Go nna maitseo go ka tokafatsa dikarolo tse tharo tse di latelang tsa botshelo jwa gago:

1.   Tsela e o itsegeng ka yone. Tsela e o tshwarang batho ka yone e ka dira gore ba go lebe ka tsela nngwe, e e siameng kgotsa e e sa siamang. Fa o le maitseo, go ka direga gore batho ba go tseye o godile e bile o na le maikarabelo​—mme ba tla go tshwara jaaka motho yo o ntseng jalo! Mme fa o se na maitseo batho ba tla akanya gore o amega fela ka wena mme o ka feleletsa o fetwa ke ditshono tsa go bona tiro le tse dingwe. Jaaka Baebele e bua, “motho yo o setlhogo o tlisetsa mmele wa gagwe matlhabisa ditlhong.”​—Diane 11:17.

2.   Ditsala tsa gago. Baebele ya re: “Aparang lorato, gonne ke sebofo se se itekanetseng sa kutlwano.” (Bakolosa 3:14) Go ntse jalo segolobogolo fa go tliwa mo kgannyeng ya botsala. Batho ba kgatlhegela batho ba ba nang le maitseo e bile ba ba tshwara sentle. Aitsane, ke mang yo o ka ratang go fetsa nako le motho yo o se nang maitseo kgotsa yo o leferetlho?

3.   Kafa batho ba go tshwarang ka teng. Lekgarebe lengwe le le bidiwang Jennifer la re: “Fa o nna o le maitseo, fa nako e ntse e ya, o ka lemoga gore tota le batho ba ba itsegeng ka go bifela ba bangwe, ba go tshwara botoka.” Gone ke boammaaruri gore fa o se na maitseo, ba ka se dire jalo. Baebele ya re: “Selekanyo se lo lekanyang ka sone, ba tla lo lekanyetsa ka sone.”​—Mathaio 7:2.

 Sa botlhokwa: Re dirisana le batho letsatsi le letsatsi. Tsela e o dirisanang le bone ka yone e ka ama tsela e ba go lebang ka yone le e ba go tshwarang ka yone. Tota re ka re, ruri go botlhokwa go nna maitseo!

1.   Tlhola maitseo a gago. Ipotse dipotso tse di jaaka: ‘A ke bua le bagolo ka maitseo? Ke itlwaeditse go le kana kang go re “tsweetswee,” “ke a leboga,” kgotsa “tshwarelo”? A ga ke tlhome mogopolo fa ke bua le batho ba bangwe​—gongwe e bile ke bala le go araba melaetsa ya founo? A ke tlotla batsadi ba me le bana ba kwa gae, kgotsa ke dira dilo ka go tlhoka maitseo fela, ke ipolelela gore “ke ba mo lapeng”?’

    Baebele ya re: “Mo go bontshaneng tlotlo etelelang pele.”​—Baroma 12:10.

2.   Ipeele mekgele. Kwala dilo tse tharo tse o ka tokafatsang mo go tsone. Ka sekai, Allison wa dingwaga tse 15 a re o tlhoka go nna “motho yo o itseng go reetsa go na le go nna motho yo o itseng go bua.” David wa dingwaga tse 19 a re o tlhoka go lwela go tlogela go kwala melaetsa ka founo fa a na le ba lelapa kgotsa ditsala. A re: “Ke go tlhoka tlotlo. Tota go nna jaaka e kete ka re go botoka go tlotla le motho yo mongwe go na le go tlotla le bone.” Edward wa dingwaga tse 17 a re o tlhoka go tlogela go tsena ba bangwe ganong fa ba bua. Mme Jennifer yo o nopotsweng pelenyana a re o ikaeletse go tokafatsa tsela e a bontshang maitseo ka yone fa a dirisana le bagolo. A re: “Nkile ka bo ke re ‘dumelang’ ka bonako fela ke bo ke batla tsela ya gore ke fetele kwa ditsaleng tsa me tsa basha. Mme jaanong ke tsaya matsapa tota gore ke ba itse botoka. Seo se nthusitse go tokafatsa maitseo a me fela thata!”

    Baebele ya re: “Lo [tlhokomele], e seng go kgatlhegela dilo tse di amang lona fela, mme gape go kgatlhegela le dilo tse di amang ba bangwe.”​—Bafilipi 2:4.

3.   Ela tlhoko kgatelopele ya gago. Tsaya lobaka lwa kgwedi o ela tlhoko tsela e o buang ka yone kgotsa gore o gatela pele jang mo dilong tse o batlang go tokafatsa mo go tsone. Fa kgwedi e fela, ipotse jaana: ‘Go nna maitseo go nthusitse jang go tokafatsa botho jwa me? Ke sa ntse ke tlhoka go tokafatsa fa kae?’ Ipeele mekgele e mengwe e e tla go thusang go dira jalo.

    Baebele ya re: “Fela jaaka lo batla batho ba lo direla, ba direleng ka yone tsela eo.”​—Luke 6:31.