Moreri 11:1-10
11 Latlhela senkgwe sa gago mo metsing,+ ka gonne o tla se bona gape morago ga malatsi a le mantsi.+
2 Se kgaoganyetse ba le supa kgotsa ba le robedi,+ ka gonne ga o itse gore ke masetlapelo afe a a tla diregang mo lefatsheng.
3 Fa maru a tletse metsi, a tla nesa pula mo lefatsheng; e bile fa setlhare se wela kwa borwa kgotsa kwa bokone, se tla nna mo lefelong le se wetseng mo go lone.
4 Yo o nnang a lebile phefo ga a kitla a jala peo, e bile yo o lebang maru ga a kitla a roba.+
5 Fela jaaka o sa itse gore moya o bereka jang mo marapong a ngwana yo o mo teng ga* mosadi yo o imileng,+ ka tsela e e tshwanang ga o itse tiro ya Modimo wa boammaaruri, yo o dirang dilo tsotlhe.+
6 Jala peo ya gago mo mosong mme o se ka wa letla seatla sa gago se ikhutsa go fitlha maitseboa;+ gonne ga o itse gore ke efe e e tla melang, e ka tswa e le eno kgotsa ele, kgotsa gore a tsoopedi di tla mela.
7 Lesedi le a itumedisa, e bile go molemo gore matlho a bone letsatsi.
8 Gonne fa motho a ka tshela dingwaga di le dintsi, a a di itumelele tsotlhe fela.+ Le fa go ntse jalo, o tshwanetse go gakologelwa gore malatsi a lefifi a ka nna mantsi; sotlhe se se tla tlang ke lefela.+
9 Itumele wena lekawana, fa o sa ntse o le mosha, mme o letle pelo ya gago gore e itumele mo malatsing a fa o sa ntse o le mosha. Latela ditsela tsa pelo ya gago mme o ye kwa matlho a gago a go isang gone; le fa go ntse jalo, o itse gore Modimo wa boammaaruri o tla go atlhola* ka ntlha ya dilo tseno tsotlhe.+
10 Ka jalo, tlosa dilo tse di bakang mathata mo pelong ya gago, o bo o ntshe dilo tse di gobatsang mo mmeleng* wa gago, ka gonne bosha le matlhagatlhaga a botshelo ke lefela.+
Dintlha Tse di Kwa Tlase
^ Seheb., “mo marapong a a mo popelong ya.”
^ Kgotsa “o tla dira gore o ikarabelele.”
^ Seheb., “mo nameng.”
