Dikakgelo Tsa Babadi

Tirisanommogo—E Botlhokwa Thata mo Botshelong (September 8, 2005) Nta ke tlhalose gore lekgetlho la ntlha fa ke bona tsebe e e kafa ntle ya makasine ono, ke ne ke sa bone nka kgatlhegela go bala setlhogo seno. Mme ke ne ka bala motseletsele otlhe wa ditlhogo tseno, mme ka di rata! Gantsinyana fa ke ntse ke bala, ke ne ke ema ke leboga Jehofa go bo a bopile dilo ka tsela e e kgatlhang jaana. Go ne go kgatlha tota go bona ka tsela e diphologolo di dirisanang mmogo ka teng.

B. K., kwa United States

Basha ba Botsa Jaana . . . Nka Dira Jang Gore Ke se Ka ka Tlwaelana le Batho Ba ba Sa Siamang? (September 8, 2005) Nkile ka bo ke kgatlhegela motho mongwe “yo o sa siamang,” yo o neng a sa nitama go le kalo mo boammaaruring jwa Baebele. Tshedimosetso eno e nthusitse go bona kotsi ya go tlwaelana le motho yo o bokoa semoyeng. Go molemo tota go itse gore Jehofa o a re kgathalela. Ke leboga thuso eno e e tlileng ka nako.

A.B.K., kwa Zambia

Setlhogo seno se nthusitse go bona gore ke tshwanetse go fetola mofuta wa batho ba ke itsalanyang le bone. Le mororo seno se ne se le thata, setlhogo seno—se ke dirang gore se nne se ntse se le gaufi gore ke se bale—se nna se nnonotsha. Ke lebogela thuso le kgothatso e lo e nayang rona basha.

L. R., kwa United States

Kgopolo E e Mo Baebeleng—A o Tshwanetse go Rapela Lekgarebana Marea? (September 8, 2005) Ke rata tsela e lona Basupi ba ga Jehofa lo dirang dilo ka yone ka gonne lo itshwere ka tsela e e se nang molato mme le dimakasine tsa lona di nthusitse fela thata. Le fa go ntse jalo, lo raya jang fa lo re ga re a tshwanela go kopa thuso mo go Marea? Ke ene a re buelelang kwa go Rara, gore re nne le kagiso.

E. R., kwa Spain

“Tsogang!” e a araba: Jaaka fa setlhogo seno se ne sa tlhalosa, ga go na gope mo Baebele e re bolelelang gore re rapele motho mongwe o sele ntle le Modimo. Go ya ka moruti wa Katoliki e bile e le mokwadi wa dibuka e bong Andrew Greeley, “letshwao la ga Marea le golaganya Bokeresete le ditumelo tsa bogologolo tse di neng di dumela mo modimong wa mosadi yo e leng mmè.” Ka gone, go obamela Marea go simolotse mo boheitaneng, e seng mo Bokereseteng. Eno e ka nna ya bo e le ntlha e babadi ba le bantsi ba dimakasine tsa rona ba sa e itseng, mme re kgothaletsa batho bano go sekaseka Baebele go bona gore totatota e ruta eng. Ba le bantsi ba Basupi ba ga Jehofa e kile ya bo e le Bakatoliki, mme e ne ya re fa ba sena go ithuta Lefoko la Modimo, ba lemoga gore Modimo ga a batle re dirisa ope ntle le Jesu Keresete fa re rapela. Ke ene fela motsereganyi wa rona. (Bahebera 7:25) Fa o batla tshedimosetso e e oketsegileng, bona buka ya “Totatota Baebele e Ruta Eng?” * Kgaolo 15, “Kobamelo e e Amogelwang ke Modimo,” e e tlotlang ka botlhokwa jwa go dira gore se re se dumelang se dumalane le se se mo Dikwalong tse di Boitshepo.

Go Itshokela Bolwetse Mme ke Ntse ke Itumetse (April 22, 2005, ka Seesemane) Mogatsake o ne a swa a bolawa ke sebete ka December 2002. Se mmogisitse ka dikgwedi di ka nna robedi. Le fa go ntse jalo, o ne a tlhola a bua fela ka dilo tse di kgothatsang mme a re bolelela maitemogelo a a neng a re tshegisa. Go fitlha a tlhokafala, o ne a nna a na le tsholofelo. Morago ga go bala setlhogo seno, jaanong ke a tlhaloganya gore ke ka ntlha yang. O ne a tlhoka go nna le boikutlo jo bontle fela jaaka rona. Bo tshwanetse jwa bo bo ne bo dira gore a ikutlwe botoka, fela jaaka Conchi. Ke leboga gore lo bo lo nthusitse go bona gore ke ka ntlha yang fa mosadi wa me a ne a dira ka tsela e a neng a dira ka yone.

D. H., kwa United States

Dikakgelo Tsa Babadi Ka metlha ke rata go bala ditlhogo tsa “Dikakgelo Tsa Babadi.” Ka dinako dingwe e tle e re fa ke bala lekwalo la mongwe, ke akanye ke re, ‘Le nna ke ikutlwa fela jaana!’ Ka dinako tse dingwe ke ipotsa gore, ‘Ke eng fa ke sa bona ntlha eno mo setlhogong seno?’ Morago ga moo ke bala setlhogo seo gape, mme gantsi fa ke se bala gape ke se itumelela thata e bile se a nkgothatsa.

M. T., kwa Japane

[Ntlha e e kwa tlase]