Se se mo setlhogong seno

•  Goreng o tshwanetse go bua le motho lo lebane mo matlhong?

•  O ka simolola jang motlotlo?

•  Se balekane ba gago ba se buang

 Batho bangwe ba re go buisana ba lebane mo matlhong go thata e bile go tsenya seterese go na le go romela melaetsa.

 “Go thata go buisana lo lebane difatlhego ka gonne go farologana le go romela molaetsa, ga o kgone go baakanya se o se buang kgotsa go se sutlha.”​—Anna.

 “Fa o kwalela mongwe molaetsa, o akanya sentle ka se o tla se kwalang mme fa o bua le ene lo lebane difatlhego, ga o ka ke wa fetola se a setseng a se utlwile. Fa ke bua le mongwe re lebane difatlhego ke nna ke tshwenyegile ka gore ke se ka ka bua sepe se se phoso!”​—Jean.

 Boammaaruri ke gore o tlile go tlhoka go ithuta go bua le batho lo lebane difatlhego. Ka sekai, o tlile go tlhoka go dira jalo fa o dira ditsala tse disha, fa o batla tiro kgotsa fa o batla go simolola go ikentsha le mongwe, fa o setse o siametse go dira jalo.

 Ga o tlhoke go tshaba go bua le motho lo lebane mo matlhong. O ka ithuta go dira jalo tota le fa o le ditlhong.

 “Ka dinako dingwe rotlhe re a tle re bue sengwe se se phoso se se re tlhabisang ditlhong. O se ka wa solofela gore o tla bua dilo tse di siameng ka metlha.”​—Neal.

•   Botsa dipotso. Akanya ka sengwe se se ka kgatlhang batho mme o bo o simolola motlotlo ka sone. Ka sekai:

   “O ne o etetse kae ka malatsi a boikhutso?”

   “Websaete eno e a kgatlha. A o kile wa e bona?”

   “A o utlwile ka . . . ?”

   Gongwe lo ka tlotla ka sengwe se bobedi jwa lona lo se kgatlhegelang kgotsa se lo itumelelang go se dira. Ka sekai, gongwe lo tsena sekolo mmogo kgotsa lo badiri mmogo. Gongwe o ka botsa dipotso ka dilo tseno.

   “Akanya ka dipotso tse di kgatlhang le tse o ka ratang go utlwa dikarabo tsa tsone.”​—Maritza.

   Nna kelotlhoko: O se ka wa botsa dipotso tse dintsi tse di tla dirang gore batho ba ikutlwe ba sa phuthologa le tse di ka ba tlhabisang ditlhong. Dipotso di tshwana le, “Ke eng se o se tshabang thata?” kgotsa “Goreng o nna o apara diaparo tsa mmala o o blue?” di ka dira gore motho a ikutlwe a sa phuthologa. Potso ya bobedi e ka utlwala e kete o ba tshwayatshwaya diphoso.

   Sengwe gape se se ka go thusang ke go bolelela motho maikutlo a gago ka kgang e lo tlotlang ka yone pele ene a ka go bolelela maikutlo a gagwe. Fa o dira jalo, o tla itumelela motlotlo go na le gore lo nne le potsolotso.

   Molaomotheo wa Baebele: “Kgakololo mo pelong ya monna e ntse jaaka metsi a a boteng, motho yo o tlhaloganyo o tle a e ge fela.”​—Diane 20:5, Baebele e e Boitshepo.

•   Nna moreetsi yo molemo. Fa o batla go atlega mo go nneng le motlotlo o o molemo, go na le go bua thata nna moreetsi yo o molemo.

   “Fa ke tlotla le mongwe ke leka go ithuta sengwe se sesha ka ene. Morago ke leka go gopola se motho yoo a mpoleletseng sone, e le gore ke tle ke kgone go akanya ka dipotso tse ke tla mmotsang tsone fa re tlotla mo nakong e e tlang.”​—Tamara.

   Nna kelotlhoko: O se ka wa tshwenyega ka se o tla se buang. Fa o reetsa ka kelotlhoko, o tla kgona go tsweletsa motlotlo ka kgang e motho yoo a buang ka yone.

   Molaomotheo wa Baebele: “Nna bonako go utlwa, bonya go bua.”​—Jakobe 1:19.

•    Bontsha batho gore o a ba kgatlhegela. O tla itumelela motlotlo fela thata fa o kgathalela motho yo o buang le ene.

   “Fa motho yo o buang le ene a bona gore o a mo kgathalela, motlotlo wa lona o tla nna monate tota le fa ka dinako dingwe lo ka felelwa ke se lo ka buang ka sone.”​—Marie.

   Nna kelotlhoko: O se ka wa botsa ka dilo tse di sa go ameng. O se ka wa re, “Jase ya gago e ntle jang! O e rekile bokae?” ka gonne seo se ka kgopisa motho yo o buang le ene.

   Molaomotheo wa Baebele: “Tswelelang lo amega ka batho ba bangwe, mme lo se ka lwa tshwenyega ka dilo tse di amang lona fela.”​—Bafilipi 2:4.

 O ka konela motlotlo jang? Mosha mongwe yo o bidiwang Jordan a re, “leka go konela motlotlo ka tsela e e siameng. O ka nna wa re ‘ke itumeletse go tlotla le wena.’ Kgotsa ‘o itumelele letsatsi la gago’ seo se tla dira gore go nne motlhofo go tlotla le ene mo nakong e e tlang.”