NEW YORK—Ka June 2, 2017, badiredipuso ba toropo ya Oryol kwa Russia ba ile ba leboga maloko a phuthego ya Basupi ba ga Jehofa ka seabe se ba nnileng le sone mo letsholong la ngwaga le ngwaga la go phepafatsa toropo ka April 22, 2017. Basupi ba le 70 ba ile ba ithaopela go fetsa letsatsi lotlhe ba ntsha matlakala mo toropong ya Oryol le kwa Nokeng ya Orlik e e gaufi le toropo eo. Badiredipuso ba ile ba leboga Basupi ka go ba naya mpho le lekwalo le le balegang jaana: “Re leboga tiro e e molemo e lo e diretseng batho ba toropo eno le tikologo ya rona.”

Mongwe wa Basupi ba ba neng ba ithaopile e bong Dennis Christensen (yo o mo setshwantshong seno) o ne a tshwarwa ka nako ya fa a ne a le kwa dipokanong tsa Basupi ba ga Jehofa ka May 25. O ile a latofadiwa ka gore ke leloko la mokgatlho o o kotsi mo setšhabeng. Seno se ile sa direga kgwedi morago ga letsholo la go phepafatsa toropo ya Oryol le beke pele badiredipuso ba leboga Basupi ka seabe se ba nnileng le sone mo letsholong leo. Puso ya Russia e dirisa ditatofatso tseno tsa maaka go leka go thibela tiro ya Basupi ba ga Jehofa mo nageng eo.

Mmueledi wa Basupi ba ga Jehofa go tswa kwa ntlokgolong ya bone e bong David A. Semonian a re: “Batho ba ba itseng Basupi ba ga Jehofa ga ba makadiwe ke gore Dennis le maloko a mangwe a phuthego ba ile ba ithaopela go nna le seabe mo go phepafatseng toropo ya bone. Go fetile dingwagangwaga ba dira jalo e bile ba ntse ba tsweletse le morago ga gore mokgatlho wa bone wa semolao o tswalwe ka 2016. Basupi ba ga Jehofa mo lefatsheng lotlhe, go akaretsa le ba kwa Oryol, ba itsiwe e le batho ba ba ikobelang molao. Ke ka moo re maketseng tota fa re utlwa gore motho yo o ikobelang molao jaaka Dennis, o tshwerwe setlhogo jaaka e kete ke sekebekwa morago fela ga gore badiredipuso ba mo lebogele seabe se a nnileng le sone [mo go phepafatseng toropo]. Re dumela gore Dennis o tshwanetse go gololwa ka bonako, gore a tswelele a direla Modimo ka kgololesego le go dira mmogo le badumedi ka ene go thusa setšhaba.”

Christensen o ile a tshwarwa ngwaga morago ga gore mokgatlho wa semolao wa Basupi ba ga Jehofa kwa Oryol o tswalwe ka June 14, 2016. Mme dilo tse a latofadiwang ka tsone di tsamaisana le tshwetso ya April 20, 2017 ya Kgotlatshekelo ya Makgaolakgang ya Russia ya go tswala Ofisi ya Basupi ba ga Jehofa e e gaufi le St. Petersburg kwa Russia. Christensen o sa ntse a le mo kgolegelong ya Oryol a letetse go seka.

Babegadikgang ba ka Ikgolaganya le:

David A. Semonian wa Ofisi ya Tshedimosetso mo nomorong ya +1-845-524-3000