1, 2. Go larile ntwa efe kwa pele mme re ka ipotsa dipotso dife? (Bona setshwantsho se se kwa tshimologong.)

 GO FETILE dingwaga di le diketekete batho ba bolawa kwa ntweng, go akaretsa le ba bantsintsi ba ba ileng ba bolawa mo dintweng tse pedi tsa lefatshe tse di ileng tsa lowa ka bo1900. Mme gone, ntwa e kgolo go di gaisa tsotlhe e sa ntse e larile kwa pele. Mo ntweng eno, setšhaba se tla bo se sa lwantshe setšhaba se sengwe ka ntlha ya mabaka a bogagapa. Go na le moo, ntwa eo e tla bo e le ‘ntwa ya letsatsi le legolo la Modimo Mothatayotlhe.’ (Tshen. 16:14) Ke eng se se tlileng go dira gore ntwa eno e runye? Mmaba mongwe yo o boikgogomoso o tla tlhasela lefatshe le le botlhokwa thata mo Modimong. Seno se tlile go dira gore Morena Molaodimogolo Jehofa a bontshe gore o na le maatla a a seng kana ka sepe a go baka tshenyo a a iseng a tsamaye a bonwe mo lefatsheng.

² Seno se dira gore re ipotse go re: Mmaba yono ke mang? O tla tlhasela lefatshe lefe? O tla le tlhasela leng mme ka ntlha yang? O tla le tlhasela jang? E re ka ditiragalo tseno di tlile go ama batlhanka botlhe ba ga Jehofa ba ba mo lefatsheng, re tlhoka go itse dikarabo tsa dipotso tseno. Re ka di bona mo boporofeting jo bo kgatlhang jo bo mo go Esekiele kgaolo 38 le 39.

3. Tlhalosa dintlha tsa konokono tsa boporofeti jwa ga Esekiele jo bo ka ga Gogo wa Magogo.

 ³ Bala Esekiele 38:1, 2, 8, 18; 39:4, 11. Dintlha tsa konokono tsa boporofeti jono ke tseno: “Kwa bofelong jwa dingwaga,” mmaba mongwe yo o bidiwang “Gogo wa . . . Magogo” o tla tlhasela “lefatshe” la batho ba Modimo. Seno se tla dira gore bogale jo bogolo jwa ga Jehofa bo tuke, mme o tla lwa le Gogo a bo a mo fenya. a Fa Jehofa a sena go fenya mmaba ono le botlhe ba ba mo emang nokeng, o ba “naya mefuta yotlhe ya dinonyane tse di jang nama le dibatana gore” di ba je. Go tswa foo, Jehofa o fitlha Gogo mo lebitleng. Gore re kgone go tlhaloganya gore boporofeti jono bo tla diragadiwa jang mo nakong e e tlang, re tshwanetse go itse pele gore Gogo ke mang.

4. Ke eng se re ithutileng sone ka Gogo wa Magogo?

⁴ Ka jalo, Gogo wa Magogo ke mang? Go ya ka se se tlhalosiwang mo bukeng ya Esekiele, re ka re Gogo ke mmaba wa batho ba ba obamelang Modimo ka tsela e e mo itumedisang. A Gogo ke leina le lengwe la ga Satane, yo e leng ene mmaba yo mogolo wa batlhanka ba ga Jehofa? Go ne ga feta dingwaga di le dintsi dikgatiso tsa rona di bua jalo. Le fa go ntse jalo, fa re ntse re sekaseka boporofeti jono jwa ga Esekiele ka kelotlhoko, re ile ra lemoga gore re tshwanetse go fetola tsela e re bo tlhaloganyang ka yone. Makasine wa Tora ya Tebelo o ile wa tlhalosa gore Gogo wa Magogo ga se sebopiwa sa moya se se sa bonaleng, go na le moo, ke dipuso tsa lefatshe tse di kopaneng, tse di tlileng go tlhasela batho ba ga Jehofa. b Pele ga re tlotla ka gore ke eng fa re re Gogo ke dipuso tsa lefatshe tse di kopaneng, mma re simolole pele ka go sekaseka dilo di le pedi mo boporofeting jwa ga Esekiele tse di bontshang gore Gogo ga se sebopiwa sa moya.

5, 6. Ke dilo dife mo boporofeting jwa ga Esekiele tse di bontshang gore Gogo wa Magogo ga se sebopiwa sa moya?

⁵ “Ke tla go naya mefuta yotlhe ya dinonyane tse di jang nama le dibatana gore di go je.” (Esek. 39:4) Ka dinako tse dingwe fa Jehofa a tlhagisa batho gore o tla ba otlhaya, o a tle a ba reye a re ditopo tsa bone di tla jewa ke dinonyane. O ile a dira jalo fa a ne a tlhagisa Baiseraele le batho ba e seng Baiseraele. (Dute. 28:26; Jer. 7:33; Esek. 29:3, 5) Ela tlhoko gore go ne go tlhagisiwa batho ba madi le nama, e seng dibopiwa tsa moya. Kana e bile, dinonyane le dibatana tsa naga di ja nama, e seng moya. Ka jalo, se se buiwang mo boporofeting jwa ga Esekiele se re thusa go bona gore Gogo ga se sebopiwa sa moya.

⁶ “Ke tla naya Gogo lebitla mo Iseraele.” (Esek. 39:11) Baebele ga nke e re dibopiwa tsa moya di fitlhwa mo lefatsheng. Go na le moo, ya re Satane le madimona a gagwe ba tla latlhelwa mo khuting e e kwa tengteng dingwaga di le 1 000, mme moragonyana ba tla latlhelwa mo letšheng le le tukang molelo la tshwantshetso. Seno se raya gore ba tla nyelediwa ka bosakhutleng. (Luke 8:31; Tshen. 20:1-3, 10) Ka jalo, e re ka boporofeti jwa ga Esekiele bo re Gogo o tla newa lebitla mo lefatsheng, seno se raya gore Gogo ga se sebopiwa sa moya.

7, 8. “Kgosi ya bokone” e tlile go nyelediwa leng, mme seno se tshwana jang le se se tlileng go diragalela Gogo wa Magogo?

 ⁷ Re kgonne go bona gore ke eng fa re re mmaba yo o tlileng go tlhasela batho ba Modimo yo o bidiwang Gogo, ga se sebopiwa sa moya. Mme gone, ke eng fa re re Gogo ke dipuso tsa lefatshe tse di kopaneng? Mma re sekaseke boporofeti bongwe mo Baebeleng jo bo tla re thusang go bona karabo.

⁸ “Kgosi ya bokone.” (Bala Daniele 11:40-45.) Daniele o ile a bolelela pele gore go tlile go nna le dipuso tse dikgolo tse di neng di tla busa go simologa ka motlha wa gagwe go tla go tsena mo motlheng ono wa rona. Boporofeti bongwe jwa gagwe bo bua ka dipuso tse pedi tse di ganetsanang, e leng “kgosi ya borwa” le “kgosi ya bokone.” Fa dingwaga di ntse di ya, kgosi ya borwa le kgosi ya bokone di ne di ntse di fetoga e re ka dinaga tse di farologaneng di ne di lwela go nna le taolo. Gape Daniele o ne a re “mo motlheng wa bokhutlo,” kgosi ya bokone “e tla tswa e shakgetse thata gore e ye go nyeletsa le go senya ba le bantsi.” Le fa gone kgosi eno e tlhasela batho ba le bantsi, batho ba konokono ba e ba batlang, ke batho ba ga Jehofa. c Mme fela jaaka Gogo wa Magogo, kgosi ya bokone le yone e tla nyelediwa fa e sena go tlhasela batho ba Modimo.

9. Se se tlileng go diragalela Gogo wa Magogo se tshwana jang le se se tlileng go diragalela ‘dikgosi tse di mo lefatsheng lotlhe’?

⁹ ‘Dikgosi tse di mo lefatsheng lotlhe.’ (Bala Tshenolo 16:14, 16; 17:14; 19:19, 20.) Buka ya Tshenolo e ile ya bolelela pele gore ‘dikgosi tsa lefatshe’ di tlile go tlhasela “Kgosi ya dikgosi” e bong Jesu Keresete. Mme e re ka dikgosi tseno di sa kgone go tlhasela Jesu ka gonne a le kwa legodimong, di tla tlhasela balatedi ba gagwe ba ba mo lefatsheng. Dikgosi tseo di tlile go fenngwa kwa ntweng ya Aramagedona. Ela tlhoko gore di tlile go senngwa fa di sena go tlhasela batho ba ga Jehofa, e leng se se tla diragalelang Gogo wa Magogo. d

10. Gogo wa Magogo ke mang?

¹⁰ Go ya ka se re setseng re tlotlile ka sone, re ka reng ka Gogo wa Magogo? Sa ntlha, Gogo ga se sebopiwa sa moya. Sa bobedi, Gogo ke dipuso tsa lefatshe tse di tla tlhaselang batho ba Modimo mo nakong e e tlang. Ntle le pelaelo, dipuso tseno di tlile go tshwanelwa ke gore di kopane. Ke eng fa re rialo? E re ka batho ba Modimo ba nna mo dinageng tse di farologaneng, dipuso tseno di tla tshwanelwa ke gore di dirisane mmogo gore di kgone go ba tlhasela. (Math. 24:9) Le fa gone dipuso e le tsone di tlileng go tlhasela batho ba Modimo, Satane ke ene a tla di tlhotlheletsang gore di ba tlhasele. Go setse go fetile nako e telele a ntse a tlhotlheletsa batho gore ba bogise batlhanka ba ga Jehofa. (1 Joh. 5:19; Tshen. 12:17) Mme gone, re tshwanetse go nna re gopotse gore boporofeti jwa ga Esekiele jo bo buang ka Gogo wa Magogo, bo bua ka dipuso tsa lefatshe tse di tlileng go tlhasela batho ba ga Jehofa. e

11. Boporofeti jwa ga Esekiele bo a re “lefatshe” le Gogo a tlileng go le tlhasela le ntse jang?

¹¹ Jaaka re bone mo  serapa 3, Gogo wa Magogo o tlile go tlhasela lefatshe le le botlhokwa thata mo go Jehofa mme seno se tlile go dira gore Jehofa a galefe. O tlile go tlhasela lefatshe lefe? Mma re  boele gape kwa boporofeting jwa ga Esekiele. (Bala Esekiele 38:8-12.) Boporofeti jono bo a re Gogo “o tla tlhasela lefatshe le batho ba lone ba neng ba boa” le ba ba ileng ba “phuthiwa gape go tswa kwa ditšhabeng tse dingwe.” Gape ela tlhoko gore boporofeti jono bo a re batho ba ga Jehofa ba ba nnang mo lefatsheng leno, ‘ba nna ka pabalesego’ metsana ya bone ga e a sirelediwa ka dipota, ga e na mephakalego kgotsa dikgoro e bile ba ‘kokoanya dikhumo.’ Batlhanka botlhe ba ga Jehofa ba ba mo dinageng tse di farologaneng ba nna mo lefatsheng leno. Ke lefatshe lefe?

12. Go ile ga direga eng ka lefatshe la Iseraele ka nako ya go kwalwa ga Baebele?

¹² Gore re bone karabo, mma re tlotle ka se se ileng sa direga kwa lefatsheng la Iseraele, le go neng ga feta dingwaga di le dintsi batho ba Modimo ba nna, ba bereka e bile ba obamela Jehofa mo go lone. Fa Baiseraele ba ne ba simolola go tlhanogela Jehofa, Jehofa o ile a dirisa Esekiele go bolelela pele gore lefatshe la bone le ne le tla senngwa le gore le ne le tla kgakgabala. (Esek. 33:27-29) Mme gape Jehofa o ile a bolelela pele gore batho ba le mmalwa ba ne ba tla gololwa mo botshwarwa kwa Babelona, ba bo ba boela kwa lefatsheng la bone gore ba boe ba obamele Jehofa ka tsela e e mo itumedisang. Jehofa o ne a tla ba segofatsa mme lefatshe la Iseraele le ne le tla nna lentle e bile le ne le tla ungwa jaaka “tshingwana ya Edene.” (Esek. 36:34-36) Seno se ile sa direga go simologa ka 537 B.C.E. fa Bajuda ba ne ba boela kwa Jerusalema gore ba boe ba obamele Jehofa mo lefatsheng la bone.

13, 14. (a) Lefatshe la tshwantshetso ke eng? (b) Goreng lefatshe leno le le botlhokwa mo go Jehofa?

¹³ Go ile ga direga se se tshwanang le ka batlhanka ba Modimo ba mo motlheng ono. Jaaka re ithutile mo Kgaolo 9, batho ba Modimo ba ile ba gololwa mo botshwarwa jwa Babelona yo Mogolo ka 1919.  Mo go one ngwaga oo, Jehofa o ile a busetsa batlhanka ba gagwe mo lefatsheng la bone la tshwantshetso. Lefatshe leo, ke paradaise ya rona ya tshwantshetso, e leng lefelo le le sireletsegileng le re obamelang Jehofa mo go lone re itumetse. Mo lefatsheng leno la tshwantshetso, re nna mmogo ka pabalesego le kagiso. (Diane 1:33) Re rutiwa dithuto tse di re thusang gore re nne le tumelo e e nonofileng e bile re dira tiro e e itumedisang ya go bolelela batho ka Bogosi Jwa Modimo. Re bona boammaaruri jwa mafoko ano a a mo go Diane: “Tshegofatso ya ga Jehofa ke yone e e humisang motho, mme ga a e oketse ka botlhoko.” (Diane 10:22) Batho botlhe ba ga Jehofa ba nna mo lefatsheng leno la tshwantshetso le fa ba ka tswa ba nna mo nageng efe, fa fela ba tswelela ba mo obamela ka tsela e e mo itumedisang.

¹⁴ Lefatshe leno la tshwantshetso le botlhokwa tota mo go Jehofa. Ka ntlha yang? Ka gonne Jehofa o ile a thusa baagi ba lone gore ba mo obamele ka tsela e e mo itumedisang e bile a re batho bano ke “dilo tse di tlhwatlhwakgolo tse di tswang mo ditšhabeng tsotlhe.” (Hag. 2:7; Joh. 6:44) Baagi ba lefatshe leno ba dira ka natla go apara botho jo bosha e bile ba leka ka natla gore ba nne le botho jo bo tshwanang le jwa Modimo. (Baef. 4:23, 24; 5:1, 2) Ba direla Modimo ka natla, mme ba dira jalo ka tsela e e dirang gore Modimo a galalediwe. Gape ba dira dilo tse di bontshang gore ba a mo rata. (Bar. 12:1, 2; 1 Joh. 5:3) Jehofa o tshwanetse a bo a itumela tota fa a bona batlhanka ba gagwe ba tsaya matsapa go dira gore lefatshe la tshwantshetso le ba nnang mo go lone le nne lentle. Ka jalo, o se ka wa lebala gore fa go obamela Jehofa go le botlhokwa thata mo go wena,  ga o dire fela gore paradaise ya rona ya tshwantshetso e nne ntle, gape o dira gore Jehofa a itumele.​—Diane 27:11.

15, 16. Gogo wa Magogo o tlile go tlhasela leng lefatshe la rona la tshwantshetso?

¹⁵ Go itse gore go ise go ye kae dipuso tsa lefatshe leno di tla kopana di bo di tlhasela lefatshe la rona la tshwantshetso, go dira gore re akanyetse kwa teng. E re ka go tlile go tlhaselwa batlhanka botlhe ba ga Jehofa, seno se dira gore re ipotse dipotso dingwe.

¹⁶ Gogo wa Magogo o tlile go tlhasela leng lefatshe la rona la tshwantshetso? Boporofeti jwa ga Esekiele bo a re: “Kwa bofelong jwa dingwaga o tla tlhasela lefatshe.” (Esek. 38:8) Go raya gore seno se tla direga fa bokhutlo bo setse bo le gaufi. O se ka wa lebala gore pitlagano e kgolo e tlile go simologa fa go senngwa Babelona yo Mogolo, e leng mmusomogolo wa bodumedi jwa maaka. Gogo o tla tlhasela batlhanka ba ga Jehofa fa madumedi a maaka a sena go senngwa, mme o tla dira jalo pele ga ntwa ya Aramagedona e simologa.

17, 18. Jehofa o tlile go dira eng ka nako ya pitlagano e kgolo?

¹⁷ Goreng Gogo a tlile go tlhasela lefatshe la rona la tshwantshetso? Boporofeti jwa ga Esekiele bo umaka mabaka a mabedi. Sa ntlha, o tla bo a tlhotlhelediwa ke Jehofa, sa bobedi, o tla bo a tlhotlhelediwa ke maitlhomo a gagwe a a bosula.

 ¹⁸ Jehofa o tla mo tlhotlheletsa. (Bala Esekiele 38:4, 16.) Ela tlhoko gore Jehofa o raya Gogo a re: “Ke tla tsenya dihuku mo ditlhaeng tsa gago” e bile “ke tla dira gore o tlhasele lefatshe la me.” A seno se raya gore Jehofa o tla dira gore dipuso di tlhasele batho ba gagwe di sa batle? Nnyaa. Jehofa a ka se dire gore batho ba gagwe ba diragalelwe ke dilo tse di bosula. (Jobe 34:12) Mme gone, Jehofa o a itse gore Gogo o tlhoile batlhanka ba gagwe, e bile o a itse gore fa a ka bulegelwa ke tshono ya gore a ba nyeletse, o tla e tsaya ka diatla tsoopedi. (1 Joh. 3:13) Ka jalo, Jehofa o tlile go netefatsa gore dilo di direga ka tsela e a e batlang le ka nako ya gagwe. Fa Babelona yo Mogolo a sena go senngwa, Jehofa o tla tsenya dihuku mo ditlhaeng tsa ga Gogo. Go tla nna jaaka e kete o mo gogela gore a dire se se setseng se le mo pelong ya gagwe. Gogo o tlile go bona seno e le tshono ya gore a nyeletse batho ba ga Jehofa. Fa a tlhasela batho ba ga Jehofa, seo se tlile go felela ka ntwa ya Aramagedona, e leng ntwa e kgolo go di gaisa tsotlhe tse di kileng tsa nna gone. Jehofa o tla sireletsa batho ba gagwe, o tla tlotlomatsa bolaodi jwa gagwe e bile o tla itshepisa leina la gagwe.​—Esek. 38:23.

19. Ke eng se se tla dirang gore Gogo a leke go re thibela gore re se ka ra tlhola re obamela Jehofa?

¹⁹ O tla tlhotlhelediwa ke maitlhomo a gagwe a a bosula. Dipuso tsa lefatshe di tlile go “loga leano le le bosula.” E re ka go fetile nako e  telele di tlhoile batlhanka ba ga Jehofa, di tlile go ba tlhasela. Ka nako eo, go tla lebega e kete batlhanka ba ga Jehofa ga ba a sireletsega, jaaka e kete ba nna “mo metsaneng e e sa sirelediwang ka dipota, e e se nang mephakalego kgotsa dikgoro.” Dipuso tseno di tlile go ‘gapa dilo tse dintsi’ mo go ba ba “kokoanyang dikhumo.” (Esek. 38:10-12) Go buiwa ka “dikhumo” dife? Selo se se tlhwatlhwakgolo go di gaisa tsotlhe se re nang le sone ke tshiamelo e re nang le yone ya go obamela Jehofa ka tsela e e mo itumedisang, mme re obamela ene fela. Dipuso di tla leka go re thibela gore re se ka ra obamela Jehofa ka gonne di tlhoile kobamelo ya boammaaruri e bile di tlhoile batho ba ga Jehofa.

20. Gogo o tlile go tlhasela jang lefatshe la rona la tshwantshetso?

²⁰ Gogo o tlile go tlhasela jang lefatshe la rona la tshwantshetso? Dipuso di ka nna tsa leka go re thibela gore re se ka ra obamela Jehofa ka tsela e re tlwaetseng go mo obamela ka yone. Ka sekai, di ka nna tsa leka go dira gore re se ka ra tlhola re kgona go amogela dithuto tse di nonotshang tumelo ya rona, re se ka ra tlhola re kopana mmogo, re se ka ra utlwana le gore re se ka ra tlhola re rera dikgang tse di molemo tsa Bogosi. Dilo tseno ke tsone di dirang gore re itumelele go direla Jehofa mo paradaiseng ya rona ya tshwantshetso. Satane o tla leka go tlhotlheletsa dipuso gore di leke go nyeletsa kobamelo ya boammaaruri le batho ba ba obamelang Jehofa ka tsela e e mo itumedisang.

21. Goreng o lebogela go bo Jehofa a sa re tlogela fela mo lefifing ka se se tlileng go direga?

²¹ Gogo wa Magogo o tlile go tlhasela batlhanka botlhe ba ga Jehofa mo lefatsheng la bone la tshwantshetso le ba le neilweng ke Modimo. Eleruri, re leboga go bo Jehofa a sa re tlogela re le mo lefifing ka se se tlileng go direga. Fa re ntse re emetse pitlagano e kgolo, a re direng sotlhe se re ka se kgonang gore re tseye go obamela Jehofa go le botlhokwa go gaisa sengwe le sengwe. Fa re dira jalo, re tla nna le tsholofelo ya go bona sengwe se se kgatlhang fela thata. Re tla nna le tsholofelo ya go bona fa Jehofa a sireletsa batho ba gagwe e bile a tlotlomatsa leina la gagwe kwa ntweng ya Aramagedona. Re tla bona gore o tla dira seo jang mo kgaolong e e latelang.