Samuele wa Ntlha 4:1-22
4 Mme lefoko la ga Samuele le ne la ya kwa Baiseraeleng botlhe.
Go tswa foo, Baiseraele ba ne ba ya go kgatlhantsha Bafilisitia gore ba tlhabane le bone; ba ne ba kampa fa thoko ga Ebenesere, mme Bafilisitia bone ba kampa kwa Afeke.
2 Bafilisitia ba ne ba tlhomagana go ya ka thulaganyo ya ntwa ba ya go kgatlhantsha Baiseraele, le fa go ntse jalo, tlhabano e ne ya nna maswe mme Baiseraele ba ne ba fenngwa ke Bafilisitia, ba ba neng ba kgemetha banna ba ka nna 4 000 ka nako ya tlhabano kwa nageng.
3 E rile batho ba boela kwa kampeng, bagolwane ba Iseraele ba ne ba re: “Goreng Jehofa a letlile gore re fenngwe* ke Bafilisitia gompieno?+ A re yeng go tsaya letlole la kgolagano ya ga Jehofa kwa Shilo+ re tle le lone, gore le nne le rona mme le re boloke mo seatleng sa baba ba rona.”
4 Ka jalo, batho ba ne ba roma banna kwa Shilo mme ba ya go tsaya letlole la kgolagano ya ga Jehofa wa masomosomo, yo o ntseng fa godimo ga* ditšheruba.+ Bomorwa Eli ba babedi, e bong Hofeni le Finease,+ le bone ba ne ba le koo le letlole la kgolagano ya Modimo wa boammaaruri.
5 Fela fa letlole la kgolagano ya ga Jehofa le goroga mo kampeng, Baiseraele botlhe ba ne ba goela kwa godimo, mo lefatshe le neng la roroma.
6 Fa Bafilisitia ba utlwa modumo o mogolo, ba ne ba re: “Goreng go utlwala modumo o mogolo jaana mo kampeng ya Bahebera?” La bofelo ba ne ba lemoga gore Letlole la ga Jehofa le ne le tlile mo kampeng.
7 Bafilisitia ba ne ba boifa, ka gonne ba ne ba re: “Modimo o tlile mo kampeng!”+ Ka jalo, ba ne ba re: “Ruri re mo mathateng, ka gonne ga go ise go ke go direge selo se se tshwanang le seno!
8 Ruri re mo mathateng! Ke mang yo o tla re gololang mo seatleng sa Modimo yono yo mogolo? Yono ke ene Modimo yo o neng a otlhaya Egepeto ka dipetso tse di farologaneng kwa nageng.+
9 Nnang pelokgale jaaka banna, lona Bafilisitia, gore lo se ka lwa direla Bahebera fela jaaka ba ne ba lo direla.+ Nnang pelokgale jaaka banna mme lo tlhabane!”
10 Ka jalo, Bafilisitia ba ne ba tlhabana le Baiseraele mme Baiseraele ba ne ba fenngwa,+ mongwe le mongwe a tshabela kwa tenteng ya gagwe. Ba ne ba bolawa ba le bantsi thata; mo letlhakoreng la Baiseraele go ne ga wa masole a a tsamayang ka dinao a le 30 000.
11 Mo godimo ga moo, Letlole la Modimo le ne la gapiwa, mme bomorwa Eli ba babedi, e bong Hofeni le Finease, ba ne ba swa.+
12 Monna mongwe wa Benjamine o ne a siana a tswa mo tlhabanong mme o ne a goroga kwa Shilo mo go lone letsatsi leo diaparo tsa gagwe di gagogantswe e bile a le lerole mo tlhogong.+
13 Fa monna yoo a goroga, Eli o ne a ntse mo setulong fa thoko ga tsela a letile, ka gonne pelo ya gagwe e ne e roroma ka ntlha ya Letlole la Modimo wa boammaaruri.+ Monna yoo o ne a tsena mo motseng a ya go bega dikgang, mme motse otlhe o ne wa simolola go goa o lela.
14 E rile Eli a utlwa modumo wa go goa, a botsa jaana: “Modumo ono wa pheretlhego o kaya eng?” Ene monna yono o ne a itlhaganela mme a begela Eli dikgang tseno.
15 (Jaanong Eli o ne a na le dingwaga di le 98, mme matlho a gagwe a ne a sa tshikinyege e bile o ne a sa kgone go bona.)+
16 Go tswa foo, monna yono o ne a raya Eli a re: “Ke nna yo ke tswang kwa tlhabanong! Ke tshabile kwa ntweng gompieno.” Foo o ne a mmotsa jaana: “Go diragetse eng, morwaaka?”
17 Ka jalo, mmegi wa dikgang o ne a bega jaana: “Baiseraele ba tshabile Bafilisitia, mme batho ba fentswe mo go botlhoko;+ gape bomorwao ba babedi, Hofeni le Finease, ba sule+ e bile Letlole la Modimo wa boammaaruri le lone le gapilwe.”+
18 Ka nako ya fa a umaka Letlole la Modimo wa boammaaruri, Eli o ne a wela kwa morago go tswa mo setulong fa thoko ga kgoro ya motse, mme molala wa gagwe o ne wa robega a bo a swa ka gonne o ne a tsofetse e bile a le bokete. O ne a atlhotse Iseraele dingwaga di le 40.
19 Ngwetsi ya gagwe, mosadi wa ga Finease, o ne a le moimana e bile a le gaufi le go belega. Fa a utlwa pego ya gore Letlole la Modimo wa boammaaruri le ne le gapilwe le gore ratsalaagwe le monna wa gagwe ba sule, o ne a obega mme ka tshoganyetso a nna mo ditlhabing a bo a belega.
20 Fa a tloga a swa, basadi ba ba neng ba eme fa go ene ba ne ba re: “O se ka wa boifa, ka gonne o tshotse ngwana wa mosimane.” Ga a ka a araba e bile ga a ka a reetsa seno ka kelotlhoko.*
21 Le fa go ntse jalo, o ne a bitsa mosimane Ikabode,*+ a re: “Kgalalelo e dule mo Iseraele e ile botshwarwa,”+ a bua ka go gapiwa ga Letlole la Modimo wa boammaaruri le ka ga se se diragaletseng ratsalaagwe le monna wa gagwe.+
22 O ne a re: “Kgalalelo e dule mo Iseraele e ile botshwarwa, ka gonne Letlole la Modimo wa boammaaruri le gapilwe.”+
Dintlha Tse di Kwa Tlase
^ Seheb., “Goreng Jehofa a re fentse?”
^ Kgotsa gongwe “fa gare ga.”
^ Kgotsa “e bile ga a ka a baya pelo ya gagwe mo go seno.”
^ Mo go kayang “Kgalalelo e Kae?”
