Jobe 3:1-26
3 Morago ga seno, Jobe o ne a simolola go bua mme a hutsa letsatsi le a tshotsweng ka lone.*+
2 Jobe o ne a re:
3 “A letsatsi le ke tshotsweng+ ka lone le nyelele,Le bosigo jwa fa mongwe a ne a re: ‘Go imilwe ngwana wa mosimane!’
4 A letsatsi leo le nne lefifi.
A Modimo yo o kwa godimo a se ka a amega ka lone;A lesedi le se ka la le phatsimela.
5 A lefifi le lentshontsho* le le fenye.
A leru la pula le nne mo godimo ga lone.
A sepe fela se se fifatsang letsatsi se le tshose.
6 A bosigo joo bo nne lefifi le lentshontsho;+A bo se ka jwa itumela mo letsatsing leo,A bo se ka jwa balelwa mo palong ya dikgwedi.
7 Eleruri! A bosigo joo bo nne moopa;A go goa ka boitumelo go se ka ga utlwiwa mo go jone.
8 A ba ba hutsang letsatsi leo ba le hutse,Ba ba kgonang go tsosa Lefiathane.*+
9 A dinaledi tsa lotlatlana lwa jone di nne lefifi;A bo lete lesedi la moso le le ka se nneng gone,A bo se ka jwa bona marang a bosa.
10 Gonne ga bo a ka jwa tswala dikgoro tsa popelo ya ga mmê;+Kgotsa jwa dira gore ke se ka ka bona matshwenyego.
11 Goreng fa ke ne ke sa swe fa ke tsholwa?
Goreng fa ke ne ke sa swe fa ke ne ke tswa mo popelong?+
12 Goreng go ne go nna le mangole gore a nkamogeleLe mabele gore ke a anye?
13 Gone jaanong nkabo ke rapame ke sa tshwenyege;+Nkabo ke robetse e bile ke ikhuditse+
14 Le dikgosi tsa lefatshe le bagakolodi ba tsone,Ba ba neng ba ikagela mafelo a gone jaanong e leng marope fela,*
15 Kgotsa le dikgosana tse di neng di na le gauta,Tse matlo a tsone a neng a tletse selefera.
16 Kgotsa goreng ke ne ke sa swele mo popelong ya ga mmê,Jaaka bana ba ba iseng ba ko ba bone lesedi?
17 Tota le batho ba ba bosula ba ba mo lebitleng ga ba tlhole ba le mo khuduegong;Ba ba feletsweng ke maatla ba ikhuditse gone koo.+
18 Magolegwa a iketlile mmogo gone koo;Ga a utlwe lentswe la yo o a pateletsang go bereka.
19 Ba babotlana le ba bagolo ba a tshwana gone koo,+Motlhanka le ene o gololesegile mo go mong wa gagwe.
20 Goreng a naya yo o bogang lesediE bile a naya ba ba utlwileng botlhoko+ botshelo?
21 Goreng ba ba eletsang loso ba sa swe,+Ba ba lo epang go feta matlotlo a a fitlhegileng,
22 Batho ba ba ipelang thataE bile ba itumela fa ba bona lebitla?
23 Goreng a naya motho yo o latlhegetsweng ke tsela lesedi,Yo Modimo a agileng legora go mo dikologa?+
24 Gonne khutsafalo ya me e tshwana le dijo,+E bile go sisa pelo ga me+ go tshologa jaaka metsi a a elelang.
25 Gonne se ke neng ke se boifa se tlile mo go nna,E bile se ke neng ke se tshaba se ntiragaletse.
26 Ga ke ise ke nne le kagiso, le tidimalo, le boikhutso,Le fa go ntse jalo, mathata a nna a tla.”
Dintlha Tse di Kwa Tlase
^ Seheb., “a hutsa letsatsi la gagwe.”
^ Kgotsa “lefifi le moriti wa loso.”
^ Go akanngwa gore e ka tswa e le kwena kgotsa phologolo nngwe ya mo metsing e kgolo e bile e le maatla.
^ Kgotsa gongwe “Ba ba neng ba ikagela mafelo a a kgakgabetseng.”
