Dikgolegelo di mo Mathateng

“Go aga dikgolegelo tse di oketsegileng go rarabolola bothata jwa bokebekwa go tshwana le go epa mabitla a a oketsegileng go rarabolola bothata jwa bolwetse jo bo bolayang.”—ROBERT GANGI, MANKGE WA TSA KOTLHAO.

MO LEFATSHENG le gantsi bopolotiki bo bipang dilo tse di sa siamang, re emisetsa lefoko le le seng monate la “kgolegelo” ka le lengwe le le bonolo. Re eletsa go dirisa “lefelo la kotlhaelo,” koo batho ba “thapisediwang tiro ya diatla” gone le “ditirelo setšhaba.” E bile re rata go dirisa lefoko “motho yo o tshwerweng” go na le go dirisa lefoko le le ntshang batho seriti la “legolegwa.” Le fa go ntse jalo, fa o leba ka kwa ga mafoko a a bonolo ano, o tla fitlhela gore dikgolegelo di lebane le mathata a a masisi gompieno, a a tshwanang le go tlhatloga ga ditlhwatlhwa tsa go boloka batlolamolao mo kgolegelong le go sa bone matswela ape a go ba tsenya mo kgolegelong.

Batho bangwe ba a belaela gore a dikgolegelo di na le mosola. Ba bolela gore le fa palo ya magolegwa e tlhatlogetse go dimilione di le robedi mo lefatsheng lotlhe, bokebekwa jone ga bo a fokotsega mo dinageng di le dintsi. Mo godimo ga moo, le mororo bontsi jwa ba ba leng mo kgolegelong ba le moo ka ntlha ya bokebekwa jo bo amanang le diokobatsi, go abiwa ga diokobatsi mo mebileng e sa ntse e le bothata jo bogolo.

Le fa go ntse jalo, batho ba bantsi ba eletsa gore batho ba ba di dirisang ba otlhaiwe ka go tsenngwa mo kgolegelong. Fa motlolamolao a tsentswe mo kgolegelong, ba akanya gore o bona kotlhao e e mo tshwanelang. Mokwadi mongwe wa dikgang o tlhalosa tlhoafalo ya go tsenya dikebekwa mo kgolegelong a re ke “bolwetse jwa go tlhatlhela.”

Go na le mabaka a le manè a konokono a a dirang gore batlolamolao ba tsenngwe mo kgolegelong: (1) go otlhaya batlolamolao, (2) go sireletsa setšhaba, (3) go thibela bokebekwa jwa mo isagweng le (4) go fetola dikebekwa, go ba ruta gore e nne batho ba ba ikobelang molao le go nna batho ba ba mosola fa ba sena go gololwa. Mma re bone gore a dikgolegelo di fitlhelela maikaelelo ano.