MAFOKO ano a kayang? A kaya seemo sa motho sa mo tlhaloganyong le mo maikutlong. “Yo o bogisiwang” o nna a akantse ka dilo tse di seng monate—mme maikutlo ao a dira gore malatsi a gagwe a nne “bosula” kgotsa a hutsafatse. Go farologana le seo, “yo o nang le pelo e e thamileng” o leka go tlhoma mogopolo mo dilong tse di molemo—boikutlo jo bo dirang gore a itumele, mo go dirang gore a nne le “modiro ka metlha.”

Rotlhe re na le mathata a a ka re amogang boitumelo ka selekanyo se se rileng. Le fa go ntse jalo, re ka kgona go dira dilo dingwe tse di ka re thusang gore re nne re itumetse ka dinako tse di thata. Ela tlhoko se Baebele e se buang.

• O se ka wa letla ditlhobaelo tsa ka moso di go imetsa gompieno. Jesu Keresete o ne a re: “Lo se ka lwa tshwenyega ka letsatsi le le latelang; le tla nna le matshwenyego a lone a a le lekaneng. Ga go tlhokege go oketsa mathata a letsatsi lengwe le lengwe le re tlisetsang one.”—Mathaio 6:34, Good News Translation.

• Leka go tlhoma mogopolo mo dilong tse di molemo tse di go diragaletseng. Tota e bile fa o kotlomane pelo, ke eng fa o sa dire lenaane la dilo tse di molemo tseo mme o tlhatlhanye ka tsone? Gape se nnele go akanya ka diphoso tsa mo nakong e e fetileng kgotsa ditiro tse di sa siamang. Ithute mo go tsone mme o tswelele ka botshelo. Tshwana le mokgweetsi yo o latlhelang leitlho mo seiponeng se se mmontshang kwa morago ga koloi mme a sa tlhome mogopolo mo go sone. Gape nna o itse gore go “na le boitshwarelo jwa boammaaruri [mo Modimong].”—Pesalema 130:4.

• Fa ditlhobaelo di go fekeetsa, bulela mongwe yo o ka kgonang go go kgothatsa mafatlha. Diane 12:25 ya re, “go tshwenyega ka tlhobaelo” go dira gore pelo ya rona ‘e obege, mme lefoko le le molemo le a e ipedisa.’ “Lefoko le le molemo” leo le ka tswa go mongwe wa lelapa kgotsa tsala e e ikanyegang—mongwe yo o sa nneleng go go belaela kgotsa go bua dilo tse di hutsafatsang mme a le “lorato ka dinako tsotlhe.”—Diane 17:17.

Mafoko a a botlhale a a fitlhelwang mo Baebeleng a thusitse batho ba le bantsi go bona boitumelo mo botshelong le fa ba lebane le dinako tse di thata. E kete mafoko ao a a molemolemo a ka go thusa le wena.