Dipesalema 42:1-11
Go mokaedi. Masekile* ya bomorwa Kora.+
42 Fela jaaka kgama e tlhologeletswe melatswana ya metsi,Le nna ke go tlhologeletswe, tlhe Modimo wa me.
2 Ke nyoretswe Modimo, Modimo yo o tshelang.+
Ke tla tla go iponatsa leng fa pele ga Modimo?+
3 Dikeledi tsa me di fetogile dijo tsa me bosigo le motshegare;Batho ba nkgoba letsatsi lotlhe ba re: “Modimo wa gago o kae?”+
4 Ke gakologelwa dilo tseno, mme ke tsholola maikutlo a me,Gonne nkile ka bo ke tsamaya le batho ba bantsintsi;Nkile ka bo ke tsamaya* kwa pele ga bone re ya kwa ntlong ya Modimo,Re goa re itumetse e bile re ntsha ditebogo,Re ne re le boidiidi jo bo opelang dipina tsa go leboga ka letsatsi la go keteka moletlo.+
5 Ke ka ntlha yang fa ke tshwenyegile?+
Ke ka ntlha yang fa ke fuduegile jaana mo teng?
Ke tla letela Modimo,+Gonne ke sa ntse ke tla mmaka e le Mmoloki wa me yo Mogolo.+
6 Modimo wa me, ke tshwenyegile.+
Ke gone ka moo ke go gakologelwang,+Go tswa kwa lefatsheng la Joredane le kwa ditlhoeng tsa dithaba tsa Heremone,Go tswa kwa thabeng ya Misare.*
7 Ke utlwa modumo wa metsi a a elelang ka bonako,Ke modumo wa metsi a gago a a elelang ka bonako.
Makhubu otlhe a gago a a gogomogang a nkhupeditse.+
8 Motshegare Jehofa o tla nnaya lorato lwa gagwe lo lo sa kgaotseng,Mme bosigo ke tla opela ka ene e bile thapelo ya me e tla tlhatlogela kwa Modimong yo o nnayang botshelo.+
9 Ke tla raya Modimo, lefika la me ke re:
“O ntebaletse eng?+
Goreng ke tshwanetse go tsamayatsamaya ke utlwile botlhoko ka ntlha ya mmaba yo o nkgatelelang?”+
10 Baba ba me ba ba batlang go mpolaya setlhogo ba a nkgoba;*Ba nkgoba letsatsi lotlhe ba re: “Modimo wa gago o kae?”+
11 Ke ka ntlha yang fa ke tshwenyegile?
Ke ka ntlha yang fa ke fuduegile jaana mo teng?
Ke tla letela Modimo,+Gonne ke sa ntse ke tla mmaka e le Mmoloki wa me yo Mogolo le Modimo wa me.+
Dintlha Tse di Kwa Tlase
^ Bona Ditlhaloso Tsa Mafoko.
^ Kgotsa “ke tsamaya ka bonya.”
^ Kgotsa “kwa thabeng e nnye.”
^ Kgotsa gongwe “Baba ba me ba nkgoba jaaka e kete ba thuba marapo a me.”
