Melao e e Lesome ke melao e Modimo a ileng a e naya Baiseraele ba bogologolo. Gape melao eno ka Sehebera e bidiwa ʽaseʹreth had·deva·rimʹ e e kayang Mafoko a a Lesome. Mafoko ano a tlhagelela gararo mo Torah e leng dibuka tsa ntlha tse tlhano tsa Baebele. (Ekes. 34:28; Dute. 4:13; 10:4) Ka Segerika melao eno e bidiwa deʹka (lesome) loʹgous (mafoko) kana Mafoko a a Lesome.

 Modimo o ile a kwala Melao e e Lesome mo matlapeng a le mabedi a bo a a naya moporofeti Moshe mo Thabeng ya Sinai. (Ekesodo 24:12-18) Melao eno e mo go Ekesodo 20:1-17 le Duteronome 5:6-21.

•  Lenaane la Melao e e Lesome

•  Goreng lenaane leno le kwadilwe ka ditsela tse di sa tshwaneng?

•  Boikaelelo jwa Melao e e Lesome e ne e le eng?

•  A Bakeresete ba tshwanetse go boloka Melao e e Lesome?

•  A Melao e e Lesome e sa ntse e ka thusa le gompieno?

•  Melaometheo e e mo Tesetamenteng e Ntšha e theilwe mo Melaong e e Lesome

1.   Obamela Jehofa Modimo fela.​—Ekesodo 20:3.

2.   O se ka wa obamela medingwana.​—Ekesodo 20:4-6.

3.   O se ka wa dirisa leina la Modimo ka tsela e e sa siamang.​—Ekesodo 20:7.

4.   O boloke Sabata.​—Ekesodo 20:8-11.

5.   Tlotla batsadi ba gago.​—Ekesodo 20:12.

6.   O se ka wa bolaya motho.​—Ekesodo 20:13.

7.   O se ka wa dira boaka.​—Ekesodo 20:14.

8.   O se ka wa utswa.​—Ekesodo 20:15.

9.   O se ka wa nna mosupi wa maaka.​—Ekesodo 20:16.

10.   O se ka wa eletsa dilo tsa yo mongwe.​—Ekesodo 20:17.

 Ga go na gope mo Baebele e reng molao o o rileng ke wa ntlha kgotsa ke wa bosupa. Seno se dirile gore batho ba kwale lenaane leno ka ditsela tse di farologaneng. Lenaane le le fa godimo ke le le tlwaelegileng mo bathong ba le bantsi. Mme ba bangwe ba le kwala ka tsela e sele. Molao o ba sa dumalaneng ka one ke wa ntlha, wa bobedi le wa bofelo, ga ba itse gore ke ofe o o tshwanetseng wa wela kae. a

 Melao e e Lesome ke karolo ya melao e Jehofa a ileng a e naya Moshe. Mme go ne go na le melao e mengwe e e fetang 600 e Jehofa a ileng a e naya Moshe fa a dira kgolagano le Baiseraele ba bogologolo. (Ekesodo 34:27) Modimo o ile a solofetsa Baiseraele gore ba ne ba tla atlega fa ba ka ikobela melao eo. (Duteronome 28:1-14) Mme boikaelelobogolo jwa melao eo e ne e le go thusa Baiseraele gore ba ipaakanyetse go tla ga ga Keresete.​—Bagalatia 3:24.

 Nyaa. Melao eo yotlhe, go akaretsa le Melao e e Lesome, e ne e neilwe Baiseraele ba bogologolo fela. (Duteronome 5:2, 3; Pesalema 147:19, 20) Bakeresete ga ba patelediwe go tshela ka melao e Modimo a ileng a e naya Moshe, tota e bile Bakeresete ba Bajuda ba ne ba “golotswe mo Molaong” oo. (Baroma 7:6) b Molao oo o ile wa emisediwa ka “molao wa ga Keresete,” o o nang le ditaelo tsotlhe tse Jesu a di laetseng balatedi ba gagwe.​—Bagalatia 6:2; Mathaio 28:19, 20.

 Ee. Go ithuta Melao e e Lesome go ka re thusa go tlhaloganya tsela e Jehofa a akanyang ka yone. (2 Timotheo 3:16, 17) Melao e e Lesome e theilwe mo melaometheong e e sa felelweng ke nako. (Pesalema 111:7, 8) Tota e bile bontsi jwa dilo tse re di ithutang mo Tesetamenteng e Ntšha di tswa mo Melaong e e Lesome.​—Leba setlhogwana se se reng “ Melaometheo e e mo Tesetamenteng e Ntšha e theilwe mo Melaong e e Lesome.”

 Jesu o ile a ruta batho gore melao e Modimo a ileng a e naya Moshe, go akaretsa le Melao e e Lesome, e ne e theilwe mo ditaelong tse pedi tsa botlhokwa. O ile a re: “‘O rate Jehofa Modimo wa gago ka pelo yotlhe ya gago le ka moya otlhe wa gago le ka mogopolo otlhe wa gago.’ Eno ke taelo e kgolo thata e bile e le ya ntlha. Ya bobedi, e e tshwanang le yone, ke eno, ‘O rate moagelani wa gago jaaka o ithata.’ Molao otlhe le Baporofeti, di ikaegile ka ditaelo tse pedi tseno.” (Mathaio 22:34-40) Le fa Bakeresete ba sa patelesege go ikobela melao e Modimo a ileng a e naya Moshe, ba tshwanetse go rata Modimo le batho ba bangwe.​—Johane 13:34; 1 Johane 4:20, 21.