Dikgosi wa Bobedi 21:1-26
21 Manase+ o ne a na le dingwaga di le 12 fa a nna kgosi, mme o ne a busa dingwaga di le 55 mo Jerusalema.+ Leina la ga mmaagwe e ne e le Hefesiba.
2 Manase o ne a dira se se bosula mo matlhong a ga Jehofa, a dira ditiro tse di makgapha tsa ditšhaba+ tse Jehofa a neng a di lelekile fa pele ga batho ba Iseraele.+
3 O ne a aga sesha mafelo a a kwa godimo a a boitshepo a rraagwe e bong Hesekia a neng a a sentse,+ mme o ne a tlhomela Baale dibeso a bo a dira kota e e boitshepo,*+ fela jaaka Ahabe kgosi ya Iseraele a ne a dirile.+ Mme o ne a ikobela lesomo lotlhe la magodimo le go le direla.+
4 Gape o ne a aga dibeso mo ntlong ya ga Jehofa,+ e Jehofa a neng a buile jaana ka yone: “Ke tla baya leina la me mo Jerusalema.”+
5 Mme o ne a agela lesomo lotlhe la magodimo dibeso+ mo malwapeng a mabedi a ntlo ya ga Jehofa.+
6 Gape o ne a fisa morwawe mo molelong;* o ne a dira maselamose,+ a batla ditshupo a bo a tlhoma batho ba ba dirisanang le badimo le ba ba bolelelang ditiragalo pele.+ O ne a dira se se bosula mo matlhong a ga Jehofa ka selekanyo se segolo, gore a mo kgopise.
7 O ne a tsaya setshwantsho se se betlilweng sa kota e e boitshepo*+ se a neng a se dirile a bo a se baya mo ntlong e Jehofa a neng a reile Dafide le morwawe e bong Solomone ka yone a re: “Ke tla baya leina la me ka bosakhutleng mo ntlong eno le mo Jerusalema, e leng motse o ke o tlhophileng mo ditsong tsotlhe tsa Iseraele.+
8 Mme ga nkitla ke tlhola ke dira gore dinao tsa Baiseraele di kgarakgatshege di tswe mo lefatsheng le ke neng ka le naya borraabonemogolo+ fa fela ba ka ikobela sotlhe se ke se ba laetseng,+ e leng Molao otlhe o motlhanka wa me Moshe a ba laetseng gore ba o latele.”
9 Le fa go ntse jalo, ga ba a ka ba ikoba, mme Manase o ne a nna a ba faposa, a dira gore ba dire bosula jo bogolo go feta ditšhaba tse Jehofa a neng a di nyeleditse fa pele ga Baiseraele.+
10 Jehofa o ne a nna a bua ka batlhanka ba gagwe e bong baporofeti,+ a re:
11 “Manase kgosi ya Juda o dirile dilo tseno tsotlhe tse di makgapha; o ne a dira bosula jo bogolo go gaisa Baamore+ ba ba neng ba le teng pele ga gagwe,+ mme o ne a leofisa Juda ka medingwana ya gagwe e e ferosang sebete.*
12 Ka jalo, seno ke se Jehofa, Modimo wa Iseraele a se buang: ‘Bona, ke tlisa masetlapelo a magolo mo Jerusalema+ le Juda, a a tla dirang gore motho ope fela yo o utlwang ka one ditsebe tsa gagwe tsoopedi di babe.+
13 Mme ke tla namalatsa mogala o o lekanyang+ mo Jerusalema o o dirisitsweng kwa Samarea+ ke bo ke dirisa sedirisiwa se se tlhamalatsang* se se dirisitsweng mo ntlong ya ga Ahabe,+ mme ke tla phimola Jerusalema gore e nne phepa, fela jaaka motho a phimola sekotlele gore se nne phepa, a se phimola a bo a se ribega.+
14 Ke tla latlha masalela a boswa jwa me+ ke bo ke a tsenya mo seatleng sa baba ba bone, mme ba tla gapiwa e bile baba ba bone botlhe ba tla tsaya dithoto tsa bone,+
15 ka gonne ba dirile se se bosula mo matlhong a me mme ba ne ba tswelela ba nkgopisa go simologa ka letsatsi le borraabonemogolo ba duleng kwa Egepeto ka lone go tla go fitlha mo letsatsing leno.’”+
16 Gape Manase o ne a tsholola madi a a se nang molato ka selekanyo se segolo thata go fitlha a a tladitse mo Jerusalema go tswa ntlheng e nngwe go ya ntlheng e nngwe,+ kwantle ga boleo jwa gagwe jo a neng a leofisitse Juda ka jone ka go dira se se bosula mo matlhong a ga Jehofa.
17 Fa e le pego yotlhe ya botshelo jwa ga Manase le sotlhe se a se dirileng le maleo otlhe a a neng a a dira, a ga di a kwalwa mo bukeng ya dipego tsa dikgosi tsa Juda?
18 Go tswa foo, Manase o ne a swa jaaka borraagwemogolo mme o ne a fitlhwa mo tshingwaneng ya ntlo ya gagwe, mo tshingwaneng ya ga Usa;+ mme morwawe e bong Amone o ne a nna kgosi mo boemong jwa gagwe.
19 Amone+ o ne a na le dingwaga di le 22 fa a nna kgosi, mme o ne a busa dingwaga di le pedi mo Jerusalema.+ Leina la ga mmaagwe e ne e le Meshulemethe morwadia Haruse yo o tswang kwa Joteba.
20 O ne a tswelela a dira se se bosula mo matlhong a ga Jehofa, fela jaaka rraagwe e bong Manase a ne a dirile.+
21 O ne a nna a tsamaya mo ditseleng tsotlhe tse rraagwe a neng a tsamaile mo go tsone, e bile o ne a tswelela a direla le go ikobela medingwana e e ferosang sebete e rraagwe a neng a e direla.+
22 Ka jalo, o ne a tlogela Jehofa, Modimo wa borraagwemogolo, mme ga a ka a tsamaya mo tseleng ya ga Jehofa.+
23 La bofelo batlhanka ba ga Amone ba ne ba mo logela leano la boferefere mme ba ne ba bolaela kgosi eno mo ntlong ya yone.
24 Le fa go ntse jalo, batho ba lefatshe leo ba ne ba kgemetha botlhe ba ba neng ba logetse Kgosi Amone leano la boferefere, mme ba ne ba tlhoma morwawe e bong Josia gore a nne kgosi mo boemong jwa gagwe.+
25 Fa e le pego yotlhe ya botshelo jwa ga Amone, se a se dirileng, a ga e a kwalwa mo bukeng ya dipego tsa metlha ya dikgosi tsa Juda?
26 Ka jalo, ba ne ba mo fitlha mo lebitleng la gagwe mo tshingwaneng ya Usa,+ mme morwawe e bong Josia+ o ne a nna kgosi mo boemong jwa gagwe.
Dintlha Tse di Kwa Tlase
^ Bona Ditlhaloso Tsa Mafoko.
^ Seheb., “o ne a ralatsa morwawe molelo.”
^ Bona Ditlhaloso Tsa Mafoko.
^ Polelwana eno ka Sehebera e ka tswa e amana le lefoko le le kayang “boloko” mme e dirisitswe e le go bontsha letlhoo.
^ Kgotsa “mogala o o tlhamalatsang.”
