Nngwe ya dilo tse di utlwisang basha botlhoko ke fa batsadi ba bone ba tlhalana. Ke eng se se ka go thusang go itshoka?

Mo setlhogong seno

•  Dilo tse tharo tse o sa tshwanelang go di dira

•  Dilo tse tharo tse o ka di dirang

•  Se balekane ba gago ba se buang

 Dilo tse tharo tse o sa tshwanelang go di dira

 1. Go ipona molato

 “Mmê o kile a mpolelela gore mathata a gagwe le rre a simologile fa ke sena go tsholwa, ka jalo, ke ne ke ipolelela gore ke nna ke dirileng gore lenyalo la bone le thubege.”​—Diana.

 Se lebale seno: Batsadi ba gago ga ba tlhalane ka ntlha ya gago. Ba tlhalana ka gonne ba na le mathata mo lenyalong. Ga o a baka mathata a bone e bile o ka se a rarabolole. Ke bone ba nang le boikarabelo jwa go rarabolola mathata a bone a lenyalo.

 2. Go boloka sekgopi

 “Ke galefetse rre, ka gonne ga a ka a ikanyega mo go mmê. Go tlile go tsaya nako pele ke ka kgona go mo tshepa gape.”​—Rianna.

 Se lebale seno: O ka tswa o galefile e bile o utlwile botlhoko ka ntlha ya se se diragalang magareng ga batsadi ba gago, mme go a utlwala go bo o ikutlwa jalo. Le fa go ntse jalo, go boloka sekgopi ga go a siama. Go ka go utlwisa botlhoko mo mmeleng le mo maikutlong. Tota go boloka sekgopi go tshwana fela le go ja botlhole o bo o solofela gore motho yo mongwe a lwale. a

 3. Go belaela gore o tla nna le lenyalo le le itumetseng

 “Ke tshaba gore le nna ke tla dira se rre a ileng a se dira. Fa ke nyalwa ke bo ke nna le bana, ke tshaba gore ke tla dira selo se se dirileng gore batsadi ba me ba tlhalane.”​—Jessica.

 Se lebale seno: Fa lenyalo la batsadi ba gago le sa atlega, ga go reye gore le la gago le ka se atlege. Tota e bile, o ka ithuta mo go se se diragaletseng batsadi ba gago. Ka sekai, se se diragaletseng batsadi ba gago se ka go thusa go itse gore o batla go nyalana le motho yo o ntseng jang. Gape se ka go thusa go nna le dinonofo tse di tla dirang gore o nne monna kgotsa mosadi yo o molemo mo lenyalong.

 Dilo tse tharo tse o ka di dirang

 1. Bua le ba bangwe. Batho ba ba sa bueng ka dilo tse di ba tshwenyang gantsi ba feleletsa ba dira dilo tse di ka ba utlwisang botlhoko, tse di jaaka go nwa bojalwa ka tsela e e feteletseng kgotsa go dirisa diokobatsi. Go na le go dira dilo tseno, leka tse di latelang:

 Bua le batsadi ba gago. Fa e le gore batsadi ba gago ba bua thata le wena ka mathata a lenyalo la bone, ba bolelele gore seno se go ama jang, mme o dire jalo o ritibetse mo maikutlong e bile o tiisitse. Fa go le thata go bua le bone, o ka ba kwalela lekwalo.

 Bua le tsala e o e tshepang. Go nna le mongwe yo o ka go reetsang go tla go thusa fela thata. Baebele e a re, “tsala ya boammaaruri e lorato ka dinako tsotlhe.”​—Diane 17:17.

 Bua le Mmopi wa gago. Jehofa Modimo ke “Moutlwi wa thapelo,” ka metlha o ikemiseditse go go reetsa. (Pesalema 65:2) Baebele e a re o ka ‘latlhela ditlhobaelo tsotlhe tsa gago mo go ene, ka gonne o a go kgathalela.’​—1 Petere 5:7.

•   Ke motsadi ofe yo o ka buang le ene o ritibetse mo maikutlong?

•   Ke tsala efe e o e tshepang (tsala eo e ka tswa e lekana le wena kgotsa e go feta ka dingwaga) e e tla nnang karolo ya batho ba ba tla go emang nokeng?

•   Ke dilo dife tse di go tshwenyang tse o ka di rapelelang?

 2. Amogela diphetogo

 Fa batsadi ba gago ba tlhalana o ka tlhoka go tlwaela legae le lesha, sekolo se sesha, ditsala tse disha gape maemo a lona a tsa madi a ka fetoga. Go a utlwala go bo o ikutlwa e kete botshelo jwa gago bo tlhakatlhakane ka gonne boammaaruri ke gore, dilo tseno di ka go kgoba marapo gape di ka go tsenya seterese. Ke eng se se ka go thusang go amogela diphetogo? Leka go tlhoma mogopolo mo dilong tse di ka go thusang go amogela maemo a gago a masha.

•   Ke phetogo efe e e kgolo e o ileng wa tshwanela ke go e dira ka ntlha ya go tlhalana ga batsadi ba gago?

•   Ke eng se se tla go thusang go amogela phetogo eo?

 3. Lemoga dinonofo tse dintle tse o nang le tsone

 Le fa gone go tlhalana ga batsadi ba gago go ka dira gore o tlhobaele, go ka go thusa go lemoga dinonofo tse dintle tse o nang le tsone. Tota e bile go ka go thusa go nna le dinonofo tse disha. Jeremy yo batsadi ba gagwe ba ileng ba tlhalana fa a na le dingwaga di le 13 a re, “tlhalo ya batsadi ba me e ne ya mpateletsa go nna motho yo o nang le maikarabelo. E re ka e le nna yo mogolo, ke ne ke thusa mmê le nnake.”

•   Morago ga tlhalo ya batsadi ba gago, o ile wa lemoga gore o na le dinonofo dife tse dintle?

•   Ke mekgwa efe e o batlang go berekela mo go yone?