Timotheo wa Ntlha 5:1-25
5 O se ka wa tshwaya monna yo o godileng phoso mo go botlhoko.+ Go na le moo, mo gakolole jaaka e kete o gakolola rrago, mme o tseye makawana jaaka bomogoloo le bomonnao,
2 basadi ba ba godileng jaaka bommago, makgarebana jaaka bokgaitsadio, mme o itshware sentle fa o dirisana le bone.
3 Tlotla* batlholagadi ba tota e leng batlholagadi.*+
4 Mme fa motlholagadi mongwe a na le bana kgotsa ditlogolwana, a ba ithute pele go bontsha gore ba boifa Modimo ka go tlhokomela ba malapa a bone+ le ka go duela batsadi ba bone le batsadi ba batsadi se se ba tshwanetseng,+ ka gonne Modimo o amogela seno.+
5 Jaanong mosadi yo tota e leng motlholagadi e bile a se na sepe, o tshepa Modimo+ mme o tswelela a mo rapela ka tlhoafalo e bile a kopa thuso mo go ene bosigo le motshegare.+
6 Mme motlholagadi yo o ineelelang go kgotsofatsa mmele wa gagwe, o sule le fa gone a tshela.
7 Ka jalo, tswelela o ba naya ditaelo tseno, gore go se ka ga nna le sepe se ba tshwaiwang phoso ka sone.
8 Eleruri fa motho a sa tlamele ba a nang le maikarabelo a go ba tlhokomela, mme segolobogolo maloko a lelapa la gagwe, o itatotse tumelo e bile o bosula go gaisa motho yo o sa dumeleng mo Modimong.+
9 A motlholagadi yo o setseng a na le dingwaga tse di fetang 60 a kwalwe mo lenaaneng la ba ba tlhokang go thusiwa. Mosadi yoo o tshwanetse a bo a ne a ikanyega mo monneng wa gagwe,*
10 a itsiwe ka ditiro tse di molemo,+ a godisitse bana sentle,+ a ne a amogela baeng,+ a tlhapisa dinao tsa ba ba boitshepo,+ a thusa ba ba neng ba wetswe ke mathata,+ a dira tiro nngwe le nngwe e e molemo ka tlhoafalo.
11 Ka fa letlhakoreng le lengwe, o se ka wa tsenya batlholagadi ba babotlana mo lenaaneng, ka gonne fa dikeletso tsa bone tsa tlhakanelodikobo di ba kgoreletsa go direla Keresete, ba batla go nyalwa.
12 Ba tla atlholwa ka gonne ba sa dira se ba se solofeditseng.*
13 Mo godimo ga moo, ba nna le mokgwa wa go sa dire sepe, ba tsamaya ntlo le ntlo; ba sa dire sepe mme ba seba e bile ba itshunya nko mo dikgannyeng tsa batho ba bangwe,+ ba bua ka dilo tse ba sa tshwanelang go di bua.
14 Ka jalo, ke eletsa gore batlholagadi ba babotlana ba nyalwe,+ ba tshole bana,+ ba tlhokomele ba malapa a bone, gore moganetsi a se ka a nna le tshono ya go re tshwaya phoso.
15 Tota e bile, bangwe ba setse ba tlogetse boammaaruri mme ba latela Satane.
16 Fa mosadi wa Mokeresete a na le ba masika ba e leng batlholagadi, a a ba thuse gore phuthego e se ka ya imelwa. Foo e tla kgona go thusa ba tota e leng batlholagadi.*+
17 Bagolwane ba ba etelelang phuthego pele ka tsela e e molemo+ ba tshwanetse go tlotliwa thata,+ segolobogolo ba ba dirang ka natla go bua le go ruta lefoko la Modimo.+
18 Gonne lokwalo lwa re, “Ga o a tshwanela go bofa poo molomo fa e photha dijo tsa ditlhaka,”+ gape lwa re, “Modiri o tshwanetse go duelwa.”+
19 O se ka wa reetsa fa monna yo o godileng* a latofadiwa mme go se na basupi ba babedi kgotsa ba bararo.+
20 Ba ba dirang boleo o ba kgalemele fa pele ga batho botlhe,+ gore o tlhagise ba bangwe.*
21 Ke go laya ka tlhoafalo fa pele ga Modimo le Keresete Jesu le baengele ba ba tlhophilweng gore o ikobele ditaelo tseno o sa tlhaole e bile o sa tseye letlhakore.+
22 O se ka wa itlhaganelela go baya motho ope diatla;*+ le gone o se ka wa tlhakanela le ba bangwe mo maleong a bone; nna o le phepa mo boitsholong.
23 O se ka wa tlhola o nwa metsi,* mme o nwe beine e nnye gore e thuse mala a gago le ka gonne o lwala kgapetsakgapetsa.
24 Maleo a batho bangwe a itsiwe ke batho botlhe, mme seno se dira gore ba atlholwe ka bonako, le fa go ntse jalo, maleo a batho ba bangwe one a bonala moragonyana.+
25 Ka tsela e e tshwanang, ditiro tse di molemo di itsiwe ke batho botlhe+ mme le fa di sa itsege, di ka se nne di fitlhegile.+
Dintlha Tse di Kwa Tlase
^ Kgotsa “Tlhokomela.”
^ Kgotsa “batlholagadi ba tota ba tlhokang”; go tewa ba go se nang ope yo o ba tlhokomelang.
^ Seger., “mosadi wa monna a le mongwe.”
^ Seger., “ba tlogetse tumelo ya bone ya pele.”
^ Kgotsa “batlholagadi ba tota ba tlhokang”; go tewa ba go se nang ope yo o ba tlhokomelang.
^ Kgotsa “mogolwane.”
^ Seger., “gore ba bangwe ba tle ba nne le poifo.”
^ Go tewa gore o se ka wa itlhaganelela go tlhoma motho ope.
^ Kgotsa “Tlogela go nwa metsi fela.”
