Samuele wa Bobedi 20:1-26
20 Jaanong go ne go na le monna mongwe yo o letshwenyo yo o bidiwang Sheba,+ morwa Bikeri, e le Mobenjamine. O ne a letsa lonaka+ mme a re: “Ga re na kabelo epe mo go Dafide, e bile ga re na boswa bope mo go morwa Jese.+ A mongwe le mongwe a ye kwa medimong* ya gagwe, lona Baiseraele!”+
2 Fa a rialo, banna botlhe ba Iseraele ba ne ba tlogela go sala Dafide morago mme ba sala Sheba morwa Bikeri morago;+ le fa go ntse jalo, banna ba Juda bone ba ne ba ngaparela kgosi ya bone, go tswa kwa Joredane go ya kwa Jerusalema.+
3 Fa Dafide a goroga kwa ntlong* ya gagwe kwa Jerusalema,+ o ne a tsaya bagadingwana ba ba lesome ba a neng a ba tlogetse gore ba tlhokomele ntlo,+ mme o ne a ba tsenya mo ntlong e e disitsweng. O ne a ba tlamela ka dijo, le fa go ntse jalo, o ne a se ka a tlhakanela dikobo le bone.+ Ba ne ba nna ba tswaletswe moo go fitlha ka letsatsi le ba suleng ka lone, ba ne ba tshela jaaka batlholagadi, le fa gone monna wa bone a ne a sa ntse a tshela.
4 Jaanong kgosi e ne ya raya Amasa+ ya re: “Phuthela banna ba Juda kwa go nna mo malatsing a le mararo, mme le wena o tshwanetse go tla fano.”
5 Ka jalo, Amasa o ne a ya go phutha Juda, mme o ne a tla morago ga nako e e beilweng e a neng a e tlhometswe.
6 Foo Dafide o ne a raya Abishai+ a re: “Sheba+ morwa Bikeri a ka nna a re gobatsa go feta kafa Abesalome a dirileng ka gone.+ Tsaya batlhanka ba me mme o mo lelekise, gore a se ka a bona metse mengwe e e sireletsegileng mme a falola mo go rona.”
7 Ka jalo, banna ba ga Joabe,+ Bakeretha, Bapelethe+ le banna botlhe ba ba maatla ba ne ba tswa ba mo sala morago; ba ne ba tswa mo Jerusalema ba lelekisa Sheba morwa Bikeri.
8 Fa ba ne ba le gaufi le leje le legolo kwa Gibeone,+ Amasa+ o ne a tla go ba kgatlhantsha. Jaanong Joabe o ne a apere diaparo tsa gagwe tsa ntwa mme o ne a tsentse tšhaka mo kgetsaneng ya yone, a e bofeletse mo nôkeng ya gagwe. E rile a ya kwa pele, tšhaka e ne ya wa.
9 Joabe o ne a raya Amasa a re: “A o tsogile, morwarre?” Foo Joabe o ne a tshwara ditedu tsa ga Amasa ka seatla sa gagwe sa moja jaaka e kete o batla go mo suna.
10 Amasa o ne a sa bone tšhaka e e neng e le mo seatleng sa ga Joabe, mme Joabe o ne a mo tlhaba ka yone mo mpeng,+ mme mala a gagwe a ne a tshologela fa fatshe. O ne a se ka a mo tlhaba gape; o ne a mo tlhaba gangwe fela a mmolaya. Go tswa foo, Joabe le morwarraagwe e bong Abishai, ba ne ba lelekisa Sheba morwa Bikeri.
11 Lekawana lengwe la ga Joabe le ne le eme fa go ene mme le ne la re: “Mongwe le mongwe yo o mo letlhakoreng la ga Joabe le mongwe le mongwe yo e leng wa ga Dafide, a a sale Joabe morago!”
12 Mo nakong eo yotlhe, Amasa o ne a ntse a bidikama mo mading a gagwe mo gare ga tsela. Fa monna yoo a bona gore batho botlhe ba ne ba ema, o ne a ntsha Amasa mo tseleng a mo isa kwa nageng. Go tswa foo, o ne a mo khurumetsa ka seaparo, ka gonne o ne a bona gore mongwe le mongwe o ne a ema fa a goroga fa go ene.
13 Fa a sena go mo tlosa mo tseleng, banna botlhe ba ne ba sala Joabe morago ba lelekisa Sheba+ morwa Bikeri.
14 Sheba o ne a ralala ditso tsotlhe tsa Iseraele a ya kwa Abele wa Bethe-maaka.+ Babikeri ba ne ba phuthega mmogo mme le bone ba mo sala morago.
15 Joabe le banna ba gagwe ba ne ba tla mme ba kampa go dikologa motse wa Abele wa Bethe-maaka gore ba mo tlhasele ba bo ba dira mokoa ka motlhaba gore ba tlhasele motse, ka gonne o ne o dikologilwe ke thotana ya motlhaba. Mme banna botlhe ba ba neng ba na le Joabe ba ne ba epolola lobota gore ba lo digele fa fatshe.
16 Mme mosadi mongwe yo o botlhale o ne a tlhaeletsa go tswa mo motseng a re: “Reetsang, banna, reetsang! Tsweetswee, rayang Joabe lo re, ‘Tla kwano mme ke bue le wena.’”
17 Ka jalo, o ne a atamela fa go ene, mme mosadi o ne a re: “A ke wena Joabe?” O ne a araba jaana: “Ee ke nna.” Foo mosadi yoo o ne a mo raya a re: “Reetsa mafoko a me, nna lelata la gago.” Mme ene o ne a re: “Ke reeditse.”
18 Mosadi yoo o ne a tswelela a re: “Mo nakong e e fetileng ba ne ba tle ba re, ‘A ba botse kwa Abele,’ mme seo e ne e nna bokhutlo jwa kgang.
19 Ke eme mo boemong jwa ba ba ratang kagiso le ba ba ikanyegang ba Iseraele. O batla go senya motse o o botlhokwa mo Iseraele. Ke eng fa o batla go nyeletsa* boswa jwa ga Jehofa?”+
20 Joabe o ne a araba jaana: “Go ka se direge gore ke o senye ke bo ke o nyeletse.
21 Ga go a nna jalo gotlhelele. Go na le moo, monna mongwe yo o bidiwang Sheba+ morwa Bikeri yo o tswang kwa kgaolong e e dithaba ya Eferaime,+ o tlhanogetse* Kgosi Dafide. Fa lo ka re neela monna yono fela, ke tla tlogela motse ono.” Foo mosadi yoo o ne a raya Joabe a re: “Tlhogo ya gagwe e tla latlhelwa kwa go wena go tswa mo loboteng!”
22 Ka yone nako eo, mosadi yoo yo o botlhale o ne a ya kwa bathong botlhe, mme ba ne ba kgaola tlhogo ya ga Sheba morwa Bikeri ba bo ba e latlhelela Joabe. Foo Joabe o ne a letsa lonaka mme ba phatlalala ba tlogela motse oo, mongwe le mongwe a ya kwa legaeng la gagwe;+ mme Joabe o ne a boela kwa Jerusalema kwa kgosing.
23 Jaanong Joabe o ne a okametse mophato otlhe wa masole a Iseraele;+ Benaia+ morwa Jehoiada+ o ne a okametse Bakeretha le Bapelethe.+
24 Adorame+ o ne a okametse ba ba neng ba tlhophilwe gore ba berekele kgosi; Jehoshafate+ morwa Ahilude e ne e le mokwadi wa ditiragalo.
25 Shefa e ne e le mokwaledi; Sadoke+ le Abiathare+ e ne e le baperesiti.
26 Mme Ira wa Mojaire le ene o ne a nna modiredimogolo* wa ga Dafide.
Dintlha Tse di Kwa Tlase
^ Kgotsa gongwe “kwa ditenteng.”
^ Kgotsa “kwa ntlong ya segosi.”
^ Seheb., “go kometsa.”
^ Seheb., “o tsholeleditse seatla sa gagwe.”
^ Seheb., “a nna moperesiti.”
