Jesu o tlhotse a bereka thata, mme jaanong o lapile. Fa go nna maitseboa, o raya barutwa ba gagwe a re: “A re kgabaganyetseng ka kwa letlhakoreng le lengwe la lewatle,” le le lebaganeng le karolo ya Kaperenama.—Mareko 4:35.

Kwa botlhaba jwa lotshitshi lwa Lewatle la Galalea, ke kgaolo ya Bagerasa. Kgaolo eno gape e bidiwa Dekapolise. Metse ya Dekapolise e tletse ka ngwao ya Segerika, le fa gone go na le Bajuda ba bantsi ba ba nnang koo.

Batho ba a lemoga fa Jesu a tsamaya a tswa mo Kaperenama. Mekoro e mengwe le yone e simolola go kgabaganya lewatle. (Mareko 4:36) Tota ga go tseye lobaka lo loleele go kgabanya lewatle leno. Lewatle la Galalea le tshwana le letšha le legolo, le boleele jwa dikilometara di ka nna 21 le bophara jwa dikilometara di ka nna 12. Mme gone, le boteng.

Le fa gone Jesu a itekanetse, o lapisitswe ke tiro e a tlhotseng a e dira. Ka jalo, fa ba sena go tsamaya sekgalanyana, o rapama kwa morago mo mokorong a bo a thulamela.

Bangwe ba baaposetoloi ba gagwe ba itse go tsamaisa mokoro, mme mo lekgetlong leno ga go tle go nna motlhofo. Lewatle la Galalea le dikologilwe ke dithaba, e bile gantsi metsi a teng a bothitho. Ka dinako tse dingwe, phefo e e tsididi e e tswang mo dithabeng e fologela ka bonako e bo e kopana le metsi a a bothitho, mme ka tshoganyetso e bo e baka setsuatsue mo lewatleng. Ke sone se se diregang. Ka bonako fela, makhubu a simolola go itaagana le mokoro. O simolola ‘go tlala metsi e bile o tloga o nwela.’ (Luke 8:23) Mme Jesu ene o ithobaletse.

Banna bano ba leka ka natla go tsamaisa mokoro, ba dirisa maitemogelo a ba nang le one a go tsamaya mo lewatleng go na le ditsuatsue. Mme gompieno maemo a farologane. E re ka ba bona gore matshelo a bone a mo kotsing, ba tsosa Jesu ba goa ba re: “Morena, re boloke, re tloga re swa!” (Mathaio 8:25) Barutwa bano ba tshogile, ba akanya gore ba tloga ba nwela!

Fa Jesu a tsoga, o ba raya a re: “Ke ka ntlha yang fa lo tshogile thata jaana, lona ba lo nang le tumelo e potlana?” (Mathaio 8:26) Go tswa foo, o kgalema phefo le lewatle a re: “Kgaotsa o didimale!” (Mareko 4:39) Phefo e e galefileng e a kgaotsa e bile lewatle le a sisibala. (Fa Mareko le Luke ba tlhalosa tiragalo eno e e kgatlhang, sa ntlha ba tlhalosa gore Jesu o didimatsa setsuatsue ka kgakgamatso, go tswa foo ba bo ba umaka ntlha ya gore barutwa ba na le tumelo e potlana.)

Akanya fela gore tiragalo eno e ama barutwa bano jang! Ba sa tswa go bona lewatle le galefile, mme jaanong go na le tshisibalo e kgolo. Ba aparelwa ke letshogo. Mme ba raana ba re: “Tota motho yono ke mang? Tota le phefo le lewatle di a mo ikobela.” Ba kgabaganyetsa ka kwa letlhakoreng le lengwe la lewatle ba babalesegile. (Mareko 4:41–5:1) Gongwe mekoro e mengwe e e neng e le mo lewatleng e ka tswa e boetse kwa lotshitshing lo lo kwa bophirima.

Ruri go a kgothatsa go itse gore Morwa Modimo o na le maatla a go laola maemo a bosa! Fa a tla bo a busa lefatshe, batho botlhe ba tla nna ka pabalesego, ka gonne go tla bo go sa tlhole go na le masetlapelo a tlholego.