Fa o batla go itse motho sentle, go a thusa go itse dilo tse a di fitlheletseng mo botshelong le dikgwetlho tse a ileng a kopana le tsone. Go ntse fela jalo le ka rona fa re batla go itse ka Modimo. Fa re mo itse sentle, re tla lemoga gore o dirile dilo tse dintsi tse di re thusang gone jaanong le tse di tla re thusang mo nakong e e tlang.

Jehofa Modimo o bopile sengwe le sengwe e bile “dinonofo tse di sa bonaleng tsa gagwe di bonwa sentle mo popong ya lefatshe go ya pele, ka gonne di lemogiwa ka dilo tse di dirilweng.” (Baroma 1:20) “Ke Modiri wa lefatshe ka maatla a gagwe, Yo o tlhomamisang ka thata naga e e ungwang ka botlhale jwa gagwe, le Yo o phuthulotseng magodimo ka tlhaloganyo ya gagwe.” (Jeremia 10:12) Tsela e dilo tse Modimo a di bopileng di leng dintle ka yone e re bontsha gore o a re kgathalela.

Batho ga ba tshwane le dilo tse dingwe tse Jehofa a di bopileng ka gonne ba ‘bopilwe mo setshwanong sa gagwe.’ (Genesise 1:27) Seo se raya gore Modimo o dirile gore re nne le botho jwa gagwe ka selekanyo se se rileng. O dirile gore re kgone go tlhaloganya tsela e a dirang dilo ka yone. Fa re leka go tshela ka tsela e e mo itumedisang, le rona re tla kgona go itumelela botshelo. Mo godimo ga moo, Modimo o dirile gore re kgone go nna ditsala tsa gagwe.

Fa re leba dilo tse Modimo a di bopileng, re kgona go lemoga gore o ikutlwa jang ka rona. Moaposetoloi Paulo a re Modimo ga a ka a “itlogela a se na bosupi ka gore [o] ne a dira molemo, a [re] naya dipula go tswa legodimong le dipaka tsa maungo, a tlatsa dipelo tsa [rona] ka botlalo ka dijo le boitumelo jo bogolo.” (Ditiro 14:17) Modimo ga a re naya dilo di le mmalwanyana fela tse di re thusang gore re kgone go tswelela re tshela. O re neile dilo tse dintsi tse di farologaneng gore re itumelele botshelo. Mme go na le tse dintsi tse a sa ntseng a tlile go re direla tsone.

 Jehofa o bopile lefatshe gore batho ba nnele ruri mo go lone. Baebele ya re “lefatshe o le neile bana ba batho” le gore ‘ga a le bopela lefela, o le bopetse gore go nniwe mo go lone.’ (Pesalema 115:16; Isaia 45:18) Modimo o ne a batla gore go nne batho ba ba ntseng jang mme ka lobaka lo lo kae? “Basiami ba tla rua lefatshe, mme ba tla aga mo go lone ka bosakhutleng.”​—Pesalema 37:29.

Jehofa o ile a bopa monna wa ntlha le mosadi e bong Adame le Efa gore ba nne mo lefatsheng la paradaise le gore ba le ‘leme le go le tlhokomela.’ (Genesise 2:8, 15) Modimo o ile a ba raya a re: “Atang lo ntsifale lo tlatse lefatshe lo bo lo le fenye.” (Genesise 1:28) Adame le Efa ba ne ba tlile go tshelela ruri mo lefatsheng ba itumetse. Ka maswabi, ba ile ba tlhopha go sa reetse Modimo mme ba latlhegelwa ke tshono ya go nna bangwe ba “basiami” ba ba neng ba tla “rua lefatshe.” Mme se ba se dirileng ga se a ka sa dira gore Jehofa a fetole boikaelelo jwa gagwe ka batho le ka lefatshe. Pele re tlotla ka kgang eno, a re utlwe gore ke eng gape se Modimo a ileng a se dira.

Baebele e bidiwa Lefoko la Modimo. Goreng Jehofa a ile a dira gore Baebele e kwalwe? Gore re tle re mo itse. (Diane 2:1-5) Baebele ga e arabe potso nngwe le nngwe e re nang le yone ka Modimo, tota e bile ga go na buka epe e e ka dirang jalo. (Moreri 3:11) Mme dilo tse di mo Baebeleng di lekane go re thusa go itse Modimo. Tsela e a ileng a dirisana le batho ka yone e re bontsha gore ke Modimo yo o ntseng jang. Re kgona go bona gore o rata batho ba ba ntseng jang. (Pesalema 15:1-5) Re kgona go ithuta tsela e a batlang re mo direla ka yone le e a batlang re tshela ka yone. Fa re bala ka dilo tse Morwa Modimo e bong Jesu Keresete a ileng a di dira le tse a ileng a di bua, re kgona go tlhaloganya botho jwa ga Jehofa sentle.​—Johane 14:9.

Lebaka le lengwe gape la go bo Jehofa a dirile gore Baebele e kwalwe, ke ka gonne a batla gore re itumelele botshelo. Baebele e re ruta gore re nne le malapa a a itumetseng, re kgotsofale mo botshelong le gore re itshokele mathata a botshelo. Mo makasineng ono, re tlile go bona gore Baebele e araba dipotso tsa botlhokwa mo botshelong tse di jaaka: Goreng batho ba boga botlhoko jaana? Go tlile go diregang mo nakong e e tlang? Gape e re tlhalosetsa se Modimo a se dirileng go netefatsa gore boikaelelo jwa gagwe jwa kwa tshimologong bo a diragadiwa.

Baebele e farologane thata le dibuka tse dingwe ka gonne e tsere lobaka lwa dingwaga di feta 1 600 gore e kwalwe e bile e kwadilwe ke banna ba ka nna 40 ba ba ileng ba kwala molaetsa o o tshwanang, e leng se se bontshang gore sentlentle Mokwadi wa yone ke Modimo. (2 Timotheo 3:16) Baebele ga e tshwane le dibuka tse dingwe tsa bogologolo ka gonne go na le bosupi jo bo fitlhetsweng jo bo bontshang gore molaetsa wa yone ga o ise o fetoge. Mo godimo ga moo, Baebele e ile ya kgona go ranolwa, go phasaladiwa le go balwa le fa go ile ga dirwa maiteko a go e thibela. Go tla go fitlha le gompieno, Baebele ke yone fela buka e e ileng ya ranolwa le go phasaladiwa go di gaisa tsotlhe. Seno ke bosupi jwa gore “lefoko la Modimo wa rona, le tla nna ka bosakhutleng.”​—Isaia 40:8.

Selo se sengwe gape se Modimo a ileng a se dira, ke go netefatsa gore boikaelelo jwa gagwe ka batho bo tla diragadiwa. Boikaelelo jwa Modimo e ne e le gore batho ba tshelele ruri mo lefatsheng. Mme fa Adame a ne a tlhopha go sa reetse Modimo, tshono eo ga ya ka ya latlhegela ene fela, e ile ya latlhegela le ditlogolwana tsa gagwe. “Fela jaaka boleo bo ne jwa tsena mo lefatsheng ka motho a le mongwe le loso ka boleo, loso lo ne lwa anamela kwa bathong botlhe ka gonne ba leofile botlhe.” (Baroma 5:12) Boleo jwa ga Adame bo ile jwa dira gore go bonale e kete boikaelelo jwa Modimo ga bo kitla bo diragadiwa. Jehofa o ile a tsiboga jang?

Jehofa o ile a tsaya tshwetso e e siameng. O ile a otlhaya Adame le Efa mme a rulaganya gore ditlogolwana tsa bone di nne le tshono ya go tshelela ruri mo lefatsheng. E re ka Jehofa a le botlhale, o ile a akanyetsa kgang eo mme a dira kitsiso ya se a  ikaeletseng go se dira go baakanya seemo seo. (Genesise 3:15) Morwa Modimo e bong Jesu Keresete ke ene yo o neng a tla ntsha batho mo dikgoleng tsa boleo le loso. Seo se ne se tla tlhoka gore a direng?

Jehofa o ile a romela Jesu gore a tle mo lefatsheng go tla go ruta batho tsela ya botshelo le go “ntsha moya [kgotsa botshelo jwa] gagwe e le thekololo gore a bone ba le bantsi.” a (Mathaio 20:28; Johane 14:6) Pele Adame a leofa, o ne a se na boleo mme Jesu le ene o ne a se na boleo, ke ka moo Jesu a ileng a kgona go ntsha botshelo jwa gagwe setlhabelo. Mme Jesu ene ga a ka a tshwana le Adame, o ile a reetsa Modimo go fitlha a swa. Jehofa o ile a tsosa Jesu mo baswing ka gonne Jesu o ne a sa tshwanela go swa. Jaanong Jesu o ile a kgona go naya ditlogolwana tsa ga Adame botshelo jo bo sa khutleng. “Gonne fela jaaka ba le bantsi ba ne ba dirwa baleofi ka botlhokakutlo jwa motho a le mongwe, ka tsela e e tshwanang ba le bantsi ba tla dirwa ba ba siameng ka go utlwa ga motho a le mongwe.” (Baroma 5:19) Modimo o tla dirisa setlhabelo sa ga Jesu go naya batho botshelo jo bo sa khutleng jo a ba solofeditseng jone.

Re ithuta dilo tse dintsi ka Jehofa mo tseleng e a ileng a rarabolola ka yone bothata jo bo bakilweng ke botlhokakutlo jwa ga Adame. Re ithuta gore ga go na ope yo o ka thibelang Jehofa fa a batla go dira selo, sengwe le sengwe se a se buang se a “atlega.” (Isaia 55:11) Gape re kgona go lemoga gore Jehofa o re rata fela thata. “Lorato lwa Modimo lo ne lwa bonadiwa ka seno mo go rona, ka gonne Modimo o ne a romela Morwawe yo o tsetsweng a le esi mo lefatsheng gore re bone botshelo ka ene. Lorato lo ka tsela eno, e seng gore re ratile Modimo, mme gore o re ratile mme a romela Morwawe go nna setlhabelo sa thuanyo sa maleo a rona.”​—1 Johane 4:9, 10.

Modimo o ile a letla gore Morwawe a bolawe, ka jalo, seo se re netefaletsa gore o tla “re naya dilo tsotlhe” tse a re solofeditseng tsone. (Baroma 8:32) Ke eng se Modimo a re solofeditseng sone? Tswelela o bale.