Efangele ya ga Luke 1:1-80

TSHAMEKA

Theofilo o a kwalelwa (1-4)
Gabariele o bolelela pele ka go tsholwa ga ga Johane Mokolobetsi (5-25)
Gabariele o bolelela pele ka go tsholwa ga ga Jesu (26-38)
Marea o etela Elisabetha (39-45)
Marea o tlotlomatsa Jehofa (46-56)
Johane o a tsholwa e bile o newa leina (57-66)
Boporofeti jwa ga Sekarea (67-80)

1 Motlotlegimogolo Theofilo, ke bone matsapa a batho ba le bantsi ba a tsereng gore ba kwale dilo tsotlhe tse di diragetseng, e leng dilo tse le rona re di dumelang re sa belaele.+ ² Ba bangwe le bone ba ba neng ba bona dilo tseno+ e bile ba ne ba itsise molaetsa wa Modimo, ba ne ba re di bolelela.+ ³ Ka jalo, ke dirile dipatlisiso ka dilo tseno, mme le nna ke ne ka dira tshwetso ya gore ke go di kwalele di rulagane sentle.+ ⁴ Ke dirile seno gore o tle o itse gore eleruri dilo tse o di rutilweng di boammaaruri.+ ⁵ Mo motlheng wa ga Herode,*+ kgosi ya Judea, go ne go na le moperesiti mongwe yo o bidiwang Sekarea wa setlhopha sa ga Abija.+ Mosadi wa gagwe e ne e le setlogolwana sa ga Arone,* mme leina la gagwe e ne e le Elisabetha. ⁶ Boobabedi Modimo o ne a ba tsaya ba siame, ba se na molato e bile ba tshela go dumalana le ditaelo tsotlhe le melao ya ga Jehofa.* ⁷ Le fa go ntse jalo, ba ne ba se na ngwana, ka gonne Elisabetha o ne a le moopa, e bile boobabedi ba ne ba setse ba godile thata. ⁸ Jaanong fa Sekarea a ntse a dira tiro ya gagwe e le moperesiti ka nako e setlhopha sa bone+ se neng se abetswe go direla fa pele ga Modimo, ⁹ go ya ka thulaganyo* e e neng e tlhomilwe ya boperesiti, e ne ya nna nako ya gagwe ya gore a tsene mo tempeleng ya ga Jehofa*+ a ise maswalo.+ ¹⁰ Mme batho ba bangwe botlhe ba ne ba le kwa ntle ba rapela ka nako ya fa go ne go isiwa maswalo. ¹¹ Moengele wa ga Jehofa* o ne a iponatsa kwa go ene, a eme ka fa letlhakoreng la moja la sebeso sa maswalo. ¹² Mme fa Sekarea a bona seno o ne a tshwenyega, mme o ne a boifa thata. ¹³ Le fa go ntse jalo, moengele yoo o ne a mo raya a re: “Se boife, Sekarea, ka gonne Modimo o utlwile thapelo ya gago ya tlhoafalo, mme mosadi wa gago e bong Elisabetha o tla go tsholela ngwana wa mosimane, mme o mmitse Johane.+ ¹⁴ Wena o tla ipela e bile o tla itumela thata, e bile batho ba le bantsi ba tla itumela fa a tsholwa,+ ¹⁵ ka gonne ngwana yoo o tla nna mogolo mo matlhong a ga Jehofa.*+ Le fa go ntse jalo, ga a a tshwanela go nwa beine kgotsa senô sepe se se tagang,+ e bile o tla tlala moya o o boitshepo tota le pele ga a tsholwa,*+ ¹⁶ mme o tla busetsa Baiseraele ba le bantsi kwa go Jehofa,* Modimo wa bone.+ ¹⁷ Gape, o tla tsamaya kwa pele ga Modimo a na le maatla a a tshwanang le a ga Elija,+ gore a busetse dipelo tsa borrabana kwa baneng ba bone+ a bo a thuse ba ba sa utlweng gore ba dire dilo ka botlhale jaaka batho ba ba siameng. O tla dira seno e le gore a baakanyetse Jehofa* batho.”+ ¹⁸ Sekarea o ne a raya moengele a re: “A mme seo se ka kgonega? Ka gonne ke tsofetse, le mosadi wa me o setse a godile thata.” ¹⁹ Moengele o ne a mo raya a re: “Ke nna Gabariele,+ yo o emang fa pele ga Modimo,+ mme o nthomile gore ke tle go bua le wena le go go bolelela dikgang tseno tse di molemo. ²⁰ Mme ga o kitla o kgona go bua go fitlha ka letsatsi le dilo tseno di tla diragalang ka lone, ka gonne o ne wa se ka wa dumela mafoko a me, a a tla diragadiwang ka nako e e tlhomilweng.” ²¹ Mo nakong eo yotlhe, batho ba ne ba emetse Sekarea, mme ba ne ba gakgamaletse go bo a diegile thata jaana mo tempeleng. ²² Fa a tswa, o ne a sa kgone go bua le bone, mme ba ne ba lemoga gore o ne a bone sengwe se se sa tlwaelegang* mo tempeleng. O ne a nna a bua le bone ka mabogo, mme o ne a sa kgone go bua gotlhelele. ²³ Fa malatsi a gagwe a go direla kwa tempeleng a fela, o ne a ya kwa legaeng la gagwe. ²⁴ Malatsi moragonyana, mosadi wa gagwe e bong Elisabetha o ne a ima, mme o ne a nna a iphitlhile dikgwedi di le tlhano, a re: ²⁵ “Seno ke se Jehofa* a se ntiretseng. O nkgakologetswe, e bile o dirile gore batho ba se ka ba tlhola ba nkgoba.”+ ²⁶ Fa Elisabetha a na le dikgwedi di le thataro a ntse a imile, Modimo o ne a roma moengele Gabariele+ kwa motseng wa Galalea o o bidiwang Nasaretha, ²⁷ kwa kgarebaneng+ nngwe e e neng e solofeditswe lenyalo* ke monna mongwe yo o neng a bidiwa Josefa, yo e neng e le setlogolwana sa ga Dafide. Leina la kgarebane eo e ne e le Marea.+ ²⁸ Fa moengele yoo a tsena o ne a re: “Dumela, wena yo o segofaditsweng thata, Jehofa* o na le wena.” ²⁹ Le fa go ntse jalo, mafoko a moengele yoo a ne a mo tshwenya fela thata mme a leka go tlhaloganya gore tumediso eno e ka tswa e kaya eng. ³⁰ Ka jalo, moengele o ne a mo raya a re: “Se boife Marea, ka gonne Modimo o go amogetse. ³¹ Mme o tla ima* o bo o tshola ngwana wa mosimane,+ mme o mmitse Jesu.+ ³² Ngwana yono o tla nna mogolo+ e bile o tla bidiwa Morwa Mogodimodimo,+ Jehofa* Modimo o tla mo naya setulo sa bogosi sa ga rraagwe e bong Dafide,+ ³³ mme o tla busa ditlogolwana tsa ga Jakobe ka bosakhutleng e le Kgosi, mme Bogosi jwa gagwe ga bo kitla bo khutla.”+ ³⁴ Le fa go ntse jalo, Marea o ne a raya moengele a re: “Seno se tla direga jang, ka gonne ga ke tlhakanele dikobo le monna ope?”+ ³⁵ Moengele o ne a mo araba a re: “Moya o o boitshepo o tla tla mo go wena,+ e bile maatla a Mogodimodimo a tla go okama. Ka lebaka leo, ngwana yo o tla tsholwang o tla bidiwa boitshepo,+ Morwa Modimo.+ ³⁶ Elisabetha wa losika lwa gago le ene o imile ngwana wa mosimane le fa gone a setse a tsofetse, mme kgwedi eno ke ya gagwe ya borataro, ene yo batho ba reng ke moopa; ³⁷ ka gonne ga go na sepe se Modimo a se buileng se se ka se kang sa kgonega.”+ ³⁸ Foo Marea o ne a re: “Nna ke lelata la ga Jehofa!* E kete se o se buileng se ka ntiragalela.” Jaanong moengele o ne a mo tlogela a tsamaya. ³⁹ Ka jalo mo malatsing ao, Marea o ne a itlhaganela a ya kwa nageng e e dithaba, kwa motseng wa Juda, ⁴⁰ o ne a tsena mo legaeng la ga Sekarea mme a dumedisa Elisabetha. ⁴¹ Fa Elisabetha a utlwa Marea a mo dumedisa, losea lo lo mo popelong ya gagwe lo ne lwa tlola, mme Elisabetha o ne a tlala moya o o boitshepo ⁴² a bo a goa a re: “Ruri o segofaditswe go feta basadi botlhe, le ngwana yo o mo popelong ya gago o segofaditswe! ⁴³ Ka jalo, go tla jang gore ke bo ke neilwe tshiamelo eno, ya gore ke etelwe ke mmaagwe Morena wa me? ⁴⁴ Gonne e rile fela ke utlwa tumediso ya gago, losea lo lo mo popelong ya me lo ne lwa tlola ka boitumelo. ⁴⁵ Gape go itumela wena yo o dumetseng, ka gonne dilo tse o di boleletsweng tse di tswang kwa go Jehofa* di tla diragadiwa ka botlalo.” ⁴⁶ Marea o ne a re: “Ke tlotlomatsa Jehofa,*+ ⁴⁷ e bile pelo ya me e itumetse thata ka ntlha ya Modimo, Mmoloki wa me,+ ⁴⁸ ka gonne o lebile boemo jwa me jo bo kwa tlase, nna lelata la gagwe.+ Go tloga jaanong go ya pele dikokomana tsotlhe di tla bolela gore ke itumetse,+ ⁴⁹ ka gonne Modimo yo o maatla o ntiretse ditiro tse dikgolo, e bile leina la gagwe le boitshepo,+ ⁵⁰ mme o utlwela batho botlhe ba ba mmoifang botlhoko mo dikokomaneng tsotlhe.+ ⁵¹ O dirile ditiro tse di maatla ka lebogo la gagwe; o gasamisitse ba ba mabela.*+ ⁵² O folositse banna ba ba nang le maatla mo ditulong tsa bogosi+ a bo a godisa batho ba maemo a a kwa tlase;+ ⁵³ o dirile gore ba ba tshwerweng ke tlala ba kgore ka go ba naya dilo tse di molemo+ mme bahumi a ba tsamaisa ba iphotlhere. ⁵⁴ O thusitse motlhanka wa gagwe e bong Iseraele, a gakologelwa tsholofetso ya gagwe ya gore o tla nna kutlwelobotlhoko+ ⁵⁵ mo go Aborahame le ditlogolwana*+ tsa gagwe ka bosakhutleng, fela jaaka a ile a bolelela borraaronamogolo.” ⁵⁶ Marea o ne a nna le Elisabetha dikgwedi di ka nna tharo, go tswa foo a bo a boela kwa legaeng la gagabo. ⁵⁷ Jaanong nako ya gore Elisabetha a belege e ne ya goroga, mme o ne a tshola ngwana wa mosimane. ⁵⁸ Baagelani ba gagwe le ba losika lwa gagwe ba ne ba utlwa gore Jehofa* o ne a mmontshitse kutlwelobotlhoko e kgolo, mme ba ne ba itumela le ene.+ ⁵⁹ Mo letsatsing la borobedi ba ne ba ya go rupisa ngwana yoo yo monnye,+ mme ba ne ba tlile go mmitsa ka leina la ga rraagwe, e bong Sekarea. ⁶⁰ Le fa go ntse jalo, mmaagwe o ne a re: “Nnyaa! o tla bidiwa Johane.” ⁶¹ Ba ne ba mo raya ba re: “Ga go na ope mo losikeng lwa gago yo o bidiwang ka leina leno.” ⁶² Foo ba ne ba botsa rraagwe ba bua ka mabogo gore o ne a batla a bidiwa mang. ⁶³ Ka jalo, o ne a kopa sengwe se a ka kwalelang mo go sone a bo a kwala jaana: “Leina la gagwe ke Johane.”+ Foo botlhe ba ne ba gakgamala. ⁶⁴ Ka ponyo ya leitlho, molomo wa gagwe o ne wa bulega le loleme lwa gagwe lo ne lwa bofologa mme a simolola go bua+ a bo a baka Modimo. ⁶⁵ Botlhe ba ba nnang mo tikologong ya bone ba ne ba boifa, mme batho ba ne ba simolola go bua ka dilo tseno mo nageng yotlhe e e dithaba ya Judea. ⁶⁶ Mme botlhe ba ba neng ba utlwa ka seo ba ne ba nna ba akanya ka sone ba bo ba ipotsa jaana: “Tota ngwana yo monnye yono o tlile go nna eng?” Gonne eleruri Jehofa* o ne a na le ene. ⁶⁷ Foo rraagwe e bong Sekarea o ne a tlala moya o o boitshepo a bo a porofeta a re: ⁶⁸ “A go bakwe Jehofa* Modimo wa Iseraele,+ ka gonne o tlhomogetse batho ba gagwe pelo a bo a ba golola.+ ⁶⁹ E bile o re tliseditse mmoloki yo o maatla*+ yo o tswang mo lelapeng* la ga Dafide motlhanka wa gagwe,+ ⁷⁰ fela jaaka a buile a dirisa baporofeti ba gagwe ba bogologolo ba ba neng ba ikanyega.+ ⁷¹ O ne a solofetsa gore o tla re golola mo babeng ba rona le mo go botlhe ba ba re tlhoileng.+ ⁷² O tla re utlwela botlhoko fela jaaka a solofeditse borraaronamogolo e bile o tla gakologelwa kgolagano ya gagwe e e boitshepo.+ ⁷³ Kgolagano e a neng a e bolelela rraaronamogolo e bong Aborahame.+ ⁷⁴ Fa Modimo a sena go re golola mo babeng ba rona, o tla re letla gore re mo obamele re sa boife, ⁷⁵ gore re tle re ikanyege re bo re dire se se siameng botshelo jotlhe jwa rona. ⁷⁶ Mme wena ngwana yo monnye, o tla bidiwa moporofeti wa Mogodimodimo, ka gonne o tla tsamaya kwa pele ga ga Jehofa* gore o baakanye ditsela tsa gagwe,+ ⁷⁷ gore o itsise batho ba gagwe gore Modimo o tla ba boloka ka go ba itshwarela maleo,+ ⁷⁸ ka gonne a le pelotlhomogi thata. Bopelotlhomogi joo jo bo tswang kwa legodimong bo tla re phatsimela jaaka fa letsatsi le tlhaba, ⁷⁹ gore ba ba ntseng mo lefifing le mo moriting wa loso ba nne mo leseding+ e bile bo tla kaela dinao tsa rona mo tseleng ya kagiso.” ⁸⁰ Mme ngwana yoo yo monnye o ne a gola a bo a nonofa a thusiwa ke moya wa Modimo, mme o ne a tswelela a nna kwa sekakeng go fitlha nako ya gore a rerele batho ba Iseraele e goroga.