Malapa A a Se Nang Borre—Sesupo sa Metlha

O NE o ka re bothata jo bogolo thata mo bathong mo motlheng wa gompieno ke bofe? Mo e ka nnang diperesente di le 80 tsa batho ba ba botsoloditsweng mo patlisisong ya ga Gallup kwa United States ba dumela gore ke “go tlhoka rre mo gae.” Go ya ka Gallup, bana ba ba fetang dimilione di le 27 kwa United States ga ba nne le borraabone ba tlholego mme palo eo e oketsega ka bonako. Pego e e ntshitsweng ke United Nation’s Children’s Fund e bolela gore diperesente di ka nna 50 tsa bana ba basweu ba ba tsholetsweng kwa United States fa e sa le ka 1980 “ba tla fetsa karolo nngwe e e rileng ya bongwana jwa bone ba le mo lelapeng la motsadi yo o se nang molekane. Mo baneng ba bantsho gone go lekanyediwa mo e ka nnang 80%.” Ka gone USA Today e supile gore United States “e di goga kwa pele mo lefatsheng ka malapa a a se nang borre.”

Le fa go ntse jalo, setlhogo sengwe mo go The Atlantic Monthly se akgetse jaana: “Go oketsega ga malapa a a thubegang ga se bothata jwa kwa Amerika fela. Bo teng mo e ka nnang mo dinageng tsotlhe tse di gatetseng pele, go akaretsa le kwa Japane.” Mme le fa gone go le thata go bona dipalopalo tsa gone, go bonala dinaga tse dintsi tse di tlhabologang di lebane le bothata jo bo tshwanang. Go ya ka makasine wa World Watch, “banna [kwa dinageng tse di humanegileng] gantsi ba tlogela basadi le bana ba bone ka ntlha ya go oketsega ga mathata a tsa ikonomi.” Eleruri, patlisiso e e dirilweng kwa nageng nngwe ya kwa Caribbean e senotse gore ke diperesente di le 22 fela tsa borre ba ba nang le bana ba dingwaga di le robedi ba tota ba nnang le bana ba bone.

Bana ba ba se nang borraabone ba ne ba le teng le mo motlheng wa Baebele. (Duteronome 27:19; Pesalema 94:6) Le fa go ntse jalo, ka nako eo, lebaka la konokono le le neng le dira gore bana ba tlhoke borraabone e ne le fa rre a tlhokafetse. Mokwadi mongwe e bong David Blankenhorn a re: “Gompieno, selo se segolo se se bakang gore malapa a tlhoke borre ke gore borre ba tlhophile jalo.” Eleruri, jaaka re tlile go bona, palo e e oketsegang ya bana ba ba se nang borraabone e naya bosupi jwa gore gompieno batho ba le bantsi ga ba na “katamalano e e bothitho ya tlholego.” Go ya ka Baebele, jono ke bongwe jwa bosupi jwa gore re tshela mo “malatsing a bofelo.”—2 Timotheo 3:1-3.

Le fa go ntse jalo, mo baneng ba ba sa leng bannye, go nyelela ga rraabone mo matshelong a bone ke selo se se botlhoko thata. Go simolola botshelo jwa khutsafalo le kutlobotlhoko tse di ka nnelang ruri. Ka jalo, mo motseletseleng ono re tla tlotla ka botshelo jono, e seng go kgoba babadi marapo, mme go ba neela tshedimosetso e e ka thusang malapa go emisa mokgwa ono o o senyang.