MOTŠHINE o o mo seatleng sa ga Jordan o o setang dipensele o o tshwanang le sekepe, o lebega e le selo se se sa reng sepe. Le fa go ntse jalo, ke selo se a se ratang thata. Jordan a re: “Tsala ya me e e godileng e bong Russell, o ne a mpha one fa ke le monnye.” Morago ga loso lwa ga Russell, Jordan o ile a lemoga gore Russell o ne a le botlhokwa mo lelapeng la bone e bile o ne a ba kgothatsa fa ba na le mathata. A re: “E re ka ke utlwile go le gontsi ka Russell, jaanong ke tsaya mphonyana eno e le botlhokwa thata.”

Fela jaaka re bone mo maitemogelong a ga Jordan, batho ba bangwe ba ka tsaya mpho e se botlhokwa thata. Motho yo o itumelelang dilo tse a di newang ene, a ka tsaya mpho eo e le botlhokwa, le fa e le ya boleng jo bo kwa tlase. Baebele e bua jaana ka mpho e e di gaisang tsotlhe: “Modimo o ratile lefatshe mo go kalo mo a bileng a ntsha Morwawe yo o tsetsweng a le esi, gore mongwe le mongwe yo o dumelang mo go ene a se ka a senngwa mme a nne le botshelo jo bo sa khutleng.”—Johane 3:16.

Ruri mpho eo e ka dira gore motho a tshelele ruri! A go na le mpho e nngwe e e gaisang eno? Le fa batho bangwe ba tsaya mpho eno e se botlhokwa, Bakeresete ba boammaaruri bone ba e tsaya e le ‘tlhwatlhwakgolo’. (Pesalema 49:8; 1 Petere 1:18, 19) Mme goreng Modimo a ile a dira gore Morwawe a swele batho botlhe?

Moaposetoloi Paulo o bua jaana fa a tlhalosa lebaka la seo: “Fela jaaka boleo bo ne jwa tsena mo lefatsheng ka motho a le mongwe le loso ka boleo, loso lo ne lwa anamela kwa bathong botlhe ka gonne ba leofile botlhe.” (Baroma 5:12) Monna wa ntlha e bong Adame o ile a leofela Modimo ka boomo, ka jalo, seo se ne sa dira gore a swe. E re ka Adame a ile a leofa, ditlogolwana tsotlhe tsa gagwe di a swa.

“Dituelo tse boleo bo di duelang ke loso, mme mpho e Modimo a e nayang ke botshelo jo bo sa  khutleng ka Keresete Jesu Morena wa rona.” (Baroma 6:23) Modimo o ne a golola batho mo bokgobeng jwa loso ka go romela Morwawe e bong Jesu Keresete mo lefatsheng gore a ntshe botshelo jwa gagwe jo bo itekanetseng e le setlhabelo. Ka ntlha ya setlhabelo seo se se itsegeng e le “thekololo,” botlhe ba ba dumelang mo go Jesu, ba tla tshelela ruri.—Baroma 3:24.

Paulo o ne a bua jaana ka ditshegofatso tse Modimo a di nayang baobamedi ba gagwe ka Jesu Keresete: “A re lebogeng Modimo ka ntlha ya mpho ya gagwe ya mahala e e ka se kang ya tlhalosiwa.” (2 Bakorintha 9:15) Ruri thekololo ke mpho e e botlhokwa thata e re ka se kgoneng go e tlhalosa ka botlalo! Ke ka ntlha yang fa thekololo e le mpho e e gaisang dimpho tsotlhe tse di molemo tse Modimo a di nayang batho? E farologana jang le dimpho tse dingwe tsa Modimo? * Mme re tshwanetse go dira eng go bontsha gore re a e lebogela? Bala dikarabo tsa Baebele tsa dipotso tseo mo ditlhogong tse di latelang.