Lefitiko 4:1-35
-
Setlhabelo sa boleo (1-35)
4 Jehofa o ne a tswelela a raya Moshe a re:
2 “Bolelela Baiseraele o re, ‘Fa mongwe a leofa ka phoso+ ka go dira sengwe sa dilo tseno tse Jehofa a laetseng gore di se ka tsa dirwa, go dirwe jaana:
3 “‘Fa moperesiti yo o tloditsweng+ a leofa+ a bo a dira gore batho ba nne molato, foo o tshwanetse go isetsa Jehofa powana e e itekanetseng sentle e le setlhabelo sa boleo jo a bo dirileng.+
4 O tla tlisa poo fa kgorong ya tente ya bokopanelo+ fa pele ga ga Jehofa a bo a baya seatla sa gagwe mo tlhogong ya poo, mme a tlhabele poo eo fa pele ga ga Jehofa.+
5 Go tswa foo, moperesiti yo o tloditsweng+ a tseye mangwe a madi a poo a bo a a tlisa mo teng ga tente ya bokopanelo;
6 mme moperesiti yoo a ine monwana mo mading+ a bo a kgatšha mangwe a madi ao gasupa+ fa pele ga ga Jehofa mo pele ga sesiro sa lefelo le le boitshepo.
7 Gape moperesiti yoo a tshase mangwe a madi mo dinakeng tsa sebeso sa maswalo a a nkgang monate,+ se se fa pele ga ga Jehofa mo tenteng ya bokopanelo; mme a tshele madi otlhe a a setseng a poo kwa tlase mo sebesong sa ditlhabelo tse di fisiwang,+ se se fa kgorong ya tente ya bokopanelo.
8 “‘Go tswa foo, o tla ntsha mafura otlhe a poo ya setlhabelo sa boleo, go akaretsa le mafura a a khurumeditseng mala le mafura a a dikologileng mala
9 le diphilo tse pedi di na le mafura a tsone a a gaufi le dinôka. Mme o tla ntsha mafura a sebete mmogo le diphilo.+
10 A tla tshwana le a a ntshitsweng mo poong ya setlhabelo sa go abelana.+ Mme moperesiti o tla di fisa gore di kuise mosi mo sebesong sa ditlhabelo tse di fisiwang.
11 “‘Mme fa e le letlalo la poo le nama yotlhe ya yone mmogo le tlhogo ya yone, maoto a yone, mala a yone le boloko jwa yone+
12 e leng poo yotlhe, moperesiti o tla laela gore e ntshediwe kwa ntle ga kampa kwa lefelong le le phepa kwa melora* e tshololelwang gone, mme o tla e fisa mo molelong mo godimo ga dikgong.+ E fisediwe kwa melora e tshololelwang gone.
13 “‘Jaanong fa phuthego yotlhe ya Iseraele e nna molato ka gonne e dirile boleo e se ka boomo,+ mme phuthego e sa lemoga gore e dirile sengwe se Jehofa a laetseng gore e se ka ya se dira,+
14 mme go bo go itsiwe ka boleo joo, phuthego e tshwanetse go ntsha powana gore go dirwe setlhabelo sa boleo mme e e tlise fa pele ga tente ya bokopanelo.
15 Bagolwane ba phuthego ba tla baya diatla tsa bone mo tlhogong ya poo fa pele ga ga Jehofa, mme poo eo e tla tlhabelwa fa pele ga ga Jehofa.
16 “‘Go tswa foo, moperesiti yo o tloditsweng o tla tlisa mangwe a madi a poo mo tenteng ya bokopanelo.
17 Moperesiti a ine monwana mo mading a bo a kgatšha mangwe a one gasupa fa pele ga ga Jehofa fa pele ga sesiro.+
18 Go tswa foo, o tla tshasa madi mangwe mo dinakeng tsa sebeso+ se se fa pele ga ga Jehofa, se se mo tenteng ya bokopanelo; mme o tla tshela madi otlhe a a setseng a poo kwa tlase mo sebesong sa ditlhabelo tse di fisiwang, se se fa kgorong ya tente ya bokopanelo.+
19 O tla ntsha mafura otlhe a yone a bo a e fisa mo sebesong gore e kuise mosi.+
20 A dire se se tshwanang ka poo eno fela jaaka a dirile ka poo e nngwe ya setlhabelo sa boleo. Ke kafa moperesiti a tla ntshang poo ka gone gore Baiseraele ba itshwarelwe maleo,+ mme ba tla itshwarelwa.
21 O tla laela gore poo e ntshediwe kwa ntle ga kampa mme o tla e fisa fela jaaka a fisitse poo ya ntlha.+ Ke setlhabelo sa boleo se se direlwang phuthego.+
22 “‘Fa kgosana+ e leofa ka phoso ka go dira sengwe sa dilo tsotlhe tse Jehofa Modimo wa gagwe a laetseng gore di se ka tsa dirwa a bo a nna molato
23 kgotsa fa a lemoga gore o dirile boleo jo bo sa dumalaneng le taelo ya Modimo, foo o tshwanetse go tlisa potsane e tonanyana e e itekanetseng sentle e le setlhabelo sa gagwe.
24 O tla baya seatla sa gagwe mo tlhogong ya potsane eo a bo a e tlhabela mo lefelong le phologolo ya setlhabelo se se fisiwang e tlhabelwang mo go lone fa pele ga ga Jehofa.+ Ke setlhabelo sa boleo.
25 Moperesiti o tla tsaya madi mangwe a setlhabelo sa boleo ka monwana a bo a a tshasa mo dinakeng+ tsa sebeso sa ditlhabelo tse di fisiwang, mme o tla tshela madi otlhe a yone a a setseng kwa tlase mo sebesong seo.+
26 O tla fisa mafura otlhe a yone mo sebesong gore a kuise mosi jaaka mafura a setlhabelo sa go abelana.+ Ke se moperesiti a tla se dirang gore motho yoo a itshwarelwe boleo jwa gagwe, mme o tla itshwarelwa.
27 “‘Fa mongwe wa batho ba Iseraele a leofa ka phoso a bo a nna molato ka go dira sengwe sa dilo tse Jehofa a laetseng gore di se ka tsa dirwa+
28 kgotsa fa a lemoga boleo jo a bo dirileng, foo a a tlise potsane e namagadi e e itekanetseng sentle e le setlhabelo sa boleo jo a bo dirileng.
29 O tla baya seatla sa gagwe mo tlhogong ya phologolo ya setlhabelo sa boleo a bo a tlhabela phologolo eo mo lefelong le a tlhabetseng phologolo ya setlhabelo se se fisiwang mo go lone.+
30 Moperesiti o tla tsaya madi mangwe a yone ka monwana a bo a a tshasa mo dinakeng tsa sebeso sa ditlhabelo tse di fisiwang, mme o tla tshela madi a yone otlhe a a setseng kwa tlase mo sebesong.+
31 O tla ntsha mafura otlhe a yone,+ fela jaaka mafura a setlhabelo sa go abelana a ntshiwa,+ mme moperesiti o tla a fisa gore a kuise mosi mo sebesong e le lonko lo lo itumedisang* lo lo yang kwa go Jehofa. Ke se moperesiti a tla se dirang gore motho yoo a itshwarelwe boleo jwa gagwe, mme o tla itshwarelwa.
32 “‘Le fa go ntse jalo, fa a ntsha kwanyana e le setlhabelo sa gagwe sa boleo, a a tlise kwanyana e namagadi e e itekanetseng sentle.
33 O tla baya seatla sa gagwe mo tlhogong ya phologolo eo a bo a e tlhaba e le setlhabelo sa boleo mo lefelong le phologolo ya setlhabelo se se fisiwang e tlhabelwang mo go lone.+
34 Moperesiti o tla tsaya madi mangwe a setlhabelo sa boleo ka monwana a bo a a tshasa mo dinakeng tsa sebeso sa ditlhabelo tse di fisiwang,+ mme o tla tshela madi otlhe a yone a a setseng kwa tlase mo sebesong seo.
35 O tla ntsha mafura otlhe a yone ka tsela e mafura a phelefu e potlana ya setlhabelo sa go abelana a ntshiwang ka yone, mme moperesiti o tla fisa mafura ano gore a kuise mosi mo sebesong mo godimo ga ditlhabelo tsa ga Jehofa tse di dirwang ka molelo.+ Ke se moperesiti a tla se dirang gore motho yoo a itshwarelwe boleo jwa gagwe, mme o tla itshwarelwa.+
Dintlha Tse di Kwa Tlase
^ Kgotsa “melora e e mafura,” go tewa melora e e kolobeditsweng ke mafura a ditlhabelo.
^ Kgotsa “monate; ritibatsang.” Seheb., “lapolosang.”
