Dilo Tse Tlhano Tse di Tla go Thusang go Bona Tiro

KE MANG yo gantsi a bonang tiro e e mo siametseng? A gantsi ke motho yo o tshwanelegelang tiro eo ka botlalo? Brian, yo e leng mongwe wa batho ba ba thusang ba bangwe go bona tiro a re: “Nnyaa. Gantsi tiro e bonwa ke motho yo o dirisang ditsela tse di tshwanetseng tsa go e batla.” Ke ditsela dife tse di tshwanetseng tse o ka di dirisang go batla tiro? Mma re sekaseke dikakantsho di le tlhano.

Dira Dilo ka Thulaganyo

Fa o latlhegetswe ke tiro e e siameng kgotsa o na le nako e telelenyana o sa bereke, seno se ka nna sa go kgoba marapo. Katharina, yo o rokang mesese yo o nnang kwa Jeremane a re: “Fa ke ne ke latlhegelwa ke tiro lekgetlho la ntlha, ke ne ke tsaya gore nka se nne le mathata a go bona e nngwe. Mme fa dikgwedi di ntse di feta ka iketlo mme ke sa kgone go bona tiro, ke ne ka simolola go tshwenyega thata mo maikutlong. Ke ne ka feleletsa ke sa kgone le go tlotla ka kgang eno fa ke na le ditsala tsa me.”

O ka lwantshana jang le maikutlo ano a go itlhoboga? Buka ya Get a Job in 30 Days or Less e akantsha jaana: “Go botlhokwa thata gore o itirele thulaganyo e e tshwanang le ya fa o bereka e le gore o simolole letsatsi la gago o itse gore ke eng se o tshwanetseng go se dira.” Bakwadi ba buka eno ba akantsha gore “letsatsi le letsatsi o ipeele mekgele o bo o kwale e o kgonneng go e fitlhelela.” Mo godimo ga moo, ba bolela gore “letsatsi le letsatsi o tshwanetse o apare jaaka e kete o ya tirong.” Ka ntlha yang? “Ka gonne go apara sentle go tla dira gore o se ka wa tshoga, tota le fa o bua le mongwe mo founong.”

Ee, dira sotlhe se o ka se kgonang go bona tiro, go sa kgathalesege gore go bona tiro go tla go tsaya lobaka lo lo kae. Katharina, yo o umakilweng fa godimo, o ne a dirisa one mokgwa ono wa go batla tiro. A re: “Ke ne ka batla diaterese le dinomore tsa founo tsa batho ba ba hirang go tswa kwa setheong se se thusang batho go batlana le ditiro. Fa ke bona tiro e phasaladitswe mo makwalodikgannyeng, ke ne ke ikgolaganya le beng ba yone. Ke ne ke ntse ke batla dinomore tsa difouno mo bukaneng ya difouno mme ka itirela lenaane la dikhampani tse di ka tswang di na le ditiro tse di iseng di phasaladiwe, mme ka ikgolaganya le tsone. Gape ke ne ka kwala CV [lekwalo le le tlhalosang ditiro tse ke di ithutetseng le tse ke kgonang go di dira] ke bo ke e romela kwa dikhampaning tseno.” Kwa bofelong, fa a ntse a batlana le tiro ka tsela eno, Katharina o ne a bona tiro e e mo siametseng.

Batla le Ditiro Tse di Iseng di Phasaladiwe

Motshwari wa ditlhapi yo o nang le letloa le legolo thata ke ene yo go diregang thata gore a tshware ditlhapi. Go a tshwana le fa o batla tiro, fa o e batla ka ditsela tse dintsinyana, seno se tla oketsa ditshono tsa gore o e bone. Fa o batlana le tiro ka go lebelela fela tse di phasaladiwang mo lokwalodikgannyeng kgotsa mo Internet, go ka direga gore di le dintsi tsa tsone di go tswe dinaleng. Ditiro di le dintsinyana ga di phasaladiwe. O ka kgona jang go itse ka ditiro tseno tse di iseng di phasaladiwe?

Mo godimo ga gore o ikgolaganye le beng ba ditiro tse di phasaladitsweng, o tshwanetse wa ipha nako beke le beke ya go founa kgotsa go etela mafelo a kgwebo a o akanyang gore a ka tswa a na le ditiro tse  o ka kgonang go di dira, fela jaaka Katharina a ile a dira. Se ba lete gore ba phasalatse diphatlatiro. Fa mookamedi wa khampani a go bolelela gore ga a na tiro, mmotse gore a o itse dikhampani tse dingwe tse o ka ikgolaganyang le tsone a bo a go bolelele gore o bue le mang ka mo go kgethegileng fa o fitlha kwa go tsone. Fa a go itsise ka khampani nngwe, ikgolaganye le yone go ba botsa gore a o ka ba etela, o bolele le leina la motho yo o go rometseng kwa go yone.

Tony, yo o umakilweng mo setlhogong se se fetileng, o ne a bona tiro ka yone tsela eno. O tlhalosa jaana: “Ke ne ka tsaya kgato ka bonna go founela dikhampani le fa gone di ne di sa phasalatsa diphatlatiro dipe. Khampani nngwe e ne ya mpolelela gore ga e na diphatlatiro mme ke leke gape morago ga dikgwedi di le tharo. Ke ne ka dira jalo, mme ka hirwa.”

Primrose, yo e leng mmabana yo o se nang molekane mo Afrika Borwa, le ene o ne a dira se se tshwanang. A re: “Fa ke ntse ke ithutela tiro ya thuso ya potlako, ke ne ka bona go agiwa moago o mosha gaufi le fa re neng re le gone, mme ka utlwela gore e ne e tlile go nna legae le go tlhokomelwang batsofe mo go lone. Ke ne ka leka ka makgetlhonyana go ikgolaganya le mookamedi wa lefelo leno. Kwa bofelong o ne a mpolelela gore ga jaanong ga go ise go nne le diphatlatiro. Le fa go ntse jalo, ke ne ka nna ka boela kwa go ene go bona gore a nka bona tiro teng, tota le fa ke ne nka nna moithaopi fela. Fa nako e ntse e ile ke ne ka fiwa tiro ya nakwana fela. Tiro nngwe le nngwe e ke neng ke e newa ke ne ke e dira ka natla. Ka ntlha ya moo, ke ne ka kgona go tshwanelegela le ditiro tse dingwe gape mme kgabagare ka hirwa ka nako e e tletseng mo legaeng leno la batsofe.”

Gape o ka nna wa kopa ditsala tsa gago, ba losika le batho ba bangwe ba o tlwaelaneng le bone gore ba go batlise ditiro tse di iseng di phasaladiwe. Eno ke tsela e Jacobus, yo e leng modiredi wa tsa pabalesego mo Afrika Borwa, a ileng a bona tiro ka yone. A re: “Fa khampani e ke neng ke bereka mo go yone e tswalwa, ke ne ka itsise ditsala tsa me le ba losika gore ke batlana le tiro. Ka letsatsi lengwe tsala nngwe ya me e ne e ntse e reeditse motlotlo wa batho bangwe fa a le mo moleng wa go ya go duela mo lebenkeleng. Mosadi mongwe o ne a botsa yo mongwe gore a ga a itse ope yo o batlanang le tiro. Tsala ya me e ne ya tsena motlotlo wa bone mo gare mme ya bolelela mosadi yono ka nna. Go ne ga bewa nako ya gore re kopane leng, mme ke ne ka bona tiro.”

Fetofetoga le Maemo

Gore o nne le ditshono di le dintsi tsa go bona tiro, o tshwanetse wa iketleeletsa go fetofetoga le maemo a o ka tlhokang go lebana le one. Jaime, yo o umakilweng mo setlhogong se se fetileng, a re: “Ga go direge thata jalo gore o bone tiro e wena o e batlang. O tshwanetse wa ithuta go kgotsofalela le tiro e tota e seng e o neng o e batla.”

Go fetofetoga le maemo go ka nna ga raya gore o se ka wa tlhopha mefuta e e rileng fela ya ditiro. Akanya ka Ericka, yo o nnang kwa Mexico. O ithutetse tiro ya go nna mokwaledimogolo, mme kwa tshimologong o ne  a se ka a bona tiro eno e a e ithutetseng. A re: “Ke ne ka ithuta go amogela tiro nngwe le nngwe e e tshwanelang. Ke ne ka fetsa lobaka lo loleele ke bereka tiro ya go thusa bareki mo lebenkeleng. Gape ke ne ka rekisa le borotho jwa taco mo mmileng ka bo ka phepafatsa le matlo. Kgabagare, ke ne ka kgona go bona tiro e ke neng ke e ithutetse.”

Fa Mary, yo o umakilweng mo setlhogong se se fetileng a sena go latlhegelwa ke tiro ya gagwe ya go nna tlelereke, le ene o ne a iketleeletsa go fetofetoga le maemo. O tlhalosa jaana: “Ke ne ke sa gagamalele fela go bona tiro e ke neng ke e dira pele. Ke ne ke leka go bona tiro nngwe le nngwe fela e ke neng ke utlwela ka yone, tota le fa e ne e le e batho bangwe ba ka e tsayang e le ya maemo a a kwa tlase. Ka ntlha ya seno, ke ne ka kgona go bona tiro gore ke tlamele bana ba me ba babedi.”

Kwala CV E e Go Tlhalosang Sentle

Batho ba ba batlang ditiro tsa bookamedi bone ba a patelesega go kwala CV le go e romela kwa ba batlang tiro gone. Mme gone, CV e e kwadilweng sentle e ka thusa thata go sa kgathalesege gore ke tiro efe e o e batlang. Nigel, yo e leng mongwe wa batho ba ba nayang ba bangwe kgakololo malebana le go batla tiro kwa Australia a re: “CV ga e bolelele fela batho ba ba ka nnang ba go hira gore o mang mme gape e ba bontsha gore ke eng se o se dirileng le gore ke ka ntlha yang fa ba go tlhoka.”

CV e tshwanetse ya dirwa jang? Kwala leina la gago ka botlalo, aterese, nomore ya founo le aterese ya e-mail. Kwala gore ke eng se o ikaeletseng go se fitlhelela. Kwala se o se ithutetseng, o bo o tlhalose thata thapiso epe fela e o nnileng le yone malebana le tiro e o e batlang. Tlhalosa ka botlalo maitemogelo a gago mo tirong e o neng o e dira pele. Mme gone o se ka wa kwala fela se o ileng wa se dira—kwala le dikai tsa mekgele e o ileng wa e fitlhelela le kafa seno se ileng sa solegela bathapi ba gago ba pele molemo ka gone. Gape, gatelela thata dikarolo tsa tiro ya gago ya pele tse di dirang gore o tshwanelegele go ka dira tiro e gone jaanong o batlang go e dira. Kwala le  dilo tse di amanang le botho jwa gago tse di jaaka dinonofo tsa gago, dilo tse o di kgatlhegelang le tse o intshang bodutu ka tsone. E re ka dikhampani di sa tshwane, o ka nna wa tshwanelwa ke go fetola CV ya gago go dumalana le se nngwe le nngwe e se batlang fa o ya go buisana le yone ka tsa tiro.

A CV e a tlhokega fa e le gore ke sa ntlha o batla tiro? Ee! Go ka tswa go na le dilo di le dintsi tse o di dirileng tse di tsewang e le maitemogelo a tiro. Ka sekai, a o na le dilo tse o di dirang go intsha bodutu, tse di jaaka go betla ka legong kgotsa go baakanya dikoloi tsa bogologolo? O ka nna wa kwala dilo tseno fa o dira CV. A o kile wa ithaopela go dira tiro nngwe? Kwala mofuta wa tiro e o neng o ithaopetse go e dira le mekgele e o neng wa e fitlhelela.—Bona lebokoso le le reng “Sekai sa CV ya Batho Ba ba Se Nang Maitemogelo a Tiro.”

Fa o sa atlege go nna le puisano ya tiro le mothapi, mo tlogelele karata e nnye—gantsi e nne boleele jwa disentimetara di le 10 le bophara jwa di le 15—e e nang le leina la gago, aterese, nomore ya founo, aterese ya e-mail le tshobokanyo fela ya dilo tse o kgonang go di dira le tse o di fitlheletseng. Kafa morago ga karata eno, o ka nna wa manega setshwantsho sa gago kgotsa sa gago o na le ba lelapa la gago, fa go tshwanela. Neela batho botlhe ba ba ka go thusang go batla tiro karata eno, o ba kope gore ba e neele motho ope fela yo ba mo itseng yo o ka go thapelang tiro e o e batlang. Fa motho mongwe yo o batlang badiri a bona karata eno, a ka nna a go bitsa gore a tle go buisana le wena go bona gore a o tshwanelegela tiro—kgotsa gongwe a go hira!

Go kwala CV go tla go thusa gore o ikutlwe o kgona go laola seemo sa gago fa o ntse o batlana le tiro. Nigel, yo o umakilweng pelenyana, a re: “Go kwala CV go go thusa gore o rulaganye se o batlang go se  bua le mekgele ya gago. Gape go go thusa gore o se ka wa tshoga ka gonne go go thusa go baakanyetsa dipotso tse o ka nnang wa di bodiwa ka nako ya fa o tshwere puisano le mothapi e e malebana le tiro.”—Bona lebokoso le le mo tsebeng ya 7.

Ipaakanyetse Sentle Fa o Ya go Buisana le Mothapi ka Tiro

Ke eng se o tshwanetseng go se dira fa o ipaakanyetsa go ya go buisana le mothapi ka tiro? O ka nna wa dira dipatlisiso ka khampani e o batlang go bereka mo go yone. Fa o itse go le gontsi ka khampani eo, seo se tla dira gore o dire sentle ka nako ya fa o buisana le mothapi. Patlisiso ya gago e tla go thusa gape gore o kgone go lemoga gore a khampani eo tota e na le tiro e o e batlang kgotsa a ke e o batlang go bereka mo go yone.

Morago ga moo, akanya ka se o tlileng go se apara fa o ya khampaning eo. Fa tiro e o e batlang e le ya diatla, apara diaparo tse di tshwanetseng tse di bothakga e bile di le phepa. Go apara le go ipaakanya ka tsela e e bothakga go bontsha motho yo o ka nnang a go hira gore o a itlotla mme seo se raya gore go ka direga gore le tiro ya gago o e tseye e le ya botlhokwa. Fa e le gore o batla tiro ya mo ofising, tlhopha diaparo tse di siameng tse mo lefelong la lona di tsewang di siametse motho yo o berekang mo ofising. Nigel a re: “Tlhopha diaparo tsa gago nako e sa le gone pele ga o ya go buisana le mothapi ka tiro e le gore o se ka wa dira dilo ka lepotlapotla e leng selo se se ka go okeletsang go tlhobaela go gantsi batho ba nnang le gone pele ba ya go tshwara puisano ya tiro le mookamedi wa tiro e ba e batlang.”

Nigel gape o akantsha gore o goroge metsotso e le 15 pele ga nako e o e beetsweng gore o goroge ka yone. Ebu, go goroga go sa le gale thata le gone ga go botlhale go le kalo. Mme gone go goroga thari go ka nna maswe le go feta. Bomankge ba bolela gore metsotswana ya ntlha e meraro ya fa o buisana le mothapi ka tiro e botlhokwa thata. Mo metsotswaneng eo ya ntlha, motho yo o buisanang le ene ka tsa tiro o tlhatlhoba tsela e o lebegang ka yone le e o itshwarang ka yone, mme dilo tseno gantsi di tlhotlheletsa thata se a se akanyang ka wena. Fa o ka tla thari, o tla bo o sentse dilo. Gakologelwa gore ga go na tshono ya bobedi ya go baakanya kafa o ileng wa lejwa ka gone mo lekgetlhong la ntlha.

Gakologelwa gape gore motho yo o buisanang le ene ka tsa tiro ga se mmaba wa gago. Kana le ene go ka direga gore o ile a feta mo boemong jo bo tshwanang fa a ne a batla tiro eno ya gagwe, ka gone, o itse kafa o ikutlwang ka teng. Tota e bile, ene ka boene a ka nna a bo a tshogile, e re ka gongwe a ile a thapisiwa go se kae fela kgotsa a sa thapisiwa gotlhelele malebana le go buisana le motho yo o batlang tiro. Mo godimo ga moo, fa motho yo o buisanang le ene e le mothapi, a ka nna a latlhegelwa thata fa a ka thapa motho yo o sa tshwanelegeleng tiro.

Gore o simolole dilo sentle, nyenya mme o dumedise ka seatla se se gagametseng, fa e le gore ke  tsela e go dumedisiwang ka yone mo lefelong la lona. Ka nako ya fa lo ntse lo buisana, tlhoma mogopolo mo go se mothapi a se batlang mo go wena le se wena o ka se mo nayang. Mabapi le dilo tse o sa tshwanelang go di dira, Nigel a re: “O se ka wa ema, wa nna kgotsa wa tsamaya ka tsela e e bontshang e kete o ikgoga fela—tsela e o itshwarang ka yone e bontsha gore o a itshepa. O se ka wa gololesega thata kgotsa wa bua bobe, mme o se ka wa ba wa dirisa matlhapa. Gape, o se ka wa bua maswe ka mothapi wa gago kgotsa badirimmogo le wena ba pele—fa o bua maswe ka bone, motho yo o buisanang le wena ka tsa tiro a ka nna a akanya gore o tlile go bua maswe le ka bone.”

Malebana le dilo tse o tshwanetseng go di dira le go di bua fa lo buisana ka tsa tiro, bomankge ba akantsha se se latelang: Leba motho yo o buisanang le ene mo matlhong, itshikinye mmele ka tsela ya tlholego fela fa o bua mme o itlhalose ka tsela e e utlwalang sentle. Araba dipotso ka bokhutshwane, o bue boammaaruri fela, mme o botse dipotso tse di tsamaelanang le khampani le tiro e o e batlang. Kwa bofelong jwa puisano ya lona, fa e le gore o sa ntse o batla tiro eno, e kope. Go dira jalo go tla bontsha kafa o tlhoafetseng ka teng.

Fa o latela dikakantsho tse go builweng ka tsone fa godimo, o ka nna wa bona tiro go ise go ye kae. Fa e le gore go ka nna jalo, ke eng se o ka se dirang gore tiro eno e se ka ya go latlhegela?

[Lebokoso/Setshwantsho mo go tsebe 6]

Sekai sa CV ya Batho ba ba Iseng Ba ke Ba Bereke

Leina la Gago:

Aterese ya Gago:

Nomore ya Gago ya Mogala le Aterese ya E-Mail:

Boikaelelo: Go senka tiro ya motho yo a iseng a ke a bereke.

Thutego: Ke alogile kwa Sekolong se Segolo sa Hometown ka 2004.

Se o Se Ithutetseng: Bokgoni jwa puo, dipalo, khomputara, dikhoso tsa go nna mmetli wa legong.

Dilo Tse o Kgonang go di Dira: Ke setswerere mo tirong ya diatla. Ke tlhola ke baakanya koloi ya kwa gae gore e nne mo boemong jo bo siameng ka metlha. Ke betlile ditulo tsa legong le tafole mo lefelong le ke betlelang mo go lone kwa gae. Ke rata thata go dirisa bokgoni jwa me jwa dipalo fa ke ntse ke dira difanitšhara. Ke ile ka thusa go rulela moago mo tirong ya go aga e e dirwang ke baithaopi. Ke kgona go dirisa dikhomputara tse dintsi tsa mefuta e e farologaneng e bile ke rata thata go ithuta dithulaganyo tse disha tsa yone.

Tshedimosetso ka ga Gago: Ke motho yo o ka tshepiwang—ke lofile malatsi a le mabedi fela mo ngwageng o o fetileng fa ke ne ke sa ntse ke tsena sekolo. Ke a ikanyega—ke ne ka busetsa sepatšhe se se neng se latlhegile kwa go mong wa sone. Ke botsalano—ka metlha ke nna le seabe mo tirong ya boithaopo mo tikologong e ke nnang mo go yone mme ke itumelela go thusa batho ba ba godileng. Metshameko—ke rata go tshameka basketball. Dilo tse ke ratang go itlosa bodutu ka tsone—ke rata go baakanya dikoloi le go bereka ka legong.

Ba go Ka Ikgolaganngwang le Bone: Ke tla ba ntsha fa ke kopiwa go dira jalo. *

[Ntlha e e kwa tlase]

[Lebokoso/Setshwantsho mo go tsebe 7]

Dipotso Tse O ka Di Bodiwang

❑ Ke ka ntlha yang fa o batla tiro eno?

❑ Ke eng fa o batla go berekela khampani eno?

❑ Ke eng se o se itseng ka tiro eno/khampani eno?

❑ A o setse o kile wa dira tiro ya mofuta ono?

❑ Ke metšhine efe e o kgonang go bereka ka yone?

❑ Ke maitemogelo afe a o nnileng le one mo tirong eno?

❑ O na le bokgoni bofe jo o ka bo dirisang mo tirong eno?

❑ O ka mpolelelang eng fela ka ga gago?

❑ O ka itlhalosa botoka jang ka mafoko a le matlhano fela?

❑ A o kgona go bereka kafa tlase ga maemo a a gatelelang?

❑ Ke eng se se go ntshitseng mo tirong ya gago ya pele?

❑ Ke eng fa o ntse sebaka jaana o sa bone tiro?

❑ Mong wa gago wa pele o ne a ikutlwa jang ka wena?

❑ O lofile ga kae mo tirong ya gago ya pele?

❑ O ikaeletse go dirang mo isagweng?

❑ O ka kgona go simolola tiro leng?

❑ Dinonofo tsa gago tse dikgolo ke dife?

[Lebokoso mo go tsebe 9]

Go Tweng ka Ditheo Tsa mo Internet Tse di Thusang Batho go Batla Tiro?

Sengwe sa ditheo tse dikgolo tse di mo Internet tse di thusang batho go batla tiro kwa United States se na le di-CV di le dimilione di le 17 tse batho ba ba tlhokang babereki ba ka di sekasekang ka kelotlhoko. Gape go na le ditiro di le 800 000 mo go sone tse batho ba ba batlang tiro ba ka di akanyetsang. Dipatlisiso di bontsha gore batho ba ka nna diperesente di le 96 mo dinageng dingwe ba dirisa Internet go batla tiro. Le fa go ntse jalo, patlisiso e e neng ya dirwa mo bathong ba ba batlang tiro e ba e ithutetseng ba ba mo dinageng di le 40 e bontsha gore ke diperesente di le 5 fela tsa bone tse di kgonang go bona tiro di dirisa Internet.

Go tsenya CV ya gago mo Internet go dira gore batho ba le bantsi ba ba ka nnang ba go hira ba itse gore o batlana le tiro, mme gone o tshwanetse go nna kelotlhoko. Seno se ka oketsa gape le ditshono tsa gore mongwe a dirise leina la gago go dira ditiro dingwe tsa boferefere. Gore o itshireletse, bomankge ba tsa madirelo ba na le dikgakololo tse di latelang:

1. Bala pele melao e e malebana le go boloka dilo e le sephiri ya setheo se se mo Internet se se thusang batho go batla tiro pele ga o se romelela CV ya gago. Ditheo dingwe tsa Internet tse di thusang batho go batla tiro di tsaya tshedimosetso ya gago ya botho di bo di e romelela dikhampani tse di rekisetsang batho ba le bantsi dilwana tsa tsone kgotsa di e romelela batho ba bangwe ba ba ka ratang go nna le tshedimosetso ya gago.

2. Romela CV ya gago kwa ditheong di se kae fela tsa Internet tse di thusang batho go batla tiro e bile e le tse di buiwang bontle. Go botlhokwa thata gore o sireletse tshedimosetso ya gago ya botho gore e se ka ya dirisiwa ka tsela e e sa siamang. CV ya gago ga e a tshwanela go nna le tshedimosetso e legodu le ka e dirisang go itira e kete ke wena le bo le go bakela mathata a a sa feleng a tsa madi. Batho ba tota ba batlang go go hira ga ba tlhoke go itse nomore ya akhaonto ya gago ya banka, nomore ya karata ya gago ya go reka ka sekoloto kgotsa letlha le le tlhomameng le o tsetsweng ka lone.

3. Ela tlhoko ditiro tse gantsi di sa tlhalosiweng ka botlalo. Pam Dixon, yo e leng mmatlisisi wa World Privacy Forum, o bolela gore tiro e o fitlheleng e sa tlhalosiwe ka botlalo gore ke ya mofuta ofe, gantsi e a bo e se yone. O oketsa jaana: “Mafoko a a sa tlhaloseng dintlha ka botlalo a a jaaka ‘Re na le ditiro di le diketekete’ kgotsa ‘Re dirisana le dikhampani tse dikgolo’ gantsi a tshwanetse a dira gore o nne kelotlhoko. Gape fa khampani e go kopa gore o e romelele CV e nngwe gape, seo e ka tswa e le tsela e nngwe gape e e rayang gore o nne kelotlhoko.”

Gakologelwa gore tota le setheo se se buiwang bontle sa Internet se se thusang batho go batla tiro se ka se kgone go laola se se diregang ka CV ya gago fa e sena go kwalololwa ke motho yo o ka nnang a go hira kgotsa ke batho ba bangwe ba ba ka ratang go nna le yone.

[Setshwantsho mo go tsebe 5]

DITSELA TSA GO BATLA TIRO

Ipaakanyetse sentle fa o ya go buisana le mothapi ka tiro

Kwala CV e e go tlhalosang sentle

Fetofetoga le maemo

Batla le ditiro tse di iseng di phasaladiwe

Dira dilo ka thulaganyo

[Setshwantsho mo go tsebe 7]

O tshwanetse wa dira ka natla le go dira dipatlisiso tse di tseneletseng gore o bone tiro

[Setshwantsho mo go tsebe 8]

Go se gololesege ka tsela e e feteletseng go tla go thusa fa o buisana le mothapi ka tiro