Efangele ya ga Johane 17:1-26
17 Fa Jesu a sena go bua dilo tseno, o ne a leba kwa legodimong a bo a re: “Rara, nako e tlile. Galaletsa morwao gore morwao a tle a go galaletse,+
2 fela jaaka o mo neile taolo mo bathong* botlhe,+ gore a tle a neye batho botlhe ba o ba mo neileng+ botshelo jo bo sa khutleng.+
3 E le gore ba bone botshelo jo bo sa khutleng+ ba tshwanetse go go itse,* wena Modimo yo o esi wa boammaaruri,+ e bile ba tshwanetse go itse yo o mo romileng, e bong Jesu Keresete.+
4 Ke go galaleditse mo lefatsheng,+ ka gonne ke weditse tiro e o neng o e nneile gore ke e dire.+
5 Jaanong Rara, nkgalaletse fa thoko ga gago ka kgalalelo e ke neng ke na le yone fa ke ne ke sa ntse ke na le wena pele ga lefatshe le nna gone.+
6 “Ke senoletse* batho ba o ba nneileng ba ba tswang mo lefatsheng leina la gago.+ E ne e le ba gago, mme wa ba nnaya, mme ba ikobetse lefoko la gago.
7 Jaanong ba a itse gore dilo tsotlhe tse o di nneileng di tswa kwa go wena;
8 ka gonne fa ke ne ke ba bolelela mafoko a o a mpoleletseng,+ ba ne ba a amogela mme jaanong ba a itse gore ke tlile ke le moemedi wa gago,+ e bile ba dumetse gore o nthomile.+
9 Ke a ba kopela; ga ke kopele lefatshe, mme ke kopela batho ba o ba nneileng, ka gonne ke ba gago;
10 mme dilo tsotlhe tsa me ke tsa gago, le tsa gago ke tsa me,+ e bile ba nkgalaleditse.
11 “Ga ke tlhole ke le mo lefatsheng, le fa go ntse jalo, bone ba mo lefatsheng,+ mme nna ke tla kwa go wena. Rara yo o Boitshepo, ba tlhokomele+ ka ntlha ya leina la gago le o le nneileng, gore ba tle ba nne seoposengwe* jaaka re le seoposengwe.*+
12 Fa ke ne ke sa ntse ke na le bone, ke ne ke tlhola ke ba tlhokomela+ ka ntlha ya leina la gago le o le nneileng; mme ke ba sireleditse, e bile ga go na ope mo go bone yo o sentsweng+ fa e se morwa tshenyego,+ gore lokwalo lo tle lo diragadiwe.+
13 Jaanong ke tla kwa go wena, mme ke bua dilo tseno mo lefatsheng, gore ba tle ba nne le boitumelo jo bogolo jo le nna ke nang le jone.+
14 Ke ba neile lefoko la gago, mme lefatshe le ba tlhoile, ka gonne ga ba karolo ya lefatshe,+ fela jaaka nna ke se karolo ya lefatshe.
15 “Ga ke kope gore o ba ntshe mo lefatsheng, mme ke kopa gore o ba sireletse ka ntlha ya ga Satane.*+
16 Ga ba karolo ya lefatshe,+ fela jaaka nna ke se karolo ya lefatshe.+
17 Ba dire boitshepo ka mafoko a gago;+ ka gonne mafoko a gago a boammaaruri.+
18 Fela jaaka o nthomile mo lefatsheng, le nna ke ba romile mo lefatsheng.+
19 Mme ke ipoloka ke le boitshepo ka ntlha ya bone, gore le bone ba tle ba dirwe boitshepo ka ntlha ya boammaaruri.
20 “Ga ke kopele bano fela, mme ke kopela le ba ba tla dumelang mo go nna fa ba sena go utlwa molaetsa wa bone,
21 gore botlhe ba tle ba nne seoposengwe,*+ fela jaaka wena Rara o le seoposengwe le nna, le nna ke le seoposengwe le wena,+ gore le bone ba tle ba nne seoposengwe le rona, e le gore lefatshe le dumele gore o nthomile.
22 Ke ba neile kgalalelo e o e nneileng, gore ba tle ba nne seoposengwe* jaaka le rona re le seoposengwe.+
23 Nna ke le seoposengwe le bone mme wena o le seoposengwe le nna, gore ba tle ba nne seoposengwe ka mo go feletseng,* e le gore lefatshe le tle le itse gore o nthomile le gore o ba ratile fela jaaka o nthatile.
24 Rara, ke batla gore batho ba o ba nneileng ba nne le nna kwa ke leng teng,+ gore ba tle ba bone kgalalelo ya me e o e nneileng, ka gonne o nthatile pele ga batho ba bopiwa.*+
25 Rara yo o siameng, eleruri lefatshe ga le ise le go itse,+ mme nna ke a go itse,+ le bano ba a itse gore o nthomile.
26 Ke ba rutile ka ga* leina la gago e bile ke tla tswelela ke dira jalo,+ gore ba rate batho ba bangwe fela jaaka o nthata le gore ke nne ke le seoposengwe le bone.”+
Dintlha Tse di Kwa Tlase
^ Seger., “mo nameng.”
^ Kgotsa “go tsenya kitso ka ga gago.”
^ Kgotsa “itsisitse.”
^ Seger., “mongwe fela.”
^ Seger., “mongwe fela.”
^ Seger., “yo o boikepo.” Bona Ditlhaloso Tsa Mafoko.
^ Seger., “mongwe fela.”
^ Seger., “mongwe fela.”
^ Seger., “ba nne mongwe fela.”
^ Seger., “Ke ba itsisitse.”
