Dipesalema 129:1-8
-
Go tlhaselwa mme o sa fenngwe
-
Ba ba tlhoileng Siona ba tla tlhabiwa ke ditlhong (5)
-
Pina Ya fa Go Tlhatlogelwa Kwa Motseng.
129 “Go tloga fa ke sa le mosha, ba ne ba ntlhasela ka metlha.”+
A jaanong Iseraele a re:
2 “Go tloga fa ke sa le mosha, ba ne ba ntlhasela ka metlha;+Le fa go ntse jalo, ga ba a mphenya.+
3 Balemi ba lemile go kgabaganya mokwatla wa me;+Ba dirile gore mesele ya bone e nne meleele.”
4 Le fa go ntse jalo, Jehofa o tshiamo;+O kgaotse dikgole tsa batho ba ba bosula.+
5 Botlhe ba ba tlhoileng Siona+Ba tla tlhabiwa ke ditlhong ba bo ba kata ka morago ba tlontlologile.
6 Ba tla nna jaaka bojang jo bo tlhogang mo marulelongJo bo omelelang pele ga bo kumolwa,
7 Jo bo ka se kang jwa tlala mo seatleng sa motho yo o bo kgetlangKgotsa mo mabogong a motho yo o kokoanyang dingata.
8 Ba ba fetang ka tsela ga ba kitla ba re:
“E kete Jehofa a ka lo segofatsa;Re lo segofatsa mo leineng la ga Jehofa.”
