Baroma 13:1-14
13 A mongwe le mongwe a ikobele balaodi ba bagolo,+ ka gonne taolo nngwe le nngwe e tswa kwa Modimong;+ balaodi ba ba leng teng ba tlhomilwe ke Modimo mo maemong a bone a a lekanyeditsweng.+
2 Ka jalo motho yo o ganetsang taolo ya balaodi, o ganetsana le thulaganyo ya Modimo; batho ba ba ganetsanang le yone ba tla atlholwa.
3 Batho ba ba dirang se se molemo ga ba boife balaodi mme ba ba dirang se se bosula ke bone ba ba ba boifang.+ Ka jalo, ga o tlhoke go ba boifa. Fa o dira se se molemo,+ ba tla go baka.
4 Balaodi bano ke badiredi ba Modimo ba ba tlhomilweng gore ba lo thuse. Mme fa lo dira se se bosula, boifang, ka gonne ba na le maatla a go lo otlhaya.* Ke badiredi ba Modimo ba ba otlhayang batho ba ba dirang dilo tse di bosula.
5 Ka jalo, go na le mabaka a a utlwalang a gore lo ba reetse. Ga lo ba reetse fela ka gonne lo sa batle gore ba lo otlhaye, mme gape lo ba reetsa ka gonne lo batla go tswelela lo na le segakolodi se se siameng.+
6 Ke gone ka moo gape lo duelang makgetho; ka gonne balaodi ke batlhanka ba Modimo mo setšhabeng ba ba direlang batho ka metlha.
7 Nayang mongwe le mongwe se se mo tshwanetseng: yo o batlang lekgetho, mo neyeng lekgetho;+ yo o batlang sehuba,* mo neyeng sehuba; yo o batlang go boifiwa, mmoifeng;+ yo o batlang tlotlo, mo tlotleng.+
8 Lo se ka lwa kolota ope sepe, mme gone lo kolotane lorato;+ ka gonne yo o ratang motho yo mongwe o dira se molao o reng o tshwanetse go se dira.+
9 Gonne molao wa ga Moshe o o reng, “Ga o a tshwanela go dira boaka,+ ga o a tshwanela go bolaya motho,+ ga o a tshwanela go utswa,+ ga o a tshwanela go eletsa selo sa motho yo mongwe,”+ le ditaelo dipe fela tse di leng mo molaong oo, di sobokantswe ka polelwana eno: “O tshwanetse go rata moagelani wa gago jaaka o ithata.”+
10 Lorato ga lo direle motho yo mongwe bosula;+ ka jalo fa o rata ba bangwe, o a bo o dira se molao o reng o tshwanetse go se dira.+
11 Mme dirang dilo tseno ka gonne lo itse paka. Lo a itse gore eno e setse e le nako ya gore lo thanye mo borokong,+ ka gonne gone jaanong poloko ya rona e gaufi thata go na le ka nako ya fa re ne re nna badumedi.
12 Bosigo bo tloga bo sa; motshegare o atametse. Ka jalo, a re tlogeleng ditiro tsa lefifi+ mme a re apareng dibetsa tsa lesedi.+
13 A re itshwareng sentle*+ jaaka batho ba ba dirang dilo go le motshegare. Ga re a tshwanela go dira meletlo ya botlhapelwa le go tagwa, go tlhakanela dikobo mo go seng ka fa molaong le boitshwaro jo bo repileng jwa go sa kgathale,*+ le go baka dikgogakgogano le go fufegela ba bangwe.+
14 Go na le moo, a re etseng sekao sa Morena wa rona Jesu Keresete,+ mme re se ka ra rulaganya go sa le gale go kgotsofatsa dikeletso tsa rona tse di bosula.+
Dintlha Tse di Kwa Tlase
^ Seger., “ba tshotse tšhaka ka lebaka.”
^ Bona Ditlhaloso Tsa Mafoko.
^ Kgotsa “re tsamayeng.”
^ Kgotsa “boitshwaro jo bo tlhabisang ditlhong.” Ka Segerika, a·sel′gei·a. Bona Ditlhaloso Tsa Mafoko.
