Morago ga gore Jesu a fetse malatsi a le mabedi kwa Samarea, o ya kwa kgaolong ya gaabo. O feditse nako e ntsi a rera kwa Judea, mme ga a boele Galalea go ya go ikhutsa. Go na le moo, o simolola bodiredi jwa gagwe jo bo oketsegileng kwa motseng o a goletseng kwa go one. Ga a lebelela gore a amogelwe sentle koo, ka gonne fela jaaka a buile, “moporofeti ga a tlotliwe mo nageng ya gagabo.” (Johane 4:44) Mme balatedi ba gagwe ba boela kwa magaeng a bone le kwa ditirong tse ba neng ba di dira go na le gore ba nne le ene.

Jesu o simolola go rera molaetsa ofe? Molaetsa wa gagwe o a re: “Bogosi Jwa Modimo bo atametse. Ikwatlhayeng, mme lo dumele dikgang tse di molemo.” (Mareko 1:15) Batho ba tsibogela jang molaetsa ono? Batho ba le bantsi mo Galalea ba a mo amogela e bile ba a mo tlotla. Mme ga ba dire seo fela ka ntlha ya molaetsa o a o rerang. Bangwe ba bone ba ne ba ile go keteka Tlolaganyo kwa Jerusalema dikgwedi tse di fetileng mme ba bone dikgakgamatso tse Jesu a ileng a di dira.—Johane 2:23.

Jesu o simolola bodiredi jwa gagwe kae fa a le kwa Galalea? Go bonala a simolola kwa Kana, kwa a ileng a fetola metsi go nna beine gone, fa a ne a le kwa lenyalong. Fa Jesu a le kwa Kana lekgetlo la bobedi, o utlwalela gore go na le mosimane mongwe yo o lwalang thata e bile o tloga a swa. Rraagwe ke modiredimogolo mo pusong ya ga Herode Antipase, kgosi e moragonyana e ileng ya kgaola Johane Mokolobetsi tlhogo. Modiredi yono o utlwalela gore Jesu o mo Kana. Ka jalo, monna yono o tswa kwa legaeng la gagwe kwa Kaperenama mme o ya kwa Kana go ya go batla Jesu. O raya Jesu a re: “Morena, itlhaganele pele ga ngwanake yo mmotlana a swa.”—Johane 4:49.

Jesu o mo araba ka tsela e e gakgamatsang a re: “Tsamaya; morwao o fodile.” (Johane 4:50) Monna yono o dumela se Jesu a se buang a bo a boela gae. Fa a le mo tseleng, o kgatlhantshiwa ke batlhanka ba gagwe, ba ba itlhaganeletseng go tla go mmolelela dikgang tse di monate tsa go re morwawe o fodile. O leka go tlhaloganya se se diragetseng, ka jalo ‘o ba botsa gore o fodile leng.’

Ba mo raya ba re: “Letshoroma le ne la mo tlogela maabane mo e ka nnang ka 1:00 motshegare.”—Johane 4:52.

Rre yoo o lemoga gore ke yone ura e Jesu a neng a mo raya a re, “Morwao o fodile.” Morago ga moo, monna yono yo o humileng le botlhe ba ba nnang mo ntlong ya gagwe ba nna barutwa ba ga Keresete.

Kana ke motse o Jesu a ileng a dira dikgakamatso tse pedi kwa go one, o ile a fetola metsi go nna beine mme gape o ile a fodisa mosimane yo o neng a le dikilometara di ka nna 26 go tloga kwa go ene. Mme gone, tseno ga se tsone fela dikgakgamatso tse a ileng a di dira. Kgakgamatso eno ya bobedi e botlhokwa ka gonne e bontsha gore jaanong Jesu o simolola bodiredi jwa gagwe mo Galalea. Eleruri ke moporofeti wa Modimo, mme gone, a ‘moporofeti yono o tla tlotliwa mo nageng ya gagabo’?

Go tla bonala fa a ya kwa gaabo kwa Nasaretha. O tla dira eng fa a fitlha koo?