Pono E e Mo Baebeleng

Modimo o Kgona go Itshoka go le Kana Kang?

“MODIMO, LE MORORO A NA LE THATO YA GO BONTSHA TŠHAKGALO YA GAGWE LE GO ITSISE MAATLA A GAGWE, [O] NE A LESELETSA DIJANA TSA TŠHAKGALO TSE DI DIRILWENG GORE DI TSHWANELE TSHENYEGO KA GO NNA PELOTELELE THATA.”—BAROMA 9:22.

GO RALALA hisitori Modimo o ntse a itshoketse bosula jo bontsi le boikepo. Dingwaga di feta 3 000 tse di fetileng, Jobe o ne a bua jaana a hutsafetse: “Ke ka ntlha yang fa baikepi ba tswelela ba tshela, ba tsofetse, e bile ba humile mo gogolo? Bana ba bone ba tlhomamisitswe ka thata mmogo le bone mo ponong ya bone, le ditlogolwana tsa bone fa pele ga matlho a bone. Matlo a bone ke kagiso ka boyone, ga go na poifo mo go one, le thobane ya Modimo ga e mo godimo ga bone.” (Jobe 21:7-9) Batho ba bangwe ba ba ratang tshiamiso, jaaka moporofeti Jeremia, le bone ba ile ba bontsha gore ba tshwenyegile ka tsela e go lebegang Modimo a itshokelang batho ba ba bosula ka teng.—Jeremia 12:1, 2.

O akanya eng? A ga o tlhaloganye gore ke ka ntlha yang fa Modimo a letleletse boikepo? A ka dinako tse dingwe o na le maikutlo a gore Modimo o tshwanetse go potlaka mme a fedise batho ba ba boikepo gone jaanong jaana? Sekaseka se Baebele e se buang ka boitshoko jwa Modimo le mabaka a gone.

Ke ka Ntlha Yang fa Modimo a Itshokile?

Sa ntlha, re tshwanetse go botsa jaana: Ke ka ntlhayang fa Modimo, yo o nang le melao e e kwa godimo ya tshiamo, a itshokela bosula le go le gonnye fela? (Duteronome 32:4; Habakuke 1:13) A seno se raya gore o mpampetsa boikepo? Le e seng! Akanya ka setshwantsho se se latelang: Akanya ka ngaka ya moari e e sa diriseng melao ya motheo ya boitekanelo, e e bileng e utlwisa balwetse ba e ba arang botlhoko thata. Fa a ne a bereka mo sepatela, a o ne a se kitla a tlosiwa ka bonako? Mme go na le maemo mangwe a mo go one go ka nnang ga tlhokega boitshoko jo bo fetang jo bo tlwaelegileng. Ka sekai, mo maemong a tshoganyetso, gongwe kwa ntweng, a go ka se tlhokege go itshokela ngaka ya moari e e dirang mo maemong a segologolo le a a kotsi, gongwe e bile e dirisa ditlamelo le didirisiwa tsa karo tse ka tlwaelo di ka tsewang e le tsa maemo a a kwa tlase?

Ka tsela e e tshwanang, gompieno Modimo ka bopelotelele o itshokela dilo tse dintsi tse a di lebang di le maswe ka tsela e e feteletseng. Le fa gone a tlhoile boikepo, o sa ntse a bo dumeletse ka nakwana gore bo tswelele. Go na le mabaka a a utlwalang a go bo a dira jalo. Lebaka lengwe ke gore seno se bula nako ya gore go baakanyediwe ruri dikgang tsa moruthutha tse di tsositsweng ke go tsuologa ga ga Satane kwa tshimong ya Edene. Tseno ke dikgang tse di amanang thata le gore Modimo o busa sentle go le kana kang, le gore a o na le tshwanelo ya go busa. Gape, go bo a itshokela dilo tse di bosula ka bopelotelele go naya ba ba dirang bosula nako ya gore ba fetoge.

Modimo yo o Kutlwelobotlhoko, yo o Pelotelele

Batsadi ba rona ba ntlha, Adame le Efa, ba ne ba kopanela le Satane go tsuologela Modimo. Modimo o ne a na le tshwanelo ya go ba senya gone fela foo. Go na le moo, o ne a itshupa a le kutlwelobotlhoko e bile a le pelotelele, ka go ba letla ka lorato gore ba nne le bana. Mme bana bano, le lelapa lotlhe la batho le le tswang mo go  bone, ba tsholetswe mo boleong.—Baroma 5:12; 8:20-22.

Modimo o ne a ikaeletse go golola motho mo boemong jwa gagwe jo bo hutsafatsang. (Genesise 3:15) Le fa go ntse jalo, ka gonne a tlhaloganya kafa bosaitekanelang jo re bo ruileng mo go Adame bo re amang ka teng, o bontsha bopelotelele jo bogolo thata le kutlwelobotlhoko. (Pesalema 51:5; 103:13) O “tletse bopelonomi jwa lorato” e bile o nna a iketleeditse go “itshwarela ka tsela e kgolo.”—Pesalema 86:5, 15; Isaia 55:6, 7

Melelwane ya Boitshoko Jwa Modimo

Le fa go ntse jalo, e tla bo e se go bontsha lorato kgotsa go nna tekatekano fa Modimo a ka letla gore bosula bo tswelele ka bosakhutleng. Ga go na rre ope yo o lorato yo o ka itshokelang ka bosakhutleng bosula jo bo dirwang ke mongwe wa bana ba gagwe yo o utlwisang maloko a mangwe a lelapa botlhoko jo bogolo thata ka boomo. Ka jalo bopelotelele jwa Modimo jwa go itshokela boleo, ka metlha bo tla nna bo lekalekanngwa le dinonofo tse dingwe tse di tshwanang le lorato, botlhale le tshiamiso. (Ekesodo 34:6, 7) Fela fa se se dirang gore a nne pelotelele se sena go wela, go itshokela ga gagwe bosula go tla fela.—Baroma 9:22.

Moaposetoloi Paulo o ne a bontsha seno ka phepafalo. Nako nngwe o ne a re: “Mo dikokomaneng tse di fetileng [Modimo] o ne a letla ditšhaba tsotlhe go tswelela mo ditseleng tsa tsone.” (Ditiro 14:16) Ka nako e nngwe Paulo o ne a bua kafa ‘Modimo a tlodisitseng dinako tsa botlhokakitso jo bo ntseng jalo matlho’ mo bathong ba ba sa ikobeleng melao ya gagwe le melaometheo. Paulo o ne a tswelela jaana: “[Modimo] o bolelela batho gongwe le gongwe gore botlhe ba ikwatlhaye.” Ka ntlha yang? “Ka gonne o tlhomile letsatsi le ka lone a ikaelelang go atlhola lefatshe le le nang le banni ka tshiamo.”—Ditiro 17:30, 31.

Solegelwa Molemo Gone Jaanong ke Boitshoko Jwa Modimo

Kwantle ga pelaelo, he, ga go na ope yo o tshwanetseng go akanya gore o ka tlhokomologa melao ya Modimo fela a bo a kopa gore Modimo a mo itshwarele, fa a batla go tila diphelelo tsa ditiro tsa gagwe. (Joshua 24:19) Batho ba bantsi ba Iseraele wa bogologolo ba ne ba akanya gore ba ka dira jalo. Ba ne ba sa batle go fetoga. Ba ile ba fosa maikaelelo a boitshoko jwa Modimo le bopelotelele jwa gagwe. Modimo ga a ka a itshokela bosula jwa bone ka bosakhutleng.—Isaia 1:16-20.

Baebele e bontsha gore fa motho a batla go tila katlholo ya Modimo ya bofelo, o tshwanetse go ‘ikwatlhaya’—ke gore a dumele ka bohutsana boemo jwa gagwe jwa bosaitekanelang, jwa boleo fa pele ga Modimo mme a fularele bosula ka pelo ya gagwe yotlhe. (Ditiro 3:19-21) Go tswa foo, mo motheong wa setlhabelo sa ga Keresete sa thekololo, Jehofa Modimo o tla mo itshwarela. (Ditiro 2:38; Baefeso 1:6, 7) Ka nako e e tshwanetseng, Modimo o tla fedisa diphelelo tsotlhe tse di maswe tsa boleo jwa ga Adame. Go tla nna le “legodimo le lesha le lefatshe le lesha” kwa a ka se tlholeng a itshokela “go nna teng ga . . . dilo tse di lelelang go senngwa.” (Tshenolo 21:1-5; Baroma 9:22, Phillips) A bo ano e le matswela a a molemo jang ne a boitshoko jwa Modimo jo bo molemo thata, mme e le jo bo nang le melelwane!

[Setshwantsho mo go tsebe 29]

Modimo o ne a dumelela Adame le Efa go nna le bana