ROTLHE re rata go itumela, ga ke re?— Mme ga se batho botlhe ba ba itumetseng tota. A o a itse gore ke ka ntlha yang?— Ke ka gonne ga ba ise ba itse se se dirang gore ba itumele. Ba akanya gore go nna le dilo tse dintsi ke gone go tla dirang gore ba itumele. Mme fa ba nna le dilo tseno, boitumelo jwa bone ga bo nnele ruri.

Selo sa botlhokwa se se ka dirang gore ba itumele ke seno. Morutisi yo Mogolo o ne a re: “Go na le boitumelo jo bogolo mo go abeng go na le jo bo leng gone mo go amogeleng.” (Ditiro 20:35) Ka jalo, ke eng se se ka dirang gore re itumele?— Ee, ke ka go abela ba bangwe dilo le ka go ba direla dilo. A o ne o itse seo?—

A re akanye gape ka ntlha eno. A Jesu o ne a re motho yo o amogelang dimpho o ne a se kitla a itumela?— Nnyaa, o ne a sa rialo. O a rata go amogela dimpho, ga ke re?— Mongwe le mongwe o a rata. Re a itumela fa re amogela dilo tse dintle.

Mme Jesu o ne a re re itumela le go feta fa  re aba. Ka jalo, o ne o ka re ke mang yo o fileng batho dilo tse dintsi go feta ba bangwe?— Ee, ke Jehofa Modimo.

Baebele ya re Modimo “o naya batho botlhe botshelo le mohemo le dilo tsotlhe.” O re naya pula go tswa kwa legodimong e bile o re tlhabisetsa le letsatsi, mme seno se tlhogisa dijalo mme re kgone go ja dijo. (Ditiro 14:17; 17:25) Ke gone ka moo Baebele e bitsang Jehofa e re ke “Modimo yo o itumetseng”! (1 Timotheo 1:11) Go naya batho ba bangwe dilo ke sengwe sa dilo tse di dirang gore Modimo a itumele. Mme fa re naya ba bangwe dilo, seno se ka dira gore le rona re itumele.

Jaanong, ke eng se re ka se nayang batho ba bangwe? O ne o ka reng?— Ka dinako tse dingwe mpho e tlhoka madi. Fa e le mpho e o e rekang, o tlile go tshwanelwa ke go e duelela. Ka jalo, fa o batla go aba mpho e e ntseng jalo, o ka nna wa tshwanelwa ke go boloka madi go fitlhela o nna le madi a a lekaneng go reka mpho eo.

Mme ga se dimpho tsotlhe tse di rekwang. Ka sekai, fa letsatsi le fisa, motho a ka itumelela galase ya metsi a a tsididi. Ka jalo, fa o siela motho yo o nyorilweng metsi ao, o ka itumelela gore o mo neile sengwe.

Go ka direga gore tsatsi lengwe wena le mmè wa gago lo bake dikuku. Seo e ka nna selo se se itumedisang. Mme o ka dirang ka dingwe tsa dikuku tseo se se ka go itumedisang go feta fa o di ja tsotlhe o le esi?— Ee, o ka naya mongwe wa ditsala tsa gago dingwe tsa dikuku tseo. A o ka rata go dira jalo nako nngwe?—

Morutisi yo Mogolo le baaposetoloi ba gagwe botlhe ba ne ba itse gore go monate jang go aba. A o a itse gore ba ne ba naya batho ba bangwe eng?— Ba ne ba ba naya sengwe se se molemo go di gaisa tsotlhe  mo lefatsheng! Ba ne ba itse boammaaruri ka Modimo, mme ba ne ba itumelela go bolelela ba bangwe dikgang tse di molemo tseno. Ba ne ba dira jalo kwantle ga go dira gore ope a duelele se ba neng ba mmolelela sone.

Tsatsi lengwe moaposetoloi Paulo le tsala ya gagwe e e molemo, e bong morutwa Luke, ba ne ba kopana le mosadi mongwe yo le ene a neng a batla go nna le boitumelo jwa go aba. Ba kopane le ene kwa nokeng. Paulo le Luke ba ne ba ile koo ka gonne ba ne ba utlwile gore e ne e le lefelo la thapelo. Mme ga direga fela jalo gore fa ba fitlha koo, ba fitlhela basadi bangwe ba rapela.

Paulo o ne a simolola go bolelela basadi bano dikgang tse di molemo ka ga Jehofa Modimo le Bogosi jwa gagwe. Mongwe wa bone o ne a bidiwa Lidia, mme o ne a reeditse ka tlhoafalo. Morago ga moo, Lidia o ne a batla go dira sengwe go bontsha gore tota o ne a rata dikgang tse di molemo tse a di utlwileng. O ne a kopa Paulo le Luke jaana: “Fa lo nkatlhotse gore ke a ikanyega mo go Jehofa, tsenang mo ntlong ya me mme lo nne gone.” Mme o ne a ba patelela go ya kwa ntlong ya gagwe.—Ditiro 16:13-15.

Lidia o ne a itumelela gore batlhanka bano ba Modimo ba tsene mo ntlong ya gagwe. O ne a ba rata ka gonne ba mo thusitse go ithuta ka Jehofa le ka Jesu e bile ba mo thusitse go ithuta gore batho ba ka dira jang gore ba tshelele ruri. O ne a itumelela gore o kgonne go naya Paulo le Luke dijo le lefelo le ba ka ikhutsang mo go lone. Ka jalo, go aba ga ga Lidia go ne ga dira gore a itumele, ka gonne tota o ne a batla go aba. Seo ke sengwe se re tshwanetseng go se gakologelwa. Mongwe a ka nna a re bolelela gore re tshwanetse go aba mpho nngwe. Mme fa tota re sa batle, ga re na go itumela fa re dira jalo.

Ka sekai, o ne o ka dirang fa o ne o na le dimonamone tse o neng o batla go di ja? Fa ke ne nka go raya ka re o neye ngwana yo mongwe dingwe tsa tsone, a o ne o ka itumelela go mo naya?— Mme go tweng fa o tshotse dimonamone o bo o kopana le tsala nngwe e o e ratang thata?  Fa o ne o ka akanya ka bowena fela gore o neye tsala ya gago dingwe tsa tsone, a seo se ne se se kitla se go itumedisa?—

Ka dinako tse dingwe re rata motho thata jaana mo e leng gore re batla go mo naya sengwe le sengwe mme rona re sa sale ka sepe. Fa lorato lo re ratang Modimo ka lone lo ntse lo oketsega, re tshwanetse go ikutlwa jalo ka Ene.

Morutisi yo Mogolo o ne a itse ka mosadi mongwe yo o humanegileng yo o neng a ikutlwa jalo. O ne a mmona kwa tempeleng kwa Jerusalema. O ne a na le madinyana a mabedi fela; a se na a mangwe gape. Mme o ne a a tsenya otlhe mo letloleng, a ntsha moneelo wa tempele, kgotsa mpho. O ne a sa patelediwe ke ope go dira jalo. E bile batho ba le bantsi ba ba neng ba le koo ba ne ba sa itse se a se dirileng. O dirile jalo ka gonne o ne a batla le ka gonne o ne a rata Jehofa thata. O ne a itumelela gore o kgonne go aba.—Luke 21:1-4.

Go na le ditsela di le dintsi tse re ka abang ka tsone. A o ka kgona go akanya ka dingwe tsa tsone?— Fa re aba ka gonne tota re batla go aba, re tla itumela. Ke gone ka moo Morutisi yo Mogolo a re bolelelang jaana: “Itlwaetseng go aba.” (Luke 6:38) Fa re dira jalo, re tla dira gore batho ba bangwe ba itumele. Mme rona re tla itumela le go feta!