THUTO 17
Moshe O ne A Tlhopha go Obamela Jehofa
Ba lelapa la ga Jakobe ba ne ba bidiwa Baiseraele fa ba le kwa Egepeto. Fa Jakobe le Josefa ba sena go tlhokafala, go ne ga busa Faro yo mongwe. O ne a tshaba gore Baiseraele ba ne ba tla nna bantsi go feta Baegepeto. Ka jalo, o ne a dira gore Baiseraele e nne makgoba. O ne a ba pateletsa gore ba dire ditena le go bereka ka thata mo masimong. Mme palo ya Baiseraele e ne e ntse e oketsega le fa Baegepeto ba ne ba ba gatelela. Faro o ne a sa batle go bona seo, ka jalo, o ne a laela gore bana botlhe ba ba sa tswang go tsholwa ba basimane ba bolawe. Baiseraele ba tshwanetse ba bo ba ne ba tshogile tota!
Mosadi mongwe wa Moiseraele e bong Jokebede o ne a na le ngwana yo montle wa mosimane. O ne a mo sireletsa ka go mo tsenya mo serotong a bo a mo fitlha mo lotlhakeng lwa Noka ya Nile. Kgaitsadie ngwana yoo e bong Miriame, o ne a iphitlha gaufi go bona se se tla diregang ka losea loo.
Fa morwadie Faro a ya go tlhapa kwa nokeng, o ne a bona seroto seo. Fa a leba mo teng, o ne a bona ngwana a lela, a bo a mo utlwela botlhoko. Miriame o ne a botsa a re: ‘A ke ye go go batlela mosadi yo o tla anyisang ngwana yono?’ Fa morwadie Faro a sena go dumela, Miriame o ne a ya go bitsa mmaagwe ngwana yoo e bong Jokebede. Morwadie Faro o ne a raya Jokebede a re: ‘Tsaya ngwana yono, o mo anyise mme ke tla go duela.’
Fa ngwana a setse a godile, Jokebede o ne a mo busetsa kwa go morwadie Faro mme a mo raya leina a re ke Moshe le go mo godisetsa mo lelapeng la ga Faro. Moshe o goletse mo lelapeng la segosi, ka jalo, o ne a kgona go nna le sengwe le sengwe se a se batlang. Le fa go ntse jalo, Moshe ga a ka a lebala Jehofa. O ne a itse gore ke Moiseraele e seng Moegepeto. Mme o ne a tlhopha go direla Jehofa.
Fa Moshe a na le dingwaga di le 40, o ne a tlhopha go thusa batho ba gaabo. Fa a bona Moegepeto a itaya lekgoba la Moiseraele, o ne a betsa Moegepeto yoo go fitlha a swa. Mme o ne a fitlha setopo sa gagwe mo mmung. Fa Faro a utlwa ka kgang eo, o ne a leka go bolaya Moshe. Mme Moshe o ne a tshabela kwa nageng ya Bamidiana. Jehofa o ne a mo tlhokomela fa a le koo.
“Ka tumelo fa Moshe a setse a godile, o ne a gana go bidiwa morwa wa ga morwadia Faro, o ne a tlhopha go tshwarwa setlhogo le batho ba Modimo.”—Bahebera 11:24, 25
Tse Dingwe Tse O ka Di Kgatlhegelang
DITSHWANTSHO
Losea Moshe lo a Bonwa
Batho ba ba mo setshwantshong ke bomang? Bala polelo ya Baebele e e mo go Ekesodo 2 mme o utlwe.
DIPOROJEKE TSA THUTO YA LELAPA
Moshe o Golela Kwa Egepeto
Re ka ithuta eng mo botshelong jwa ga Moshe fa a ne a le kwa Egepeto? Itseele diporojeke tseno mme lo tlotle mmogo ka tsone lo le lelapa.
TORA YA TEBELO
Moshe E ne E le Mang?
Monna yono yo o ikanyegang o tlotliwa thata ke Bakeresete, Bajuda, Bamoseleme le batho ba bangwe. O itse eng ka ene?
DIKARATA TSA BATHO BA MO BAEBELENG
Karata ya Baebele ya Miriame
Miriame o ne a letsa seletswa sefe sa mmino? Itseele karata eno ya Baebele mme o ithute mo go oketsegileng ka ene.
DIPOROJEKE TSA BANA
Lelapa la ga Moshe
Lelapa la ga Moshe le ne le direla Jehofa ka boikanyegi. Ithute maina a bangwe ba bone.
