‘Lo Tshwanetse Lwa Ipelafatsa ka Seno’

BATLHANKA ba Modimo ba boammaaruri ba itse botlhokwa jwa go ikanyega. Go rata Mmopi wa bone go ba tlhotlheletsa gore ba ikanyege. Ka sekai, akanya ka kgang ya ga Lázaro. Nako nngwe fa a ne a bereka kwa hoteleng ya kwa Huatulco kwa Mexico, o ne a sela madi a a kana ka R420 a a neng a ole mo phashiting. O ne a isa madi ao ka bonako kwa mookameding. Moragonyana ga foo o ne a sela sepatšhe kwa ntlwaneng ya boithomelo. O ne a se isa kwa lefelong le go amogelwang baeng kwa go lone, mme mong wa sone yo o neng a sa lebelela gore o tla boa a se bona o ne a itumela thata.

Mookamedi yo mogolo o ne a utlwa ka se se diragetseng, mme o ne a botsa Lázaro gore ke eng se se mo tlhotlheleditseng gore a buse madi le sepatšhe. Lázaro o ne a mmolelela gore melaometheo ya Baebele e a ithutileng yone ga e mo letle go tsaya sepe se e seng sa gagwe. Mo lekwalong lengwe le a mo lebogang mo go lone, mookamedi yo mogolo o ne a raya Lázaro a re: “Go thata gompieno go kopana le batho ba ba nang le ditekanyetso tse di kwa godimo jalo. Re a go akgola ka ntlha ya boikutlo jwa gago. O itshupile o le monna yo o ikanyegang e bile o sekao mo badiring ka wena. Wena le ba lelapa la gago lo tshwanetse lwa bo lo le motlotlo tota.” Lázaro o ne a tlhophiwa jaaka modiri yo o ba gaisitseng mo kgweding eo.

Bangwe ba badirimmogo ba ne ba akanya gore Lázaro o dirile phoso ka go busa dilo tseo. Mme fa ba sena go utlwa kafa mothapi wa bone a ikutlwang ka teng, ba ne ba akgolela Lázaro go bo a ile a latela melaometheo e a e ithutileng.

Baebele e kgothaletsa balatedi ba ga Jesu ba ba ikanyegang gore ba ‘dire se se molemo mo go botlhe’ le gore “[ba itshware] ka boikanyegi mo dilong tsotlhe.” (Bagalatia 6:10; Bahebera 13:18) Ga go pelaelo gore fa re ikanyega jaaka Bakeresete re galaletsa Modimo yo go buiwang ka ene mo Baebeleng e bong Jehofa ‘yo o siameng e bile a thokgame.’—Duteronome 32:4.