Esekiele 24:1-27
24 Jehofa o ne a bua le nna gape mo ngwageng wa borobongwe, mo kgweding ya bolesome, mo letsatsing la bolesome la kgwedi eo, a re:
2 “Morwa motho, kwala letlha la letsatsi leno.* Kgosi ya Babelona e simolotse go tlhasela Jerusalema mo go lone letsatsi leno.+
3 Mme o bue seane* ka batlhanogi bano, o bue ka bone o re:
“‘Seno ke se Morena Molaodimogolo Jehofa a se buang:
“Tlhatlegang pitsa e e apeelang;* e tlhatlegeng mo molelong lo bo lo tshela metsi mo go yone.+
4 Tsenyang dikarolo tsa nama mo go yone,+ karolo nngwe le nngwe e e siameng,Serope le legetla; lo e tlatse ka marapo a a a gaisang otlhe.
5 Tsayang nku e e di gaisang tsotlhe mo letsomaneng,+ lo bo lo tlhatlaganya dikgong ka fa tlase ga pitsa.
Bedisang dikarolo tsa nama lo bo lo apaya marapo ka yone.”’
6 “Ka jalo, seno ke se Morena Molaodimogolo Jehofa a se buang:
‘Go tla bo go le maswe mo motseng o o bolayang batho,+ e leng pitsa e e apeelang, e ruse ya yone e sa tlosiwang mo go yone!
Ntshang dikarolo tsa nama mo go yone ka bongwe ka bongwe;+ lo se ka lwa di latlhelela bola.
7 Gonne madi a a tsholotsweng ke motse ono a mo go one;+ o a tshololetse mo lefikeng le le se nang mmu.
Ga o a ka wa a tshololela fa fatshe, gore o a katele ka mmu.+
8 Ke beile madi a o a tsholotseng mo lefikeng le le phatsimang le le se nang mmuGore a se ka a katelwa,E le gore ke tsose bogale jwa me mme ke ipusolosetse.’+
9 “Ka jalo, seno ke se Morena Molaodimogolo Jehofa a se buang:
‘Go tla bo go le maswe mo motseng o o bolayang batho!+
Ke tla dira mokoa o mogolo wa dikgong.
10 Tlhatlaganyang dikgong lo bo lo gotsa molelo,Apayang nama gore e bo e butswe thata, tshololang moro, lo bo lo letla gore marapo a she.
11 Bayang pitsa e e se nang sepe mo magaleng gore e nne mogoteGore kopore ya yone e gotele thata.
Leswe la yone le tla nyerologa mo go yone,+ e bile ruse ya yone e tla sha.
12 Go ngomola pelo e bile go a lapisa,Gonne ruse ya yone e ntsi ga e kitla e tswa.+
E latlhele mo molelong e ntse e na le ruse!’
13 “‘Boitshwaro jwa gago jo bo maswe thata bo ne jwa dira gore o se ka wa nna phepa.+ Ke ne ka leka go go dira phepa, mme o ne wa gana. Ga o kitla o nna phepa go fitlha tšhakgalo ya me mo go wena e kokobela.+
14 Nna Jehofa, ke buile. Go tla diragala jalo. Ke tla dira jalo ke sa boele morago, ke sa tlhomoge pelo e bile ke sa ikwatlhaye.+ Ba tla go atlhola go ya ka ditsela tsa gago le ditiro tsa gago,’ go bua Morena Molaodimogolo Jehofa.”
15 Mme Jehofa o ne a bua le nna gape a re:
16 “Morwa motho, ka tshoganyetso fela ke tloga ke go tseela motho yo o mo ratang.+ Ga o a tshwanela go hutsafala;* e bile ga o a tshwanela go lela kgotsa go tsholola dikeledi.
17 Lela ka tidimalo, mme o se ka wa dira dingwao tsa go hutsafalela baswi.+ Ipofe ka tuku e e kgethegileng ya gago,+ mme o rwale ditlhako* tsa gago.+ O se ka wa khurumetsa ditedu tsa gago tse di fa godimo ga molomo,+ e bile o se ka wa ja senkgwe se o se tliseditsweng ke batho ba bangwe.”*+
18 Ke ne ka bua le batho mo mosong, mme mosadi wa me o ne a swa maitseboa. Ka jalo, mo mosong ke ne ka dira fela jaaka ke ne ke laetswe.
19 Batho ba ne ba nthaya ba re: “A ga o kitla o re bolelela gore dilo tseno tse o di dirang di re ama jang?”
20 Ke ne ka ba araba ka re: “Jehofa o ntheile a re,
21 ‘Raya batho ba Iseraele o re: “Morena Molaodimogolo Jehofa a re, ‘Ke tloga ke dira gore lefelo la me le le boitshepo le se ka la tlhola le nna boitshepo,+ e leng selo se lo ipelafatsang ka sone, selo se lo se ratang le se lo se eletsang thata.* Bomorwaalona le bomorwadialona ba lo ba tlogetseng kwa morago ba tla bolawa ka tšhaka.+
22 Foo lo tla tshwanelwa ke go dira fela jaaka ke dirile. Ga lo kitla lo khurumetsa ditedu tsa lona tse di fa godimo ga molomo, e bile ga lo kitla lo ja senkgwe se lo se tliseditsweng ke batho ba bangwe.+
23 Lo tla bo lo rwele dituku tsa lona e bile lo rwele ditlhako* tsa lona. Ga lo kitla lo hutsafala kgotsa lo lela lo bonwa ke batho. Go na le moo, lo tla bola ka ntlha ya melato ya lona,+ mme lo tla lebana lo bo lo lela mo sephiring.
24 Esekiele o fetogile sesupo mo go lona.+ Lo tla dira fela jaaka a dirile. Fa seo se direga, lo tla tshwanelwa ke go itse gore ke nna Morena Molaodimogolo Jehofa.’”’”
25 “Mme wena morwa motho, mo letsatsing la fa ke ba tseela kago ya bone ya phemelo, e leng selo se sentle se se ba itumedisang, selo se ba se ratang, se ba se eletsang thata, mmogo le bomorwaabone le bomorwadiabone,+
26 mongwe yo o falotseng o tla go begela seo.+
27 Mo letsatsing leo, wena o tla bula molomo wa gago o bo o bua le motho yoo yo o falotseng, mme ga o kitla o tlhola o nna semumu.+ O tla nna sesupo mo go bone, mme ba tla tshwanelwa ke go itse gore ke nna Jehofa.”
Dintlha Tse di Kwa Tlase
^ Seheb., “leina la letsatsi leno.”
^ Kgotsa “polelo.”
^ Kgotsa “pitsa e e apeelang e e molomo o mogolo.”
^ Kgotsa “go itaya sehuba sa gago.”
^ Seheb., “bompaatšhane.”
^ Seheb., “senkgwe sa batho.”
^ Kgotsa “le se lo se tlhomogelang pelo.”
^ Seheb., “bompaatšhane.”
