwe ka gonne gotwe e kotsi mo setšhabeng. Mapodise a a neng a tseneletse phuthego ya kwa Oryol ka May 25, a ne a bolelela Basupi ba ba neng ba le koo gore ba tla sekisediwa go tlola molao. Mapodise a ne a kopa kgotlatshekelo gore e ntshe taelo ya gore Rre Christensen a letele go seka a le mo kgolegelong go fitlha ka July 23, 2017. Rre Christensen ga a na rekoto epe ya go tlola molao gape ke motho yo o ratang kagiso, le fa go ntse jalo mapodise a leka go batla tshedimosetso e ba ka e dirisang go supa fa a le kotsi mo setšhabeng.

Basupi ba ga Jehofa ba ikuela kgatlhanong le tshwetso e dirilweng ke Kgotlatshekelo ya Makgaolakgang, e bile ba tlhatlhela kgetsi e e malebana le tshwanelo ya bone ya go obamela ka kgololesego, ba ikaegile ka Molaotheo wa Russia le Kgotlatshekelo ya Yuropa ya Ditshwanelo Tsa Batho.