O ka Bona Kae Boitsholo jo bo Siameng?

RE TSHELA mo lefatsheng le melao ya lone ya boitsholo e fetogang. Ditiro tsa go se ikanyege tse pele di neng di kgalwa gantsi di a itlhokomolosiwa gompieno. Gantsi magodu le batsietsi ba a tlotlomadiwa e bile ba tsewa e le bagaka mo metsweding ya tshedimosetso. Ka ntlha ya seo, batho ba le bantsi ba tshwana le tsela eno e Baebele e ba tlhalosang ka yone: “Le fa e le leng fa o ne o bona legodu, o ne o le itumelela.”—Pesalema 50:18.

 Le fa go ntse jalo, batho ba ba tsietsang ba bangwe ruri ga ba a tshwanela go tseelwa kwa godimo. Mokwadi mongwe o ne a re: “Sengwe sa dilo tse di tlhomololang bomankge ba tsietso ke bokgoni jwa tlholego jo ba nang le jone, jo gantsi ba nnang le jone ba sa le bannye, jwa go tsietsa batho ba ba tshelang le bone. Mo godimo ga bokgoni jono jo ba nang le jone, ntlha e nngwe ke gore go tsietsa ga bone batho ba bangwe ga go ba tlogele ba ikutlwa ba le molato. Go na le moo, go ba dira gore ba ikutlwe ba kgotsofetse tota—ba ikutlwe ba itumetse ka tsela e e rileng mme seo se ba kgothaletse go tswelela pele ba tsietsa batho gore ba bone se ba se batlang, le fa seo se ka nna le matswela a a maswe go le kana kang mo mothong yo ba mo tsietsang.”

Ke boammaaruri gore batho ba le bantsi ba ka nna ba utlwela motlholagadi yo o tsieditsweng botlhoko, mme ga se ba le bantsi ba ba utlwang botlhoko fa go tsiediwa khampani e kgolo kgotsa khampani ya inshorense. Batho ba le bantsi ba bolela gore go itshiametse fela le fa dikgwebo tseno di tsiediwa ka gonne di humile. Le fa go ntse jalo, go tsiediwa jalo ga se bothata jo bo amang dikgwebo tseno fela; di dira gore di boelwe ke madi a di a latlhegetsweng ka go oketsa ditlhwatlhwa tsa tsone. Ka sekai, kwa United States, lelapa la itsholelo e e mo magareng le duela diranta di le 6 500 ka ngwaga ka ntlha ya dituelo tsa inshorense tse di okeditsweng e le gore go duelelwe ditshenyegelo tsa tsietso.

Mo godimo ga moo, batho ba le bantsi ba dirisa ditshono tse ba di bonang tsa go reka dilo tsa maitirelo tse di jang madi a mannye, tse di jaaka diaparo, ditshupanako, dinkgisamonate, ditlolo tsa go intlafatsa le dikgwama. Ba ka nna ba bo ba itse gore dilo tseno tsa maitirelo di dira gore dikgwebo di latlhegelwe ke dibilione tsa diranta ka ngwaga, mme gone ba akanya gore seo ga se ba ame ka gope. Le fa go ntse jalo, bareki ba feleletsa ba duedisiwa madi a mantsi mo dilong tse dingwe tse e seng tsa maitirelo. Mo godimo ga moo, go reka dilo tsa maitirelo go humisa dikebekwa.

Mokwadi mongwe yo o mo kgwebong e e lwantshang tsietso o ne a kwala jaana: “Ga ke na pelaelo gore lebaka la go bo re na le tsietso e ntsi jaana gompieno ke ka go bo re tshela mo setšhabeng se se se nang maitsholo a mantle. Maitsholo a senyegile thata jaana mo e leng gore seno se tlhotlheleditse batho go tsietsa ka ditsela tse di farologaneng. . . . Re tshela mo setšhabeng se se sa tlholeng se ruta melao ya boitsholo mo gae. Re tshela mo setšhabeng se se sa tlholeng se ruta melao ya boitsholo kwa sekolong, ka gonne barutabana ba tla latofadiwa ka gore ba ruta bana melao ya boitsholo.”

Go farologana le seno, Basupi ba ga Jehofa bone ba ruta melao ya boitsholo e bile ba leka go tshela go ya ka melao ya Lefoko la Modimo. Ba kaelwa ke melaometheo e e jaaka e e latelang:

● “O rate moagelani wa gago jaaka o ithata.”—Mathaio 22:39.

● “O se ka wa tsietsa.”—Mareko 10:19.

● “A moutswi a se ka a tlhola a utswa, mme go na le moo a a dire ka natla, a dira ka diatla tsa gagwe se e leng tiro e e molemo, gore a tle a nne le sengwe se a se abelang mongwe yo o tlhokang.”—Baefeso 4:28.

● “Re eletsa go itshwara ka boikanyegi mo dilong tsotlhe.”—Bahebera 13:18.

Le fa gone Basupi e se batho ba ba mabela kgotsa ba ba iponang tshiamo, ba dumela gore fa mongwe le mongwe a ne a dirisa melaometheo eno, lefatshe e ne e tla nna lefelo le le botoka go tshela mo go lone. Gape ba dumela mo tsholofetsong ya Modimo ya gore ka letsatsi lengwe, lefatshe le tla nna jalo.—2 Petere 3:13.

[Mafoko a a mo go tsebe 11]

Fa mongwe le mongwe a ne a dirisa melaometheo ya Lefoko la Modimo, lefatshe e ne e tla nna lefelo le le botoka go tshela mo go lone

[Setshwantsho mo go tsebe 10]

Bakeresete ba boammaaruri ba tshela go ya ka melaometheo ya Baebele, e e jaaka “O rate moagelani wa gago jaaka o ithata”