Jesu a ka tswa a buile ka setshwantsho sa nku e e latlhegileng le sa ledi la derakema le le latlhegileng fa a ne sa ntse a le kwa Perea, kwa botlhaba jwa Noka ya Joredane. Ditshwantsho tseno tse pedi di re ruta gore re tshwanetse go itumela fa moleofi a ikwatlhaya a bo a boela kwa Modimong. Bafarasai le bakwadi ba ntse ba kgala Jesu ka gonne a amogela batho ba ba ntseng jalo. A mme gone batho bano ba ba ratang go tshwayatshwaya diphoso, ba ithuta sengwe mo ditshwantshong tseno? A ba tlhaloganya tsela e Rraarona yo o kwa legodimong a ikutlwang ka yone ka baleofi ba ba ikwatlhayang? Jaanong Jesu o dira setshwantsho se sengwe se se amang pelo, se se gatelelang thuto eo ya botlhokwa.

Setshwantsho seno se bua ka rre yo o nang le barwa ba le babedi, mme mo go sone go buiwa thata ka morwa yo mmotlana. Bafarasai le bakwadi, le batho ba bangwe ba ba reeditseng Jesu, ba tshwanetse go ithuta sengwe mo go se se buiwang ka morwa yono yo mmotlana. Le fa go ntse jalo, ga ba a tshwanela go itlhokomolosa se Jesu a se buang ka rre le ka morwa yo mogolo, ka gonne tsela e ba itshwarang ka yone e ka ba ruta thuto ya botlhokwa. Ka jalo, akanya ka banna bano ba bararo fa Jesu a ntse a bua setshwantsho seno.

O simolola jaana: “Monna mongwe o ne a na le bana ba basimane ba le babedi. Mme yo mmotlana o ne a raya rraagwe a re, ‘Rra, nneye karolo ya leruo la gago e e neng e tla nna boswa jwa me.’ Ka jalo, o ne a ba kgaoganyetsa dilo tse a nang le tsone.” (Luke 15:11, 12) Ela tlhoko gore morwa yono yo mmotlana ga a kope boswa jwa gagwe ka gonne rraagwe a tlhokafetse. Rraagwe o sa ntse a tshela. Le fa go ntse jalo, morwa yono o batla karolo ya gagwe gone jaanong gore a ikemele le go dirisa boswa jono jaaka a batla. Ke eng se a batlang go se dira?

Jesu o tlhalosa jaana: “Morago ga malatsi a le mmalwa, morwawe yo mmotlana o ne a phutha dilo tsa gagwe tsotlhe a bo a ya kwa nageng e e kgakala, mme fa a le koo o ne a di dirisa botlhaswa ka go tshela botshelo jwa botlhapelwa.” (Luke 15:13) Go na le gore morwa yono a nne mo gabone a sireletsegile, a na le rraagwe yo o ba tlhokomelang e bile a ba tlamela, o fudugela kwa nageng e sele. Fa a le  koo, o dirisa boswa jwa gagwe botlhaswa, a dira boitsholo jo bo sa siamang jwa tlhakanelodikobo. Morago ga moo o nna le mathata, fela jaaka Jesu a tswelela a re:

“Fa a sena go fetsa dilo tsa gagwe tsotlhe, go ne ga nna leuba le legolo mo nageng eo yotlhe, mme o ne a simolola go sotlega. O ile a bo a ikopanya le mongwe wa baagi ba naga eo, yo o neng a mo romela kwa masimong a gagwe gore a ye go disa dikolobe. Mme o ne a tshwerwe ke tlala thata mo a neng a eletsa go ja dijo tse dikolobe di neng di di ja, le fa go ntse jalo, go ne go se na ope yo o mo nayang sepe.”—Luke 15:14-16.

Go ya ka Molao wa Modimo, dikolobe e ne e le diphologolo tse di seng phepa, le fa go ntse jalo morwa yono o patelesega go bereka e le modisa wa dikolobe. O bolawa ke tlala, mme seo se dira gore a eletse go ja dijo tse ka tlwaelo di jewang ke diphologolo fela. Fa a ntse a le mo mathateng jalo e bile a tlaletswe, o a “itharabologelwa.” O dira eng? O ipolelela jaana: “Batho ba ba berekelang rre ba na le dijo tse dintsi tota, mme nna ke bolawa ke tlala fano! Ke tla tsamaya ke ya kwa go rre ke bo ke mo raya ke re: ‘Rra, ke leofetse Modimo e bile ke go leofetse. Ga ke tlhole ke tshwanelega go bidiwa morwao. Ntseye jaaka mongwe wa ba ba go berekelang.’” Go tswa foo, o a tsamaya o ya kwa go rraagwe.—Luke 15:17-20.

Rraagwe o tla tsiboga jang? A o tla mo galefela a bo a mo omanyetsa go bo a ile a dira boeleele ka go tswa mo gae? A o tla gana go mo utlwela botlhoko a bo a sa mo amogele? Fa e ne e le wena, o ne o tla tsiboga jang? O ne o tla dira eng fa e ne e le morwao kgotsa morwadio?

Jesu o tlhalosa kafa rre yono a ikutlwang ka gone le se a se dirang, a re: “Fa [morwawe] a sa ntse a le kgakala thata, rraagwe o ne a mmona mme a tlhomoga pelo, o ne a mo tabogela, a mo tlamparela a bo a mo suna.” (Luke 15:20) Tota le fa rre yono a utlwile gore morwawe o tshela botshelo jwa botlhapelwa, o a mo amogela. A baeteledipele ba Bajuda, ba ba ithayang ba re ba itse Jehofa e bile ba a mo obamela, ba tla bona gore Rraarona yo o kwa legodimong o ikutlwa jang ka baleofi ba ba ikwatlhayang? A gape ba tla lemoga gore Jesu o ntse a etsa Modimo ka go amogela batho ba ba ntseng jalo?

E re ka rre yono a na le temogo, a ka tswa a bona mo sefatlhegong sa ga morwawe se se hutsafetseng gore ruri o ikwatlhaile. Mo godimo ga moo, go nna motlhofo gore morwa yono a ipolele maleo ka gonne rraagwe a ile a tsaya kgato pele go mmontsha lorato ka go mo dumedisa. Jesu a re: “Foo morwawe o ne a mo raya a re, ‘Rra, ke leofetse Modimo e bile ke go leofetse. Ga ke tlhole ke tshwanelega go bidiwa morwao.’”—Luke 15:21.

Rre yono o raya batlhanka ba gagwe a re: “Itlhaganeleng! tlang ka seaparo se seleele se sentlentle, mme lo mo apese lo bo lo mo rwesa palamonwana le ditlhako. Gape tlisang namane e e nonneng, lo e tlhabe, mme a re jeng re itumelele gore o boile, ka gonne morwaake o ne a sule mme jaanong o a tshela; o ne a latlhegile mme o bonwe.” Go tswa foo ba simolola “go ijesa monate.”—Luke 15:22-24.

Fa seno se direga, morwa yo mogolo o kwa tshimong. Jesu o bua jaana ka ene: “Fa a boa, a le gaufi le ntlo o ne a utlwa mmino le batho ba bina. Ka jalo, o ne a bitsa mongwe wa batlhanka mme a mmotsa gore go diragala eng. O ne a mo raya a re, ‘Morwarrago o boile, mme rrago o tlhabile namane e e nonneng, ka gonne o boetse gae a sireletsegile.’ Le fa go ntse jalo, o ne a tenega mme a gana go tsena. Foo rraagwe o ne a tswa mme a mo kopa gore a tsene mo teng. O ne a raya rraagwe a re, ‘Ke feditse dingwaga di le dintsi thata ke le motlhanka wa gago e bile ga ke ise ke tlole ditaelo tsa gago le ka motlha, le fa go ntse jalo, ga o ise o ke o nneye potsane gore  ke itumele le ditsala tsa me. Mme jaanong fa morwa yono wa gago yo o dirisitseng dilo tsa gago botlhaswa a na le diaka a goroga, o ne wa mo tlhabela namane e e nonneng.’”—Luke 15:25-30.

Ke bomang ba ba tshwanang le morwa yono yo mogolo, ba ba ntseng ba kgala Jesu fa a utlwela batho ba maemo a a kwa tlase le baleofi botlhoko e bile a ba kgathalela? Ke bakwadi le Bafarasai. Go kgala Jesu ga bone ke gone mo go dirileng gore a bue setshwantsho seno. Boammaaruri ke gore mongwe le mongwe yo o sa itumeleng fa Modimo a bontsha ba bangwe kutlwelobotlhoko, o tshwanetse go akanya thata ka thuto eno.

Jesu o konela setshwantsho sa gagwe ka go tlhalosa gore rre o kopa morwa yo mogolo a re: “Morwaaka, o ntse o na le nna ka metlha, e bile dilo tsotlhe tsa me ke tsa gago. Mme gone, re ne re tshwanetse go itumelela gore morwarrago o boile, ka gonne o ne a sule mme jaanong o a tshela; o ne a latlhegile mme o bonwe.”—Luke 15:31, 32.

Jesu ga a tlhalose gore kgabagare morwa yo mogolo o ile a dira eng. Le fa go ntse jalo, fa Jesu a sena go swa le go tsosiwa mo baswing, “baperesiti ba bantsintsi ba ne ba nna badumedi.” (Ditiro 6:7) Bangwe ba bone e ka tswa e le ba ba utlwileng Jesu a bua setshwantsho seno se se amang pelo. Ga go pelaelo gore le bone ba ne ba kgona go itharabologelwa, ba ikwatlhaya ba bo ba boela kwa Modimong.

Go tloga ka letsatsi leo, barutwa ba ga Jesu ba ka akanya thata ka dithuto tsa botlhokwa tse a neng a di gatelela mo setshwantshong seno, e bile ba tshwanetse go dira jalo. Thuto ya ntlha ke ya gore go botlhale gore re tswelele re le karolo ya batho ba Modimo, re tlhokometswe ke Rraarona yo o re ratang le yo o re tlamelang, go na le go kgarakgatshega re ya kwa “nageng e e kgakala” re lelekisa menate.

Thuto ya bobedi ke gore, fa re ka fapoga mo tseleng ya Modimo, re tshwanetse go nna boikokobetso mme re boele kwa go Rraarona ka gonne o tla re amogela gape.

Thuto e nngwe e re ithutang yone ke pharaloganyo e e le teng magareng ga tsela e rre le morwa yo mogolo ba itshwarang ka yone. Rre o ne a amogela morwawe yo mmotlana le go mo itshwarela, mme morwa yo mogolo ene o ne a gana go amogela monnawe le go mo itshwarela. Ga go pelaelo gore batlhanka ba Modimo ba batla go itshwarela le go amogela batho ba ba ileng ba tlogela go direla Modimo mme jaanong ba ikwatlhaya ba bo ba boela kwa ‘ntlong ya ga Rraabone.’ A re itumeleleng gore morwa ‘yo o neng a sule jaanong o a tshela’ le gore morwa ‘yo o neng a latlhegile o bonwe.’