Baebele ya Reng

A go Na le Modimo yo o Esi Fela wa Boammaaruri?

MOLEKE, Ashethorethe, Baale, Dagone, Merodake, Seuse, Heremese le Aretemise, ke mengwe ya medimo le medimogadi e e umakiwang ka maina mo Baebeleng. (Lefitiko 18:21; Baatlhodi 2:13; 16:23; Jeremia 50:2; Ditiro 14:12; 19:24) Le fa go ntse jalo, Jehofa ke ene fela yo Dikwalo di bolelang gore ke Modimo Mothatayotlhe. Mo pineng ya phenyo, Moshe o ne a etelela batho pele go opela jaana: “Ke mang yo o tshwanang le wena mo medimong, wena Jehofa?”—Ekesodo 15:11.

Ga go pelaelo gore Baebele e tsaya Jehofa e le ene yo o mogolo go gaisa medimo yotlhe. Mme gone, seabe sa medingwana e mengwe eno ke eng? A yone, le medingwana e mengwe e e ntseng e obamelwa go ralala dingwaga, ke medimo ya mmatota e e okametsweng ke Modimo Mothatayotlhe e bong Jehofa?

Medimo e e Ikakanyediwang Fela

Baebele e tlhalosa Jehofa e le ene Modimo yo o esi fela wa boammaaruri. (Pesalema 83:18; Johane 17:3) Moporofeti Isaia o ne a kwala mafoko a Modimo ka boene a neng a a bua fa a ne a re: “Pele ga me ga go a dirwa Modimo ope, le morago ga me ga tswelela go se na ope. Nna—ke nna Jehofa, mme kwantle ga me ga go na mmoloki.”—Isaia 43:10, 11.

Ga se fela gore medimo e mengwe ke ya maemo a a kwa tlase mo go Jehofa. Go le gantsi, ga e tshele—ke dilo tse batho ba di ikakanyetsang fela. Baebele e bitsa medimo eno e re ke “tiro ya diatla tsa motho . . . , [e e] sa kgoneng go bona kgotsa go utlwa kgotsa go ja kgotsa go dupa.” (Duteronome 4:28) Baebele e ruta ka tlhamalalo gore Jehofa ke ene fela Modimo wa boammaaruri.

Ga go gakgamatse go bo Dikwalo di re tlhagisa gore re se ka ra obamela modimo ope kwantle ga Jehofa. Ka sekai, mo Melaong ya ntlha e e Lesome e e neng ya fiwa Moshe, setšhaba sa bogologolo sa Iseraele se ne sa bolelelwa gore se se ka sa obamela modimo ope o sele. (Ekesodo 20:3) Ka ntlha yang?

Sa ntlha, go obamela modimo mongwe o sa tsheleng ke go nyatsa Mmopi. Baebele e tlhalosa baobamedi ba medimo eno ya maaka e re ke batho ba ba “[anantseng] boammaaruri jwa Modimo ka maaka mme ba obamela popo ba bo ba e direla tirelo e e boitshepo go na le go e direla Yo o neng a bopa.” (Baroma 1:25) Gantsi medimo e e ikakanyediwang e emelwa ke medingwana e e dirilweng ka dilo tsa tlholego tse di jaaka tshipi kgotsa logong. Medimo e mentsi e amanngwa le dilo dingwe tsa tlholego, tse di jaaka go duma ga maru, lewatle le phefo. Go obamela medimo e e ntseng jalo e e ikakanyediwang ke tsela e e maswe thata ya go tlontlolola Modimo Mothatayotlhe.

Medimo e e ntseng jalo ya maaka le ditshwantsho tsa yone ke dilo tse di makgapha mo Modimong. Le fa go ntse jalo, fa Modimo a bua mafoko a a supang gore o kgopisegile ke a gantsi a a buang le batho ba ba tlhamileng medimo eno ya maaka. Tsela e a ikutlwang ka yone e tlhalosiwa sentle ke mafoko ano: “Medingwana ya ditšhaba ke selefera le gouta, tiro ya diatla tsa motho wa mo lefatsheng. E na le melomo, mme ga e kgone go bua sepe; e na le matlho, mme ga e kgone go bona sepe; e na le ditsebe, mme ga e kgone go sekegela sepe tsebe. Gape ga go na moya ope mo molomong wa yone. Ba ba e dirang ba tla tshwana fela le yone, mongwe le mongwe yo o e ikanyang.”—Pesalema 135:15-18.

 Go na le lebaka le lengwe la go bo Baebele e re tlhagisa gore re se ka ra obamela motho ope kana eng fela kwantle ga Jehofa Modimo. Kobamelo e e ntseng jalo ke tshenyo e kgolo ya nako le maatla. Moporofeti Isaia o ne a bolela sentle jaana: “Ke mang yo o bopileng modimo kgotsa yo o dirileng setshwantsho se se thetsweng? Ga se a nna le mosola ope gotlhelele.” (Isaia 44:10) Gape Baebele e bolela gore “medimo yotlhe ya ditšhaba ke medimo e e se nang mosola.” (Pesalema 96:5) Medimo ya maaka ga se ya sepe mme go obamela selo se e seng sa sepe ga go thuse sepe.

Jesu, Baengele le Diabolo

Ka dinako tse dingwe Dikwalo di bua ka batho ba mmatota di re ke medimo. Le fa go ntse jalo, patlisiso e e dirilweng ka kelotlhoko e bontsha gore fa lefoko “modimo” le dirisiwa jalo, le a bo le sa bolele gore batho bano ba botlhokwa kgotsa ba a obamelwa. Go na le moo, mo puong ya ntlha e Baebele e ileng ya kwalwa ka yone, lefoko “modimo” le ne le dirisediwa go tlhalosa motho wa maemo a a kwa godimo kgotsa motho yo o nang le dinonofo tse di tshwanang le tsa Modimo kgotsa motho yo o atamalaneng le Modimo Mothatayotlhe.

Ka sekai, ditemana dingwe tsa Baebele di bua ka Jesu Keresete di re ke modimo. (Isaia 9:6, 7; Johane 1:1, 18) A seno se raya gore Jesu o tshwanetse go obamelwa? Jesu ka boene o ne a re: “Jehofa Modimo wa gago ke ene yo o tshwanetseng go mo obamela, e bile ke ene a le esi yo o tshwanetseng go mo direla tirelo e e boitshepo.” (Luke 4:8) Ga go pelaelo gore le fa Jesu a na le maatla a magolo jaaka modimo, Baebele ga e mo tlhalose e le motho yo re tshwanetseng go mo obamela.

Baengele le bone ba tlhalosiwa e le “ba ba tshwanang le modimo.” (Pesalema 8:5; Bahebera 2:7) Le fa go ntse jalo, ga go na gope mo Dikwalo di kgothaletsang batho go obamela baengele. Tota e bile, mo lekgetlhong lengwe, moaposetoloi Johane yo o neng a setse a tsofetse, o ne a gakgamala thata go bona moengele mo e leng gore o ne a ikoba gore a obamele moengele. Le fa go ntse jalo, moengele o ne a re: “O tlhokomele! O se ka wa dira jalo! . . . Obamela Modimo.”—Tshenolo 19:10.

Moaposetoloi Paulo o ne a tlhalosa Diabolo a re ke “modimo wa tsamaiso eno ya dilo.” (2 Bakorintha 4:4) E re ka Diabolo e le “mmusi wa lefatshe leno,” o tlhotlheletsa batho go obamela medimo e le mentsi ya maaka. (Johane 12:31) Ka jalo, kobamelo yotlhe e e direlwang medimo e e dirilweng ke batho, tota ke kobamelo ya ga Satane. Mme Satane ga se modimo yo o tshwanelwang ke kobamelo ya rona. Ke mmusi yo o itlhomileng yo o itsetseng maemo. Fa nako e ntse e tsamaya, ene mmogo le mefuta yotlhe ya kobamelo ya maaka o tla nyelediwa. Fa seo se direga, batho botlhe—ee, popo yotlhe—e tla dumela gore Jehofa ke ene fela Modimo yo o esi wa boammaaruri yo o tshelang.—Jeremia 10:10.

A O KILE WA IPOTSA GORE?

▪ Baebele e ruta eng ka kobamelo ya medingwana?—Pesalema 135:15-18.

▪ A Jesu le baengele ba tshwanetse go obamelwa?—Luke 4:8.

▪ Modimo yo o esi wa boammaaruri ke mang?—Johane 17:3.

[Ditshwantsho mo go tsebe 28, 29]

Ditshwantsho go tswa kafa mojeng: Marea, Italy; Maya modimo wa mmidi, Mexico le Amerika Bogare; Ashethorethe, Kanana; modingwana, Sierra Leone; Buddha, Japane; Chicomecóatl, Aztec, Mexico; modingwana wa tlhogo ya phakalane e bong Horus, Egepeto; Seuse, Gerika

[Motswedi wa Setshwantsho]

Maize god, Horus falcon, and Zeus: Photograph taken by courtesy of the British Museum