Jesu o ya kwa motseng mongwe wa Eferaime, kwa bokonebotlhaba jwa Jerusalema gore a kgoreletse leano la maloko a Sanehederine la go batla go mmolaya. O nna koo le barutwa ba gagwe, kgakala le baba ba gagwe. (Johane 11:54) Le fa go ntse jalo, Tlolaganyo ya 33 C.E. e a atamela, ka jalo Jesu o tshwanetse go tsamaya gape. O ralala Samarea a bo a ya kwa bokone kwa Galalea, mme ke lekgetlo la bofelo a etela kgaolo eno pele ga a bolawa.

Fa Jesu a simolola loeto lono a etela metsana e e farologaneng, o kopana le banna ba le lesome ba ba nang le lepero. Mefuta e mengwe ya bolwetse jono, e kgona go dira gore mesifa ya mmele wa motho e se ka ya bereka, e e jaaka mesifa ya menwana ya diatla, ya menwana ya maoto le ya ditsebe. (Dipalo 12:10-12) Molao wa Modimo o laela gore molepero a goe a re, “Boitshekologo, boitshekologo!” le gore a se ka a nna le batho ba bangwe.—Lefitiko 13:45, 46.

Ka jalo, balepero bano ba emetse kgakala le Jesu. Le fa go ntse jalo, ba goa ba re: “Jesu, Morutisi, re utlwele botlhoko!” Fa Jesu a ba bona, o ba raya a re: “Tsamayang lo ye go itshupa kwa baperesiting.” (Luke 17:13, 14) O bontsha gore o tlotla Molao wa Modimo, ka gonne go ya ka molao oo, baperesiti ke bone ba ba tshwanetseng go bolela gore balepero ba fodile. Go tswa foo e bo e le gone ba ka nnang le batho ba bangwe ba ba sa lwaleng.—Lefitiko 13:9-17.

Balepero bano ba dumela gore Jesu o na le maatla a go dira dikgakgamatso. Ka jalo ba ya kwa baperesiting, tota le pele ga ba fodisiwa. Fa ba ntse ba le mo tseleng, ba bona diphelelo tse di molemo tsa go dumela mo go Jesu. Ba simolola go bona gore ba fodisitswe e bile ba ikutlwa ba na le botsogo jo bo siameng!

Ba le robongwe mo banneng bano ba tswelela ka loeto lwa bone. Mme a le mongwe o a boa. Monna yono wa Mosamarea, o ya go batla Jesu. O mmatlela eng? Gore a mo lebogele se a mo diretseng sone. Monna yono o “galaletsa Modimo ka lentswe le le kwa godimo,” ka gonne o a bona gore tota Modimo ke ene a mo fodisitseng. (Luke 17:15) Fa a bona Jesu, o khubama fa pele ga gagwe a bo a mo leboga.

Jesu o raya batho ba ba nang le ene a re: “Go ne ga fodisiwa banna ba le lesome, gakere? Jaanong ba bangwe ba ba robongwe ba kae? A ga go na yo mongwe gape yo o neng a boa a tla go galaletsa Modimo ntle le monna yono wa setšhaba se sele?” Go tswa foo, o raya Mosamarea yono a re: “Ema o tsamaye, tumelo ya gago e go fodisitse.”—Luke 17:17-19.

Kgang ya go bo Jesu a kgonne go fodisa balepero bano ba ba lesome, e bontsha gore Jehofa Modimo o mo emang nôkeng. Se Jesu a se dirileng se thusitse monna yono gore a fole, mme gape go ka direga gore se mo thusitse go tsamaya mo tseleng e e isang botshelong. Ga re tshele mo nakong e mo go yone Modimo a dirisang Jesu go fodisa batho ka kgakgamatso. Le fa go ntse jalo fa re dumela mo go Jesu, re ka nna mo tseleng e e isang botshelong, e leng botshelo jo bo sa khutleng. A le rona re bontsha gore re a leboga, fela jaaka monna wa Mosamarea a ile a dira?